10 красавіка 2024 г. у канцы агульнай аўдыенцыі Папа Францішак прывітаў тысячы пілігрымаў, якія сабраліся на плошчы Святога Пятра і заклікаў іх «не забывацца на братоў і сёстраў, якія так шмат пакутуюць з-за канфліктаў». 

Папа выказаў так сама спачуванне жыхарам Казахстана, якія пацярпелі ад наймацнейшай за апошнія 70 гадоў паводкі, выкліканай раннім раставаннем снегу. У выніку затаплення каля 90 тысяч жыхароў былі вымушаны эвакуіравацца. “Мы молімся за тых, хто пакутуе ад наступстваў гэтага стыхійнага бедства”, – сказаў Папа.

Езус не тлумачыў пакуты, а схіляўся над пакутуючымі, прагнуў не толькі аздараўлення цела, але і сэрца чалавека, - нагадаў Папа 11 красавіка 2024 года падчас аўдыенцыі для членаў Папскай біблійнай камісіі.

Пантыфік адзначыў актуальнасць тэмы асамблеі гэтай ватыканскай структуры: Хвароба і пакуты ў Бібліі, падкрэсліваючы, што яна тычыцца кожнага чалавека, бо цярпенні, абмежаванні і канчатковасць жыцця ўпісаны ў “параненую чалавечую прыроду”.

У Нядзелю Тамаша - 7 красавіка 2024 года грэка-каталіцкая парафія Хрыста Чалавекалюбца ў Маладзечне адсвяткавала парафіяльнае свята. 

Перад іконай Міласэрнага Хрыста Чалавекалюбца вернікі маліліся за ўсіх парафіянаў - прысутных і адсутных - і за ўсіх жыхароў горада Маладзечна ды наваколля; узгадалі блаславёнага Міхала Сапоцьку, які нарадзіўся ў недалёкай вёсцы Юшаўшчына (побач Забрэззя). 

У панядзелак, 8 красавіка 2024 г., Папа Францішак прызначыў айца Петка Валава біскупам епархіі  «Св. Яна XXIII» для католікаў візантыйскага абраду ў Балгарыі.

Уладыка-элект Петка Валаў нарадзіўся 8 студзеня 1966 года ў Сафіі. Духоўную фармацыю праходзіў у Грэцкай калегіі ў Рыме, курсы тэалогіі слухаў у Папскім Грыгарыянскім універсітэце і ў Папскай Альфонсіянскай акадэміі, дзе атрымаў ступень ліцэнцыята маральнай тэалогіі. 

Прэзбітэрскае пасвячэнне атрымаў 11 кастрычніка 1997 г. для епархіі "Св. Ян XXIII". З 1999 г. быў пробашчам парафіі «Успення Багародзіцы» ў м. Нова-Дэлчава, з 2009 канцлер епархіі, з 2020 г. сакратар Балгарскай між-абрадовай канферэнцыі біскупаў.

"На многия леты!"

6 красавіка 2024 г. у Хрысціянскім Сацыяльным Цэнтры ў Мінску - пры дабрачыннай Місіі Добрага Самараніна  адбылася малітва праслаўлення, у якой узяла ўдзел вялікая колькасць дзяцей і іх бацькоў. 

Дзіцячыя музычныя гурты, ансамблі ды хоры прыехалі ў Хрысціянскі сацыяльны центр, каб разам спяваць і маліцца, просячы аб Божай Міласэрнасці для ўсяго свету. 

У духоўным фэстывалі ўдзельнічаў і грэка-каталіцкі хор Херувімчыкі з Мінску.

8 красавіка ў Ватыкане быў абнародаваны дакумент Дыкастэрыі веравучэння Dignitas infinita, які ўтрымлівае папскае вучэнне апошняга дзесяцігоддзя.

Як адзначае ў аглядзе новага дакумента Беларуская рэдакцыя парталу Vatican News, у тэксце закранаюцца тэмы ад вайны да беднасці, ад насілля ў дачыненні да мігрантаў да насілля ў адносінах да жанчын, ад абортаў да сурагатнага мацярынства і эўтаназіі, ад гендарнай тэорыі да лічбавага насілля.

4 красавіка ў Мінску ўрачыста адзначылі 55-годдзе Мітрапаліта Мінска-Магілёўскага арцыбіскупа Юзафа Станеўскага.

