Папа Рымскі Францішак скіраваў зварот да вернікаў, палітыкаў і міжнароднай супольнасці ў сувязі з абвастрэннем сітуацыі ва Украіне.

Пасля традыцынай нядзельнай малітвы “Анёл Панскі” 2 сакавіка 2014 г., звяртаючыся з вакна Апостальскага палацу ў Ватыкане, Святы Айцец заклікаў працягваць “маліцца за Украіну, якая перажывае далікатную сітуацыю”. “

У той жа час, заклікаю ўсе кампаненты краіны прыкладаць намаганні для пераадолення непаразуменняў і будавання разам будучыні дзяржавы. Звяртаюся да міжнароднай супольнасці са шчырым заклікам патрымаць усе ініцыятывы на карысць дыялога і згоды”, сказаў Папа Францішак.

Паводле матэрыялаў “Беларускай рэдакцыі Ватыканскага радыё”

Дарагія браты і сёстры!

У гэты цяжкі час, калі вайсковыя падраздзяленні Расійскай Федэрацыі, парушаючы міжнародныя і двухбаковыя пагадненні, увайшлі на суверэнную тэрыторыю Украіны, а Савет Федэрацыі на зварот Прэзідэнта Расіі даў згоду пра ўвядзенне расійскіх войскаў ва Украіну, – мы найперш заклікаем усіх вас і ўсіх людзей добрай волі да салідарнасці з намі, да малітвы за Украіну і ўкраінскі народ.
Мы заклікаем улады Расіі апамятацца і спыніць агрэсію супраць Украіны, неадкладна вывесці свае войскі з украінскай зямлі. Уся адказнасць перад Богам і перад чалавецтвам за непапраўныя наступствы далейшай эскалацыі гвалту цалкам кладзецца на кіраўнікоў Расіі.
У нашай дзяржаве няма пераследванняў за мову, за прыналежнасць да пэўнай нацыі, веравызнання. Таму мы сведчым – усе спробы расейскай прапаганды прадставіць падзеі ва Украіне як «фашысцкі пераварот» і «перамогу экстрэмістаў» абсалютна не адпавядаюць рэчаіснасці.

28 лютага ў Экзархаце Беларускай Праваслаўнай Царквы адбылася сустрэча Мітрапаліта Мінска-Магілёўскага арцыбіскупа Тадэвуша Кандрусевіча з Патрыяршым Экзархам усяе Беларусі Мітрапалітам Мінскім і Слуцкім Паўлам. Падчас сустрэчы, якая прайшла ў духу братэрства і ўзаемаразумення, бакі абмеркавалі развіццё адносін паміж Каталіцкім Касцёлам і Праваслаўнай Царквой, асабліва ў галіне абароны хрысціянскіх каштоўнасцяў.

Яго Блаславенства Святаслаў, Вярхоўны Архібіскуп Кіева-Галіцкі, Першаіерарх Украінскай Грэка-Каталіцкай Царквы, публічна падзякаваў біскупам, духавенству і вернікам Каталіцкай Царквы ў Беларусі за малітоўную салідарнасць і падтрымку.

У нядзелю, 23-га лютага 2014 г., Першаіерарх Украінскай Грэка-Каталіцкай Царквы Святаслаў (Шаўчук) узначаліў Боскую Літургію ва ўкраінскім грэка-каталіцкім саборы Святой Сафіі ў Рыме, якую саслужылі уладыка Гліб (Лончына) з Лондана, архімандрыт Сяргей (Гаек) з Беларусі, ды украінскія грэка-каталіцкія душпастыры з наваколляў Рыму.

У Літургіі ўдзельнічала некалькі соцень украінскіх грэка-католікаў ды група італьянскіх рыма-католікаў.

Апостальскі Візітатар БГКЦ накіраваў Яго Блаславенству Святаславу, Вярхоўнаму Архібіскупу Кіева-Галіцкаму, Першаіерарху Украінскай Грэка-Каталіцкай Царквы, ліст са словамі духоўнай салідарнасці.

Ад пачатку бягучага тыдня ў грэка-каталіцкіх парафіях і супольнасцях Беларусі праходзіць эстафета малітвы за Украіну. У Мінску эстафету малітвы пачалі ў аўторак,18 лютага, валанцёры Руху св. Мікалая ў парафіяльнай капліцы св. Язэпа. Эстафету пераняла парафія Маці Божай Нястомнай Дапамогі (серада), далей – парафія св. Мікалая (чацвер), парафія Праведнага Язэпа (пятніца). 22 лютага, у Мясапусную бацькоўскую суботу, у грэка-каталіцкіх парафіях Беларусі будуць служыцца памінальныя Службы за ўсіх ахвяраў гвалту на Кіеўскім Майдане. У пятніцу ўвечары, 21 лютага, – напярэдадні Бацькоўскай суботы – памінальныя Службы былі адслужаныя ў парафіях Праведнага Язэпа і Святога Духа.

