Міжканфесійная канферэнцыя ў Адэсе

23 верасьня 2009 г. в Душпастырскім доме Апостала Паўла (Нямецкай Евангелічна-Лютэранскай Царквы ва Ўкраіне) распачалася міжнародная канферэнцыя “Цэрквы Ўкраіны перад выклікамі сучасных грамадскіх крызаў”.

Канферэнцыя, якая праходзіць 23-25 верасьня 2009 г., арганізаваная міжнароднай міжканфесійнай групай «Прымірэньне” у рамках праекту “Прымірэньне ў Еўропе – заданьне Цэркваў ва Ўкраіне, у Беларусі, Польшчы і Нямеччыне”.

Паводле праграмы Канферэнцыі на працягу трох дзён прадстаўнікі праваслаўных, лютэранскіх, рыма-каталіцкіх і грэка-каталіцкіх Цэркваў Украіны, Беларусі, Польшчы і Нямеччыны будуць размаўляць пра крызы, з якімі сутыкнуліся ў пачатку ХХІ стагоддзя грамадствы Цэнтральнай і Ўсходняй Еўропы.

Архіепіскап Іларыён21 верасня 2009 г. падчас візіту ў Ватыкан кіраўнік Аддзела знешніх царкоўных сувязяў Маскоўскага Патрыярхату архіепіскап Валакаламскі Іларыён (Алфееў) паведаміў, што сёння існуе шмат прычын для аб’яднання католікаў і праваслаўных з мэтай супрацоўніцтва ў дэхрысціянізаваным свеце. Па словах архіепіскапа Іларыёна, настаў час пераадолець падзел і канкурэнцыю і жыць у салідарнасці і ўзаемнай любові.

Архібіскуп Міраслаў (Марусын)21 верасьня 2009 году, у сьвята Раства Найсьвяцейшай Багародзіцы (паводле старога календара), у Рыме, ва ўкраінскай Папскай калегіі сьв. Язафата спачыў у Госпадзе Высокадастойны Архібіскуп Міраслаў (Марусын), былы Сакратар Кангрэгацыі Ўсходніх Цэркваў.

Папа Бенядыкт XVI Адказваючы на пажаданьні Патрыярхаў ды Вярхоўных Архібіскупаў Усходніх Каталіцкіх Цэркваў, якія яны неаднаразова выказвалі з розных нагодаў, Яго Сьвятасьць Папа Бенядыкт XVI запрасіў іх на сустрэчу, якая адбылася ў суботу, 19 верасьня 2009 году, у летняй рэзідэнцыі Папы ў Кастэль Гандольфа, недалёка Рыму.

У сустрэчы ўдзельнічала 6 Патрыярхаў усіх Усходніх Каталіцкіх Цэркваў:
Патрыярх Мараніцкай Царквы кардынал П’ер Сфэір, Патрыярх Халдэйскай Каталіцкай Царквы кардынал Эмануэль ІІІ Дэльлі, Патрыярх Копцкай Каталіцкай Царквы Антоній Нагіб, Патрыярх Грека-Мелхіцкай Царквы Рыгор ІІІ Лагам, Патрыярх Сірыйскай Каталіцкай Царквы Ігнацій Юсуф ІІІ Юнан; Патрыярх Армянскай Каталіцкай Царквы Нерсес Бедрос ІІІ Тармуні ды Лацінскі Патрыярх Ерусаліму Фуад Туаль, а таксама 4 Вярхоўных Архібіскупа: Першаярарх УГКЦ Яго Блаславенства Любамір (Гузар), Першаярарх Сірыйска-Малабарскай Царквы Варкей Вітхаятхіл, Першаярарх Румынскай Грека-Каталіцкай Царквы Архібіскуп-Мітрапаліт Луцыян (Мурэшан) ды Першаярарх Сірыйска-Маланкарскай Царквы Базеліос Моран Мор Кліміс Тоттункал.

19 Верасьня, у суботу – 19 верасьня 2009 г. , грэка-каталіцкая Парафія імя сьв. Язафата ў Лідзе, у рамках святкаваньня парафіяльнага сьвята, адзначыла 15-годзьдзе аднаўленьня душпастырскай дзейнасьці.
Яна зьяўляецца спадкаемніцай 4 грэка-каталіцкіх (уніяцкіх) супольнасьцяў, якія існавалі ў г. Ліда ў першай палове XVII ст. Гэта былі: царква сьв. Яна, сьв. Мікалая (на рынкавай плошчы), сьв. Спаса і царква Прачыстай Багародзіцы.

