11 верасня 2016 г. у Дэнверы (ЗША) адышоў у вечнасць святой памяці Юры Хадыка -  вернік мінскай парафіі Праведнага Язэпа (ад самага пачатку адраджэння парафіі), доктар фізыка-матэматычных навук (1976), прафесар (1976), даследчык гісторыі беларускага мастацтва (асабліва ўніяцкага іканапісу).

Развітанне з памерлым і царкоўнае адпяванне паводле ўніяцкага абраду адбудзецца ў ЗША.

У пятніцу, 16 верасня 2016 г. а 19:00 гадз., у капліцы грэка-каталіцкага душпастырскага цэнтра Праведнага Язэпа ў Мінску (вул. Арджанікідзе, д. 6; метро “Аўтазаводская”) будзе адслужаная заўпакойная Літургія з паніхідай за супакой душы спачылага Юрыя Хадыкі.

Міністр замежных спраў Беларусі Уладзімір Макей 30 жніўня правёў сустрэчу з Апостальскім Нунцыем у Беларусі арцыбіскупам Габарам Пінтэрам з нагоды ўручэння ім копій даверчых грамат. Пра гэта паведамляе прэс-служба Міністэрства замежных спраў Беларусі. 

Падчас сустрэчы бакі абмеркавалі актуальныя пытанні і асноўныя напрамкі беларуска-ватыканскага супрацоўніцтва.

Паводле mfa.gov.by (MV), Catholic.by, Фота mfa.gov.by

У Полацку два грэка-каталіцкія дыяканы былі пастаўленыя ў святары.

У Полацку, у грэка-каталіцкім храме Вялебнай Параскевы Полацкай, у нядзелю 21 жніўня 2016 г. святары і вернікі Беларускай Грэка-Каталіцкай Царквы прымалі высокага госця – Дастойнага Уладыку Ніла (Лушчака), дапаможнага біскупа Мукачаўскай грэка-каталіцкай епархіі, у якой асабліва жывая традыцыя місіі святых Кірыла і Мятода.

Уладыка ўдзельнічаў у багаслужэнні, у рамках якога вернікі дзякавалі Богу за місійны подзвіг святых Апосталаў Славянаў Кірыла і Мятода і ўзгадвалі "евангелізацыйны" подзвіг Палаччаніна - Францішка Скарыны. На святочную Боскую Літургію прыехалі таксама вернікі з Івацэвічаў, Брэста, Мінска і Віцебска.

Дастойны Уладыка Ніл (Лушчак), дапаможны біскуп Мукачаўскай грэка-каталіцкай епархіі (Русінская грэка-каталіцкая Царква), прыбыў з Ужгороду на штогадовыя ўрачыстасці ў гонар Браслаўскай Маці Божай.

У суботу, 20 жніўня 2016 г. увечары, ён сустрэўся з Біскупам Віцебскім Дастойным Уладыкам Алегам Буткевічам і разам з беларускімі грэка-каталіцкімі святарамі і вернікамі праспяваў Акафіст у гонар Найсвяцейшай Багародзіцы перад Яе цудадзейнай Браслаўскай Іконай.

“Маліцца перад Браслаўскай Іконай Багародзіцы, асабліва спяваць Акафіст – гэта вялікая ласка і радасць. Мы працягваем традыцую нашых прадзедаў (лепш сказаць праайцоў у веры), якія прасілі Багародзіцу аб дар моцнай веру ды вернасці Каталіцкай Царкве” – сказаў пілігрым Андрэй.

18 жніўня ў Беларусь прыбыў новы Апостальскі Нунцый арцыбіскуп Габар Пінтэр. Самалёт з іерархам на борце прызямліўся ў Нацыянальным аэрапорце «Мінск» удзень.  

Прывітаць Апостальскага Нунцыя ў залу чакання прыбылі ўсе члены Канферэнцыі Каталіцкіх Біскупаў у Беларусі на чале з яе Старшынёй Мітрапалітам Мінска-Магілёўскім арцыбіскупам Тадэвушам Кандрусевічам.

«Я вельмі рады ступіць нарэшце на беларускую зямлю. Было вельмі цікава назіраць з самалёта, якая ж прыгожая краіна Беларусь! У многім яна нагадала мне пра Венгрыю — так шмат палёў таксама і ў маёй краіне, — сказаў прадстаўнік Папы. — На гэты момант я на 100 працэнтаў гатовы да працы на карысць Касцёла ў Беларусі, для вашай краіны і для людзей у ёй. Але гэта не толькі заданне — гэта яшчэ і радасць для мяне». 

Кніга-інтэрв’ю Папы Францішка “Імя Бога – Міласэрнасць” (Il nome di Dio è Misericordia) з’явілася па-беларуску. 

Ініцыятарам выдання выступілі: Віцебская дыяцэзія – менавіта ёй Ватыканскае выдавецтва і італьянскае выдавецтва “Piemme” перадалі правы на беларускі пераклад, – Грэка-каталіцкая парафія святамучаніка Язафата ў Полацку (адказны за выпуск а. Аляксандр Шаўцоў, рэдактар выдання а. Андрэй Буйніч) і Беларуская рэдакцыя Ватыканскага радыё. Пераклаў кнігу з італьянскай мовы супрацоўнік Беларускай рэдакцыі Аляксандр Панчанка. Кніга выйшла ў выдавецтве “Медысонт” у Мінску накладам 950 асобнікаў. 

Падтрамаў выданне кнігі-інтэрв’ю Папскі фонд “Дапамога Касцёлу ў патрэбе”. 

Напрыканцы Успенскага Посту, у рамках Юбілейнага Году Міласэрнасці, прапануем чытачам запіс Папы Францішка ў "Твітэры" на тэму споведзі. 

“У споведзі мы сустракаем міласэрныя абдымкі Айца. Яго любоў нас прабачае заўсёды”, - нагадаў папа Францішак 12 жніўня 2016 г. праз свой профіль у сацыяльнай сетцы “Twitter”. Тэма споведзі вельмі блізкая Святому Айцу і ён часта заахвочвае вернікаў рэгулярна прыступаць да гэтага сакрамэнту. 

У інтэрв’ю італьянскаму ватыканісту Андрэа Тарніелі, якое была апублікавана асобнай кнігай пад назвай “Імя Бога – Міласэрнасць”, Святы Айцец адзначаў, што грэх – гэта не проста пляма, якую можна змыць, як у “хімчысцы”, але “рана, якую трэба даглядаць, лячыць”. 

8-га жніўня 2016 г., у 19:00 гадз.

у грэка-каталіцкім Душпастырскім цэнтры Праведнага Язэпа (вул. Арджанікідзе, д. 6, ст. метро “Аўтазаводская”)

пройдзе прэзентацыя багаслужбовага выдання

ПСАЛТЫРА

ў перакладзе а. Аляксандра Надсана.

Прэзэнтацыя прыўрочана да 90-х угодкаў ягоных народзінаў.

гадз. 19:00 Боская Літургія і Паніхіда

гадз. 19:45 Прэзэнтацыя юбілейнага выдання

З А П Р А Ш А Е М

Частка вернікаў прыбыла ў VII пешай пілігрымцы з Гродна. Наведаць месца пакарання прыйшлі таксама вернікі з Новай Мышы (Пінская дыяцэзія). На малітве сабраліся і манахіні Кангрэгацыі Сясцёр Найсвяцейшай Сям’і з Назарэта, удзячныя сваім папярэдніцам за гераічнае складанне жыцця на алтары ў інтэнцыі сем’яў.