Выканаўчы камітэт Еўрапейскай канферэнцыі каталіцкіх камісій па пытаннях справядлівасці і міру Iustitia et Pax выступіў са спецыяльнай заявай адносна цяперашняй сітуацыі ў Беларусі, заклікаўшы католікаў Еўропы аб’яднацца ў малітве за народ краіны.

Як паведаміла беларуская рэдакцыя парталу Vatican News, у заяве, падпісанай старшынёй выканаўчага камітэту біскупам Даўна і Конара Наэлем Трэанорам (Паўночная Ірландыя), у прыватнасці, сказана: «Мы рашуча асуджаем любыя формы насілля і прымяненне катаванняў з боку беларускіх уладаў супраць затрыманых дэманстрантаў. Мы таксама заклікаем неадкладна вызваліць усіх арыштаваных без аніякіх абгрунтаванняў».

Еўрапейскі камітэт закліклікае далучыцца да малітвы «Ойча наш» за беларускі народ у аўторак 18 жніўня ў 18.00 па цэнтральна-еўрапейскім летнім часе (у 19.00 па мінскім), каб «перамаглі праўда, справядлівасць і мір».

Да беларускіх уладаў скіраваны заклік «прытрымлівацца дэмакратычных прынцыпаў і ў поўнай меры паважаць правы чалавека, уключна з правам на жыццё, свабоду сходаў, прэсы і выказвання меркаванняў».

У заяве апісваецца сітуацыя, якая склалася ў Беларусі пасля прэзідэнцкіх выбараў 9 жніўня і ў выніку непрапарцыйнага насілля, з якім улады спрабавалі здушыць грамадскія пратэсты супраць фальсіфікацый і маніпуляцый.

Еўрапейскі камітэт Iustitia et Pax далучаецца да каталіцкіх біскупаў Беларусі ў іх закліку шукаць праўду, заснаваную на мірным і ўсеагульным дыялогу паміж беларускімі палітычнымі лідарамі і грамадствам у цэлым, каб пазбегнуць далейшага насілля.