Павіншаваць іерарха ў дзень нараджэння, які, па яго ўласных словах, найчасцей выпадае ў Вялікі пост, а сёлета прыпаў у Актаву Пасхі, на ўрачыстай святой Імшы ў катэдральным касцёле Найсвяцейшага Імя Марыі сабраліся шматлікія духоўныя, кансэкраваныя асобы і свецкія вернікі, у тым ліку і родныя арцыбіскупа. Сярод удзельнікаў Эўхарыстыі былі Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч, біскуп Гродзенскі Аляксандр Кашкевіч, чыім найбліжэйшым супрацоўнікам шмат гадоў быў арцыбіскуп Станеўскі, папярэднік арцыпастыра на Мінска-Магілёўскай катэдры арцыбіскуп эмэрыт Тадэвуш Кандрусевіч, Генеральныя вікарыі Мінска-Магілёўскай архідыяцэзіі біскупы Юрый Касабуцкі і Аляксандр Яшэўскі SDB, а таксама Апостальскі адміністратар для грэка-католікаў у Беларусі архімандрыт Сяргей Гаек. Апостальскага нунцыя ў Беларусі арцыбіскупа Антэ Ёзіча на цэлебрацыі прадстаўляў сакратар Апостальскай нунцыятуры ў Мінску ксёндз Кшыштаф Сэрока. Імшу канцэлебравалі некалькі дзясяткаў святароў з розных мясцін, якія прадстаўлялі ўсе дыяцэзіі Беларусі. Сярод іх былі таксама кіраўнікі розных касцёльных структур.

Сёння, 5 красавіка 2024 года, Яго Святасць Папа Францішак прызначыў Ксяндза Уладзіміра Гуляя, да гэтага часу Пробашча Парафіі Узвышэння Святога Крыжа ў г. Ліда Гродзенскай дыяцэзіі і Біскупскага вікарыя душпастырства для Лідскага рэгіёна, Біскупам-Каад’ютарам гэтай жа Дыяцэзіі.

Вышэйзгаданае рашэнне будзе апублікавана сёння, 5 красавіка 2024 года, ў Рыме а 12:00. Апостальская Нунцыятура віншуе новага Біскупа-Каад’ютара з новай касцёльнай пасадай у Гродзенскай дыяцэзіі і даручае яго біскупскае служэнне Беззаганнай Маці Божай.

3 красавіка ў Хрысціянскім сацыяльным цэнтры ў Мінску адкрылася выстава, прысвечаная выдатным каталіцкім святарам ХХ стагоддзя. Яе мэта — узгадаць тых асоб, хто ў свой час усе свае сілы і намаганні прыклалі дзеля таго, каб Божая слова гучала ў Беларусі на роднай мове.

На пачатку да сабраных звярнуўся ксёндз Аляксандр Шамрыцкі, духоўны апякун сацыяльнага центру. Вітаючы прысутных, асаблівым чынам ён прывітаў старшыню Канферэнцыі Біскупаў на Беларусі біскупа Алега Буткевіча, арцыбіскупа эмэрыта Тадэвуша Кандрусевіча і Апостальскага адміністратара для грэка-католікаў у Беларусі архімандрыта Сяргея Гаека.

Усяленскі Патрыярх Варфаламей працягвае намаганні, каб усе хрысціяне святкавалі Вялікдзень у адзін дзень. У мінулую нядзелю ганаровы кіраўнік Праваслаўнай Царквы накіраваў самыя цёплыя віншаванні ўсім цэрквам-сёстрам, якія ўжо святкуюць Вялікдзень, паведаміў 2 красавіка сайт Венскага экуменічнага фонду «Pro Oriente». У той жа час Варфаламей у сваім пасланні заявіў, што раздзельнае святкаванне галоўнай хрысціянскай падзеі Уваскрасення Гасподняга з'яўляецца «скандалам».

У гэтым годзе праваслаўныя святкуюць Вялікдзень 5 мая. У наступным годзе святкаванні Вялікадня ва Усходніх і Заходняй Цэрквах прыпадае на адзін дзень — 20 красавіка. Патрыярх падкрэсліў, што шчыра спадзяецца і моліцца, каб гэтае сумеснае святкаванне ў наступным годзе было не выпадковай разавай падзеяй, а пачатковай іскрай для далейшых старанняў па аб'яднанні даты Вялікадня.