СМІ перадалі інфармацыю, што ў Менску пры пры аднаўленьні ўніяцкай царквы Сьвятога Духа знайшлі склеп з астанкамі пахаваньняў:

“Ужо некалькі тыдняў працоўныя КУП "Мінская Спадчына" раскопваюць фундаменты царквы. Падчас працы коўш экскаватара раптам прабіў невядомую крыпту (пахавальны склеп), не пазначаную ні на адным з планаў царквы . Прараб будоўлі выклікаў спецыялістаў з інстытута археалогіі НАН Беларусі, якія пачалі прафесійна раскопваць крыпту. Астанкі фундатараў царквы засталіся некранутымі, нягледзячы на нешчасьлівы лёс храма. Побач з знойдзеным склепам, які належыць да "крыптаў закрытага тыпу", знайшлі яшчэ адно пахаваньне - ўжо ў адкрытай крыпце”. (гл. Валянцін Груздаў http://www.belradio.fm/by/967/reports/38057/ )

Экуменічнае сьвяткаваньне парафіяльнага сьвята ў Лужках

У парафіяльным сьвяце Нараджэньня Маці Божай у рыма-каталіцкай Парафіі у Лужках (Глыбоччына) 8 верасьня 2009 г. – чарговы раз удзельнічалі грэка-католікі.

Гэта парафіяльнае сьвяткаваньне было ўключана ў Юбілейны Год рыма-каталіцкай Віцебскай дыяцэзіі. Сьвяточную Службу ўзначаліў Апостальскі Візітатар для грэка-католікаў Беларусі Архімандрыт Сяргей (Гаек), з якім саслужылі ераманахі з ордэну Айцоў Піяраў з Ліды і Шчучына. Прысутнічалі шматлікія рыма-каталіцкія сьвятары з навакольных парафіяў а таксама шматгадовы душпастыр мясцовай праваслаўнай парафіі.

СЁНЬНЯ КАТЭХІТЫЧНАЯ СУСТРЭЧА СТУДЭНЦКАЙ МОЛАДЗІ – 9 верасьня

Біблійныя словы: “Гасподзь дае мудрасьць; і з вуснаў Яго – веды і розум” (Выслоўі Саламона 2:6) – гэта дэвіз катэхітычных сустрэчаў для студэнтаў Менску.

Сустрэчы адбываюцца кожную сераду ў 19:30 гадз. ў капліцы грэка-каталіцкага Душпастырскага Цэнтра сьв. Язэпа па вул. Арджанкідзэ 6.
(Ст. метро “Аўтазаводская”, далей налева па вул. Цэнтральнай; 3-я вуліца направа).

Бліжэйшая сустрэча адбудзецца ў сераду 9 верасьня 2009 г. ў 19:30 гадз.

Узначальвае катэхітычныя сустрэчы а. Аляксандр Аўдзяюк, адказны за душпастырскую апеку студэнтаў у г. Менску (тэл. МТС: 522.70.19)

На катэхізацыю шчыра запрашаем студэнтаў, таксама і тых, якія прыехалі ў Менск на навучаньне.

Адкрыцьцё Году Жыровіцкай Іконы Маці Божай

У 2010 годзе прыпадае 280 год з часу каранацыі Іконы Маці Божай Жыровіцкай папскімі каронамі.

8 (19) верасьня 1730 г., у сьвята Нараджэньня Найсьвяцейшай Багародзіцы, кіеўскі уніяцкі мітрапаліт Атанасій Шаптыцкі, у прысутнасьці пасланьніка Папы Рымскага, двух уніяцкіх біскупаў (Тэафіла Гадэбскага, уладыкі Ўладзімірскага і Берасьцейскага ды Юрыя Булгака, уладыкі Пінскага і Тураўскага), шматлікага духавенства візантыйскага і лацінскага абрадаў і дзясяткаў тысячаў вернікаў зьдзейсьніў урачысты акт каранацыі залатымі папскімі каронамі Іконы Маці Божай у Жыровіцах.

Была гэта першая каранацыя цудатворнай іконы папскімі каронамі на тэрыторыі сучаснай Беларусі.

У нядзелю 6 верасьня 2009 г. ў Капліцы Ўсіх Сьвятых Беларускага Народу ў нашым парафіяльным Цэнтры сьв. Язэпа новарукапакладзены 23 жніўня сьвятар БГКЦ а.Аляксандр Аўдзеюк адслужыў сваю ўрачыстую прыміцыйную Літургію.

У казаньні а.Аляксандр разважаў прыпавесьць аб валадары, што запрасіў гасьцей на вясельле сына (Мц 22,1-14). Галоўнай думкаю была дарога да Валадарства Божага, ісьці якою запрошаны кожны.

Пасьля Літургіі а.Аляксандр удзяліў кожнаму верніку асабістае прыміцыйнае блаславеньне.