У суботу, 22 лютага, а 10-ай гадз. заупакойная служба за ахвяраў Кіеўскага Майдана будзе адслужана ў парафіі Маці Божай Нястомнай Дапамогі па зав. Снежным, д. 7.

Канферэнцыя Каталіцкіх Біскупаў Беларусі абвясціла нядзелю 23 лютага 2014 г. Днём малітвы за Украіну.

Умілаваныя ў Хрысце Пану браты і сёстры!

З вялікім непакоем мы сочым за тым, што адбываецца ў апошні час ва Украіне. Дадзеная сітуацыя з’яўляецца для нас заклікам да малітоўнай салідарнасці ў інтэнцыі мірнага вырашэння гэтага драматычнага канфлікту.

Папа Францішак заахвоціў да мірнага заканчэння канфлікту ва Украіне, запэўніўшы ў сваёй блізкасці да ўкраінскага народа і малітве за ахвяр насілля, членаў іх сем’яў і параненых.

Па прыкладзе Святога Айца звяртаемся з вялікай просьбай да ўсіх вернікаў Каталіцкага Касцёла ў Беларусі, каб нядзеля 23 лютага гг. стала Днём малітвы і посту ў інтэнцыі Украіны.

Заахвочваем, каб у гэты дзень ва ўсіх касцёлах і капліцах нашай краіны падчас святых Імшаў і эўхарыстычных набажэнстваў узносілася малітва за Украіну, каб усе бакі спынілі любыя акты насілля і шукалі згоды і міру.

Міласэрнаму Богу давяраем усіх ахвяраў гэтага канфлікту, а сем’і загінуўшых запэўніваем у малітоўнай памяці, выказваючы ім словы сардэчнага спачування.

19 лютага 2014 Святы Айцец Францішак прыняў наступныя кадравыя рашэнні ў Кангрэгацыі Усходніх Цэркваў:

- пацвердзіў Прэфекта Кангрэгацыі Яго Эмінэнцыю Кардынала Леанарда Сандры і Сакратара Кангрэгацыі Высокадастойнага Архібіскупа Кірыла Васіля, S.I.;

- прызначыў новых членаў Кангрэгацыі, сярод якіх і Уладыку Йосіфа Верта, Біскупа Епархіі Перамянення Гасподняга ў Навасібірску і Ардынарыя для грэка-католікаў у Расійскай Федэрацыі.

- пацвердзіў кансультараў Кангрэгацыі, сярод якіх Архімандрыта Сяргея Гаека, Апостальскага Візітатара для грэка-католікаў Беларусі, і мітрафорнага протаіерэя Васіля Гаверу, Апостальскага Дэлегата для грэка-католікаў у Казахстане і Сярэдняй Азіі.

З вялікай прыкрасцю сцвярджаю, што заклікі Цэркваў пра недапушчэнне кровапраліцця і мірнае ўрэгуляванне канфлікту не было пачута. У імя Божае асуджаю гвалт, неабачнасць і грэбаванне правамі чалавека і воляй народа. Падкрэсліваю, што той, хто мае ўладу, нясе ўсю паўнату адказнасці за тое, што адбываецца ў краіне.

Звяртаюся да ўсіх: неадкладна спыніце кровапраліцце!
Заклікаю ўсіх дзяцей Царквы да посту, малітвы і салідарнасці з пацярпелымі.
У гэты момант, калі над Украінай навісла бяда братазабойства, хай ва ўсіх храмах УГКЦ звоняць званы.

+ Святаслаў, Кіеў, 18.02.2014

Яго Святасць Папа Францішак заклікаў да мірнага заканчэння канфлікту ва Украіне.
“З глыбокай занепакоенасцю я сачу за тым, што адбываецца ў гэтыя дні ў Кіеве”, - прызнаўся Святы Айцец 19 лютага 2014 г. на заканчэнне агульнай аўдыенцыі, якая праходзіла на плошчы св. Пятра.

“Я запэўніваю ў маёй блізкасці да ўкраінскага народу і малюся за ахвяр насілля, членаў іх сем’яў і параненых.
Заклікаю ўсе бакі спыніць любыя акты насілля і шукаць згоды і міру ў краіне”, - сказаў Папа.

Рэакцыя Святога Айца паследавала пасля інфармацыі аб шматлікіх смяротных ахвярах супрацьстаяння ў Кіеве.
Гэта не першы за апошнія тыдні заклік Папы Францішка да мірнага вырашэння палітычнага крызісу і канфлікту ва Украіне.

Паводле Беларускай Праграмы Radio Vaticana