19 жніўня прыёр экуменічнай манаскай супольнасці Тэзэ брат Алоіс звярнуўся да беларусаў і запэўніў у малітве за беларускі народ.

Зварот брата Алоіса да беларусаў быў апублікаваны на партале супольнасці Тaize.fr.

«Дарагія беларускія сябры, з вялікаю ўвагаю мы ў Тэзэ сочым за навінамі з вашай ўзлюбленай краіны. Памятайце, што ў гэтую хвіліну мы вельмі блізкія з вамі. Мы ўзгадвалі пра вашу краіну падчас супольнай малітвы, і разам з маімі братамі я малюся за вас наступнымі словамі:

Уваскрослы Хрыстэ, Ты ведаеш нашы клопаты і выпрабаванні. І нястомна Ты кажаш нам: нічога не бойцеся, Я тут.

Прымас Польшчы арцыбіскуп Войцех Поляк у спецыяльным паведамленні, разасланым па парафіях Гнезненскай архідыяцэзіі, просіць у нядзелю 23 жніўня асаблівым чынам маліцца за Беларусь і беларусаў — «нашых сясцёр і братоў».

«Многія з нас у апошнія дні з увагаю сочаць за падзеямі ў Беларусі», — піша арцыбіскуп Поляк у паведамленні, змешчаным на партале Прымаса Prymaspolski.pl. Іерарх цытуе словы Папы Францішка з заклікам да спынення гвалту і павагі да справядівасці і права, сказаныя Святым Айцом падчас малітвы Анёл Панскі ў мінулую нядзелю.

Касцёл у Англіі і Уэльсе далучыўся да малітоўнай ініцыятывы ў падтрымку справядлівасці і міру ў Беларусі. 18 жніўня ў касцёлах Вялікабрытаніі людзі разам маліліся «Ойча наш» за беларускі народ.

Як паведаміла беларуская рэдакцыя парталу Vatican News, старшыня Камісіі па міжнародных справах Канферэнцыі Біскупаў Англіі і Уэльса біскуп Дэклан Ланг ад імя епіскапату заклікаў брытанскі ўрад да супрацоўніцтва з іншымі краінамі з мэтай вырашэння праблемы парушэння правоў чалавека ў Беларусі.

Увечары 18 жніўня па запрашэнні арцыбіскупа Тадэвуша Кандрусевіча ў Чырвоным касцёле на супольную малітву за Беларусь разам сабраліся прадстаўнікі розных хрысціянскіх канфесій, юдаізму і ісламу.

Малітва была прымеркавана да агульнаеўрапейскай акцыі малітоўнай салідарнасці з беларускім народам, якая праходзіла па ініцыятыве Еўрапейскай канферэнцыі каталіцкіх камісій па пытаннях справядлівасці і міру Iustitia et Pax.

Па дарозе ў касцёл святога Сымона і святой Алены арцыбіскуп Тадэвуш Кандрусевіч затрымаўся каля следчага ізалятара на вуліцы Валадарскага. Каля сцен старадаўняга астрога іерарх разам з сабранымі людзьмі, якія пратэстуюць супраць незаконных затрыманняў, памаліўся адну таямніцу святога Ружанца.

А 19-й гадзіне па мінскім часе, калі хрысціяне ўсёй Еўропы маліліся за Беларусь, сабраныя ў Чырвоным касцёле разам памаліліся «Ойча наш».

16 жніўня Канферэнцыя Рыма-каталіцкіх Біскупаў Украіны выказала словы падтрымкі і малітоўнай еднасці з беларускім народам.

У лісце на імя Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча каталіцкія іерархі братняй краіны пішуць:

«Рыма-Каталіцкі Касцёл ва Украіне яднаецца з беларускім народам і з усімі, хто шукае праўду, а таксама моліцца аб салідарнасці, або аб зразуменні чаканняў, за якія змагаюцца людзі. Да гэтага нас запрашае святы апостал Павел, які ў Пасланні да Галатаў заахвочвае вернікаў: „Насіце цяжары адзін аднаго“ (Гал 6, 2). Мы не можам застацца абыякавымі да лёсу пацярпелых толькі за тое, што яны жадаюць лепшага жыцця.

18 жніўня ў касцёле святога Сымона і святой Алены ў Мінску (Чырвоны касцёл) адбудзецца адмысловая малітва за беларускі народ, узяць удзел у якой арцыбіскуп Тадэвуш Кандрусевіч запрашае хрысціянаў розных канфесій, а таксама прадстаўнікоў юдаізма і іслама.

У гэты дзень па ініцыятыве Выканаўчага камітэта Еўрапейскай канферэнцыі каталіцкіх камісій па пытаннях справядлівасці і міру Iustitia et Pax хрысціяне Еўропы а 18-й гадзіне па сярэднееўрапейскім часе з’яднаюцца ў супольнай малітве «Ойча наш» за народ Беларусі.

Выканаўчы камітэт Еўрапейскай канферэнцыі каталіцкіх камісій па пытаннях справядлівасці і міру Iustitia et Pax выступіў са спецыяльнай заявай адносна цяперашняй сітуацыі ў Беларусі, заклікаўшы католікаў Еўропы аб’яднацца ў малітве за народ краіны.

Як паведаміла беларуская рэдакцыя парталу Vatican News, у заяве, падпісанай старшынёй выканаўчага камітэту біскупам Даўна і Конара Наэлем Трэанорам (Паўночная Ірландыя), у прыватнасці, сказана: «Мы рашуча асуджаем любыя формы насілля і прымяненне катаванняў з боку беларускіх уладаў супраць затрыманых дэманстрантаў. Мы таксама заклікаем неадкладна вызваліць усіх арыштаваных без аніякіх абгрунтаванняў».

16 жніўня ў гістарычным цэнтры Гродна разам сабраліся на малітве духавенства і вернікі хрысціянскіх Цэркваў: праваслаўныя, католікі, грэка-католікі, пратэстанты, прадстаўнікі евангельскай і юдэйскай рэлігійных супольнасцяў.

Як паведамляе партал Grodnensis.by, у гэты цяжкi для Бацькаўшчыны час яны ў адзін голас прасілі Бога за нашу краіну, якая нагадвае сёння ўзбуранае мора. Людзі маліліся за мірнае вырашэнне крызіснай сітуацыі і вызваленне нявінна затрыманых у Беларусі.

16 жніўня 2020 г., падчас сваёй традыцыйнай нядзельнай сустрэчы з вернікамі на малітве “Анёл Панскі” Пантыфік скіраваў адмысловы зварот, звязаны з сітуацыяй у Беларусі.

“Мае думкі кірую да дарагой Беларусі. З вялікай увагай сачу за сітуацыяй, якая склалася пасля выбараў у гэтай краіне. Заклікаю да дыялогу, спынення гвалту, паважання справядлівасці і права. Давяраю ўсіх беларусаў апецы Багародзіцы, Каралевы супакою”, - сказаў Папа Францішак.

Заклік Яго Блаславенства Святаслава да вернікаў Украінскай Грэка-Каталіцкай Царквы да малітвы за беларускі народ.

Дарагія ў Хрысце!

У гэтыя драматычныя дні, калі беларускі народ змагаецца за свае правы і свабоду, абараняючы сваё волевыяўленне, сацыяльную справядлівасць і ўласную годнасць, заклікаю сыноў і дачок Украінскай Грэка-Каталіцкай Царквы горача маліцца за спыненне гвалту над нявіннымі, за ўстанаўленне грамадскага парадку і разумення ў беларускім народзе, за мір і захаванне адзінства і цэласнасці беларускай дзяржавы.