Сьведчаньне ўдзельніка ХХІІІ пілігрымкі

Я першы раз удзельнічаў у грэка-каталіцкай пілігрымцы, папярэднім разам я быў у пілігрымцы рыма-каталіцкай. Гэтая пілігрымка была вельмі сымбалічная.

Па-першае, ушанаваньне Полацкіх пакутнікаў, якіх можна разглядаць як сымбаль нашай Уніяцкай Царквы.

Па-другое, 500-годзьдзе выданьня Бібліі Францыскам Скарынам.

Па-трэцяе, маршрут пралягаў па землях гістарычнай Полаччыны, адкуль пайшла нашая дзяржаўнасьць.

Па-чацьвёртае, грэка-каталіцкая пілігрымка стала сымбалям навяртаньня гэтай зямлі да Бога, бо яшчэ 23 гады таму па дарозе на Полацак ня было ніводнага храму, крыжу. А зараз яны ёсьць і іх становіцца ўсё больш.

400 год таму, у Нагародавічах на Навагрудскай Зямлі Вялікага Княства Літоўскага, кіеўскі з’яднаны мітрапаліт Язэп Вельямін Руцкі рэарганізаваў славянскае манаства, што дало пачатак Ордэну Базыльянаў.

На першай Капітуле, якую мітрапаліт Язэп склікаў у сваім радывым маёнтку ў Нагародавічах, 20-26 ліпеня 1617 г., адбылася рэформа і рэарганізацыя ўсходняга манаства ў Кіеўскай з’яднанай мітраполіі і заснаванне «Ордэна Св. Васіля Вялікага».

У 1617 г. з’яднаная (унійная) супольнасць манахаў, якія духова падтрымлівалі мітрапаліта Язэпа Руцкага і архімандрыта Язафата Кунцэвіча мела ўжо пяць манастыроў. Гэта былі: Вільня, Быцень, Жыровічы, Наваградак і Мінск, у якіх пражывала каля ста манахаў. Яны ажыццяўлялі першапачатковы план Язэпа Руцкога, працуючы над адраджэннем з’яднанай Царквы і над адукацыяй народа.

У Вільні, Наваградку і ў Мінску былі адкрыты школы для дзяцей, у Жыровічах адноўлена паломніцкае месца, а ў Быцені распачата духоўная школа для тых, хто паступае ў манастыр, у якой у тым годзе, пад кіраўніцтвам Айцоў Езуітаў, скончыла духоўнае навучанне першая група манахаў.

Біскуп Алег Буткевіч сустрэў удзельнікаў ХХІII грэка-каталіцкай пілігрымкі.

У пятніцу, 14 ліпеня 2017 г., на паломніцкім шляху паміж Обалям і Гаранамі ўдзельнікаў пілігрымкі Віцебск – Полацк сустрэў рыма-каталіцкі Біскуп Віцебскі Уладыка Алег Буткевіч.

Шлях грэка-каталіцкай пілігрымкі праходзіць па тэрыторыі Віцебскай рыма-каталіцкай дыяцэзіі. У пэўныя дні паломнікі моляцца ў рыма-каталіцкіх храмах, што на шляху пілігрымкі, гасціну паломнікам аказваюць душпастыры і вернікі рыма-каталіцкіх парафій.

Таму сустрэча Біскупа Алега з паломнікамі была вялікай радасцю, тым больш вялікай, што нечаканай.

Яна ўмацавала пілігрымаў духова ды і ня толькі. Для падмацавання цела Уладыка Алег пачаставаў удзельнікаў пілігрымкі бананамі.

Урачыстае адкрыццё трэцяга міжнароднага мастацкага плэнера, які ў гэтым годзе прысвечаны 500-годдзю перакладу «Бібліі» Францішкам Скарынам, адбылося 23 ліпеня ў касцёле Найсвяцейшай Тройцы ў Друі.

Святую Імшу на адкрыццё «Скарынера» цэлебраваў пробашч парафіі і непасрэдны арганізатар пленэра кс. Сяргей Сурыновіч.

