У суботу 12 сакавіка 2011 г., у парафіі Маці Божай Нястомнай Дапамогі адбылася Малітва за спачын душы украінскага паэта і грамадзкага дзеяча, класіка украінскай літаратуры Тараса Рыгоравіча Шаўчэнкі.
Заўпакойная Боская Літургія і чын паніхіды (на ўкраінскай мове) былі адслужаныя з нагоды 150-годдзя з дня сьмерці ўкраінскага Кабзара.
“Тарас Шаўчэнка заўсёды быў блізкі сэрцу беларусаў, а прарочы дух Шаўчэнкі клікаў да прабуджання ва украінскім народзе грамадскіх і асабістых цнотаў ” – адзначыў протапрэзьбітар Яўген Усошын у кароткім слове напрыканцы Службы.

Беларуская Грэка-каталіцкая Царква адзначае 100-годдзе з дня нараджэньня выдатнага грэка-каталіцкага сьвятара, духовага настаўніка, педагога, дасьледчыка гісторыі - архім. Льва Гарошкі.

“Архімандрыт Леў Гарошка – ягонае жыцьцё і пастырская дзейнасьць” - гэта тема дакладу, які ў сотую гадавіну нараджэньня Архімандрыта – 11 сакавіка 2011 г., у рамках штомесячных катэхітычных сустрэчаў грэка-каталіцкага Клуба інтэлігенцыі імя Кірылы Тураўскага, што праходзяць у Душпастырскім цэнтры сьвятога Язэпа (вул. Арджанікідзе д. 6) прачытае вядомы беларускі дасьледчык гісторыі д-р Юрась Гарбінскі.
Пачатак а 19:00 гадз.

ЗАПРАШАЕМ!

Грэка-каталіцкія парафіі г. Мінска пачынаюць Вялікі Пост 2011 г. паводле наступнага раскладу:

Парафія Праведнага Язэпа і Парафія сьвятога Міколы Цудатворцы
ў капліцы Душпастырскага Цэнтра сьвятога Язэпа
(вул.Арджанікідзэ, 6; ст.метро «Аўтазаводская»)

7 сакавіка 2011 г., Панядзелак, Пачатак Вялікага Посту
18:30 — Павячэрніца з Пакаянным канонам сьв. Андрэя Крыцкага

10 сакавіка 2011 г., Чацьвер першага тыдня Вялікага Посту
18:30 — Павячэрніца з Пакаянным канонам сьв. Андрэя Крыцкага

З нагоды святкаваньня памяці сьвятога Казіміра, якое ў Вільні працягваецца некалькі дзён, група беларускіх грэка-католікаў, з блаславеньня а. Протапрэзьбітара Яўгена Ўсошына, зьдзейсьніла ў нядзелю 6 сакавіка пілігрымку ў Вільню.

Грэка-католікі далучыліся да шматлікай групы пілігрымаў, якую арганізавала служба «Христианский паломник», што дзейнічае пры мінскім касьцёле сьвв. Сымона і Алены.
Сярод пілігрымаў быў мінскі міжпарафіяльны хор “ПРАСФАРА” а духоўную апеку над усімі пілігрымамі нёс а. Андрэй Крот – грэка-каталіцкі душпастыр з Горадні.
Ад імя пілігрымаў выказваем шчырую ўдзячнасьць Пасольству Літоўскай Рэспублікі ў Мінску за прадастаўленыя пілігрымам бясплатныя візы.

Хрысьціяне візантыйскай традыцыі – грэка-католікі і праваслаўныя – пачынаюць сёлета Вялікі Пост у панядзелак, 7 сакавіка.

У гэтым годзе ўсе хрысьціяне сьвяткуюць сьвята Пасхі Хрыстовай у адзін дзень – 24 красавіка.
Традыцыйна гэтай радаснай падзеі папярэднічае саракадзённы Вялікі Пост, які прыгадвае нам саракадзённае перабываньне Госпана і Збаўцы нашага Ісуса Хрыста ў пустыні ды рыхтуе нас праз пакаяньне да прыняцьця радаснай весткі пра Ўваскрасеньне.

