Парафіяльнае свята і адначасова 25-годдзе свайго існавання святкавала ў Нядзелю Тамаша 3 красавіка 2016 г. маладэчанская грэка-каталіцкая парафія Хрыста Чалавекалюбцы. Свята сабрала ў парафіяльнай капліцы вернікаў і гасцей з розных гарадоў Беларусі. Святую Літургію служылі а. Андрэй Крот з Гродна, а. Яўген Усошын, протапрэсвітар Цэнтральнага дэканату БГКЦ, і а. Зміцер Чарнель, рэдэмптарыст. Службу суправаджаў спевам міжпарафіяльны хор з Менску "Прасфара". Сваё блаславенне з нагоды юбілею парафіі для святароў і вернікаў перадаў прэфект Кангрэгацыі ўсходніх цэркваў кардынал Леанарда Сандры.

Нядзеля пасля Пасхі - "Нядзеля Божай Міласэрнасці", якая сярод беларускіх грэка-католікаў традыцыйна адзначаецца як свята Хрыста Чалавекалюбца, заканчвае 9 дзён (навену) малітвы за Беларусь.

 

Гэта навена пачалася ў Вялікую Пятніцу 25 сакавіка 2016 г. - у гэтым годзе свята Дабравешчання Багародзіцы.

 

У Нядзелю Божай Міласэрнасці ў грэка-каталіцкіх парафіях урачыста чытаецца "Малітва за Беларусь" - аўтарства архімандрыта Льва Гарошкі.

“Платформай” малітвы, роздуму і дыскусій назваў архімандрыт Сяргей Гаек Еўрапейскі апостальскі кангрэс Божай Міласэрнасці – пяцідзённы форум, які пачаўся ў Рыме 31 сакавіка 2016 г. Апостальскі візітатар для грэка-католікаў Беларусі прысутнічае на ім у якасці дэлегата ад Беларусі.

 

Ён заўважыў, што слова “апостальскі” ў яго назве не выпадковае. “Еўрапейскі кангрэс Божай Міласэрнасці названы апостальскім, таму што спасылаецца непасрэдна на апостальства і душпастырскае служэнне – менш тэалогіі, а больш досведу і сведчанняў. Ён праходзіць у Год Божай Міласэрнасці, таму мае вельмі асаблівае значэнне. У ім прымаюць удзел аніматары, людзі захопленыя пашырэннем пабожнасці, натхненнем для якой з’яўляецца Божая міласэрнасць; і не толькі пабожнасці, але і розных сацыяльных ініцыятыў, асабліва на ўскраінах сацыяльнага жыцця”, - сказаў удзельнік Кангрэсу.

У чацвер, 31 сакавіка 2016 г. у Рыме пачаўся Еўрапейскі апостальскі кангрэс Божай Міласэнасці. Форум працягнецца да 4 красавіка. 

 

Кангрэс называецца "апостальскі" - гэта азначае, што адносіцца да апостальства - розных формаў душпастырства.

 

У Кангрэсе прыме ўдзел Папа Францішак: 2 красавіка Ён будзе прысутнічаць на малітоўным чуванні з нагоды чарговай гадавіны смерці св. Яна Паўла ІІ, а на наступны дзень, у Нядзелю Божай Міласэрнасці, узначаліць Эўхарыстыю на галоўнай ватыканскай плошчы.

 

Уступную духоўную канферэнцыю на Кангрэсе правёў кардынаў Крыстаф Шонборн, арцыбіскуп Венскі і старшыня Камітэту Сусветных кангрэсаў Божай Міласэрнасці.

Апостальская Пэнітэнцыярыя праводзіць канферэнцыю, прысвечаную буле папы Францішка “Misericordiae Vultus”, якой быў абвешчаны Год Міласэрнасці. Двухдзённы форум пачаўся ў Рыме 31 сакавіка 2016 г. У першую чаргу, ён адрасаваны святарам, законнікам і законніцам, навучэнцам тэалагічных факультэтаў, душпастырскім супрацоўнікам і свецкім вернікам, якія прымаюць актыўны удзел у парафіяльным жыцці, сказаў Ватыканскаму радыё кс. Кшыштаф Ныкель, рэгент Пэнітэнцыярыі.

 

Падчас канферэнцыі падкрэслівалася, што міласэрнасць “гэта рака, якая спрадвеку і няспынна арашае ўсё поле Касцёла, а праз яго, увесь свет”. Галоўнае пасланне булы ў тым, што міласэрнасць – гэта сэрца Евангелля. Менавіта таму Касцёл павінен несці яе людзям, нагадаў святар.

Францішак: “Імя Бога – Міласэрнасць”.

 

У кнізе “Імя Бога – Міласэрнасць” Папа рымскі Францішак у простых і непасрэдных словах звяртаецца да кожнага чалавека, будуючы з ім асабісты, братэрскі дыялог.