На распачацце «Скарынера» ў Друю прыбыло каля 30 мастакоў як з Беларусі, так і замежжа. Сваю працу яны распачалі ўжо 22 ліпеня. Адметна, што сёлета ў плэнэры побач з прафесійнымі мастакамі прымае ўдзел і 14-гадовы выхаванец Друйскага дзіцячага дома Ілья Данілевіч.

ХХІII грэка-каталіцкая пілігрымка – шлях праслаўлення Збаўцы.

“Праслаўляем Імя Ісуса” –дэвіз і духоўная праграма першага дня пілігрымкі, дарогі з Віцебска да Заронава. Асаблівай малітвай ў гэты дзень быў скарынаўскі “Акафіст Імю Ісусаваму”.

Але гэты дзень вызначаў характар усёй пілігрымкі. Кожнага дня ў час маршу паломнікі песнямі праслаўлялі Імя Ісуса Хрыста. Праслаўленнем Госпада былі так сама багаслужэнні.

Дух супольнага праслаўлення Бога дамінаваў і у спантанных канцэртах, на месцах начлегаў. У братэрскай супольнасці хрысціяне розных традыцый і канфесіі спевам маліліся за Бацькаўшчыну, за духовае дабро паміж людзмі, за мір на свеце….

Удзельнікі ХХІII грэка-каталіцкай пілігрымкі асэнсоўваюць яе духовыя плады.

Да мэты пілігрымкі - у Полацк, у суботу - 15 ліпеня 2017 г. дайшло больш за 100 пілігрымаў. Шлях пілігрымкі, што пачаўся 11 ліпеня 2017 г. у Віцебску, праходзіў праз Заронава, Шуміліна, Обаль, Гараны, Струнне.

Дэвізам пілігрымкі былі словы Францішка Скарыны з прысвячэння да выдадзенай ім 500 гадоў таму ў Празе Бібліі: «Людемъ посполитымъ к доброму научению».

На паломніцкім шляху малітвы і «добрага навучання» пілігрымы карысталіся малітвамі з Малой падарожнай кніжкі Францішка Скарыны – у перакладзе на беларускую мову зробленым айцом Аляксандрам Надсанам.

З 22 па 30 ліпеня ў Друі, што на Браслаўшчыне, у кляштары пры парафіі Святой Тройцы пройдзе трэці міжнародны мастацкі пленэр. У ім прымаюць удзел 40 прафесійных мастакоў з Беларусі і замежжа.

Асноўная мэта пленэру ў старажытных мурах — дыялог рэлігіі і мастацтва, будаўніцтва перспектываў мастоў, пошук агульнай гамы, дэталізацыя адценняў сугучча і сумоўя.

2017 год з’яўляецца асаблівым. Роўна 500 год таму беларусы атрымалі першую друкаваную кнігу. Гэта не быў пераклад філасофскіх вучэнняў Арыстоцеля, ці медычных трактатаў Ісхака ібн Хунайна. Гэта была кніга, што злучыла ў сабе і спрадвечную мудрасць, і ацаленне разам – Біблія! 

У чацвер, 13 ліпеня, у трэці дзень XXIII пілігрымкі, пілігрымы маліліся ў Санктуарыі Маці Божай Фацімскай ў Шуміліне.

Боскую Літургію ўзначаліў архімандрыт Сяргей (Гаек), які ўзгадаў, што ў той самы дзень удзельнікі беларускай пілігрымкі, якую ўзначаліў мітрапаліт Мінска-Магілёўскі Тадэвуш Кандрусевіч, моляцца ў Фаціме.

На пачатку Боскай Літургіі Архімандрыт Сяргей блаславіў падраснікі і апрануў у царкоўную вопратку двух кандыдатаў у духоўную семінарыю: Арцёма Калугіна з Віцебска і Ціграна-Мікалая Латышава з Мінска.

Паводле візантыйскага календара ў гэты дзень прыпадае таксама свята (Сабор) арханёла Гаўрыіла, таму ўдзельнікі пілігрымкі Віцебск-Полацк маліліся асабліва за Апостальскага Нунцыя, які носіць імя Гаўрыіл (вянг. Габор), і за ягонае служэнне ў Беларусі.