Усе хрысьціяне візантыйскай літургічнай традыцыі – грэка-католікі і праваслаўныя – пачынаюць сёлета Вялікі Пост разам, у панядзелак, 7 сакавіка.

Паводле літургічнай традыцыі першыя чатыры дні Вялікага Посту вернікі зьбіраюцца ўвечары ў храме, каб разам маліцца Вялікі пакаянны канон сьв. Андрэя Крыцкага.

(Тэкст канона на кожны дзень можна знайсьці на старонках ЧАСАСЛОЎЦА па спасылцы: http://www.chasaslovec.info/index.php?do=category=post_tr)

Ужо больш за 100 год у першую пятніцу сакавіка адзначаецца «Сусветны дзень малітвы». Рух жанчын-хрысціянак розных канфесій у гэты дзень моліцца аб надзённых патрэбах усяго свету.

Тэксты супольнай малітвы для ўсіх удзельніц руху (жанчыны са звыш 170 краін свету) пішуць прадстаўніцы пэўнай краіны. Сёлета над тэкстамі працавалі хрысціянкі Чылі, якія абралі для разважанняў урывак з Евангелля паводле Марка (пар. Мк 6, 30–44).
Сам загаловак — «Колькі ў вас хлябоў?» — указвае на перавагу сацыяльнай тэматыкі, пытанняў экалогіі, глабалізацыі, салідарнасці з прыгнечанымі і грамадскай справядлівасці.

Паводле Catholic.by

Святы Казімір з’яўляецца асабліва шанаваным у Літве, Беларусі і Польшчы як апякун моладзі.
Памёр ён 4 сакавіка 1484 г. у Гродне а яго рэліквіі знаходзяцца ў віленскай катэдры.

3 сакавіка 2011 г. Апостальскі Візітатар БГКЦ Архімандрыт Сяргей (Гаек) адслужыў Боскую Літургію ў капліцы Цэнтра св. Язэпа ў Мінску, на якой вернікі, а асабліва панамары, маліліся за беларускую моладзь, за узрастанне ў веры і любові да Царквы і Бацькаўшчыны.

Беларуская Грэка-каталіцкая Царква адзначае 100-годдзе з дня нараджэньня выдатнага беларускага патрыёта, грэка-каталіцкага сьвятара, духовага настаўніка, культурна-асьветніцкага дзеяча, педагога, дасьледчыка гісторыі.

Ніжэй зьмяшчаем ягоную кароткую біяграфію.

10 лютага на прэс-канферэнцыі ў Кіеве Яго Блаславенства Любамір (Гузар) паведаміў пра тое, што ў гэты дзень Яго Святасць Папа Бенядыкт XVI прыняў ягонае адрачэнне ад пасаду Вярхоўнага Архібіскупа Украінскай Грэка-Каталіцкай Царквы. Адпаведную просьбу да Святога Айца Першаярарх УГКЦ падаў, калі яму споўнілася 75 гадоў.

«Сёння, калі я ўжо не маю дастаткова сілаў, хачу перадаць пасад свайму наступніку, які працягне гэтую справу больш эфектыўна. Бо гэта не мая праца і я не з’яўляюся ключом. Ключом ёсць Царква, а мэта нашай працы – служэнне Царкве, і мы страемся яго выконваць да таго моманту, пакуль можам гэта рабіць эфектыўна», – тлумачыць сваё рашэнне Вярхоўны Архібіскуп Любамір.

10 лютага 2011 г. Святы Айцец Бенядыкт XVI, згодна з канонам 126 § 2 Кодэкса канонаў Усходніх Цэркваў, прынял просьбу Першаіерарха Украінскай Грэка-Каталіцкай Царквы, Яго Блаславенства кардынала Любаміра (Гузара) і звольніў яго з пасаду Вярхоўнага Архібіскупа Кіева-Галіцкага.

Згодна з царкоўным заканадаўствам Адміністратарам Вярхоўнага Архібіскупства Кіева-Галіцкага стаў Архібіскуп Львоўскі Уладыка Ігар (Возняк).
Ён з’яўляецца адказным за скліканне Сіноду Біскупаў Украінскай Грэка-Каталіцкай Царквы для абрання новага Вярхоўнага Архібіскупа.