 

На кожнай старонцы гэтай кнігі адчуваецца яго прагненне дайсці да ўсіх. Папа з любоўю адносіцца да людзей, якія дазналі крыўды і адвярнуліся ад Царквы, разарвалі сувязь з Богам. Таксама, нагадвае, што кожны, нават Папа, мае патрэбу ў Божай Міласэрнасці, таму што з’яўляецца грэшнікам. Ніхто не можа устанавіць межаў Міласэрнасці Бога, які прабачае.

 

Састарэлі і сцёрліся сёння такія словы, як узаемнае паразуменне, спачуванне і міласэрнасць. Спрабуе асвяжыць іх Папа Францішак.

Пасха Госпада нашага і Збавіцеля Ісуса Хрыста.

 

Святая Царква вяла нас праз вечар Вялікага Чацвярга, Вялікую Пятніцу і Пасхальную Ноч да светлага Уваскрасення Гасподняга. Вялікую Пятніцу ў гэтым годзе грэка-католікі спалучалі і Дабравешчанне і вечар пахавання Госпада нашага Ісуса Хрыста.

 

Пасха дае нам дар міру, прымірэння, веры, надзеі, любові.

Грэка-католікі традыцыйна моляцца за Беларусь

 

У гэтым годзе ўрачысты ўспамін Хрыстовых пакутаў і смерці ў Вялікую Пятніцу супадае ў календары са святкаваннем Дабравешчання Багародзіцы. (У візантыйскай літургічнай традыцыі ў такім выпадку свята Дабравешчання не пераносіцца).

 

Яго Святасць Папа Францішак напісаў у буле Misericordiae Vultus, што Багародзіца, якая праз ”найвышэйшы акт прабачэння таго, хто Хрыста ўкрыжаваў, паказвае нам, як далёка можа сягаць Божая Міласэрнасць. Дзева Марыя пацвярджае, што міласэрнасць Божага Сына не ведае межаў і даходзіць да ўсіх без выключэння”.

Расклад грэка-каталіцкіх пасхальных службаў у Мінску

Парафія Праведнага Язэпа і Парафія святога Міколы Цудатворцы
(ў капліцы Душпастырскага Цэнтра святога Язэпа: 
вул. Арджанікідзэ д. 6, ст. метро «Аўтазаводская»)

ВЯЛІКІ ЧАЦВЕР – 24.03.2016
гадз. 18:30 – Вячэрня з Літургіяй св. Васіля Вял. 
і Ютрань 12-ці Евангелляў Мукаў Хрыстовых, Споведзь

ДАБРАВЕШЧАННЕ БАГАРОДЗІЦЫ - ВЯЛІКАЯ ПЯТНІЦА – 25.03.2016
СЛУЖБА ў ЧЫРВОНЫМ КАСЦЁЛЕ – ніжні храм (для ўсіх парафій г. Мінска)

гадз. 18:30 – Вячэрня з Літургіяй св. Яна Залатавуснага

Вынос Плашчаніцы і Ерусалімская Ютрань Пахавання Гасподняга, Споведзь

ВЯЛІКАЯ СУБОТА – 26.03.2016
гадз. 10.00 – Вячэрня з Літургіяй св. Васіля Вял. Асвячэнне велікодных страваў

Пасхальныя святкаванні сёлета з’яўляюцца асаблівымі для Царквы Хрыстовай. Яны праходзяць у рамках Году Божай Міласэрнасці, які быў абвешчаны Святым Айцом Францішкам. Як адзначаў ягоны папярэднік святы папа Ян Павел ІІ, «Пасхальны містэрыум гэта найвышэйшая кропка… у якой міласэрнасць становіцца рэальнасцю». Смерць і ўваскрасенне Ісуса Хрыста з’яўляюцца найвышэйшымі з магчымых праяваў Божай Міласэрнасці, выяўленай да чалавека.

Любоў Божая, якая праявілася ў тым, што Ён не пашкадаваў свайго Сына для збаўлення людзей, дазваляе чалавеку паверыць у прысутнасць любові ў свеце, паверыць у яе магутнасць. Паверыць у міласэрнасць і адкрыць глыбокі, праўдзівы сэнс любові,міласэрнасці і салідарнасці ў адносінах між людзьмі, між народамі, між Цэрквамі.

У гэтай пасхальнай перспектыве Божай Міласэрнасці беларускія грэка-католікі далучаюцца да словаў Дэкларацыі, якую ў лютым падпісалі ў Гаване Папа Францішак і Патрыярх Кірыл: «Прыносім падзяку славімаму ў Тройцы Богу за гэтую сустрэчу». Абдымкі высокіх першаіерархаў – гэта каштоўны знак сапраўднага братэрства ў Хрысце.