З 28 снежня б. г. па 1 студзеня 2012 г. на тэрыторыі 160 берлінскіх парафій (розных хрысціянскіх канфесій) праходзяць сумесныя малітвы, семінары, разважанні на разнастайныя сацыяльныя і духоўныя тэмы, у якіх прымае ўдзел моладзь з розных краін Еўропы, у тым ліку з Беларусі, Украіны, Расіі і іншых краінаў СНД.

Міжнародная сустрэча моладзі пад эгідай Супольнасці Тэзэ ўпершыню праходзіць у аб’яднаным Берліне. У 1986 г. падобная сустрэча была арганізавана ва Ўсходнім Берліне. Улады ГДР дазволілі яе правесці пры ўмове, што “ніхто не прыдзе з Захаду”. Тады ў Сустрэчы прынялі ўдзел 6 тысяч чалавек.

У гэтым годзе Сабор (гр. synaxis) Найсвяцейшай Багародзіцы і Памяць Праведнага Язэпа святкаваліся ў той самы дзень – 26 снежня. Такім чынам свята нашай парафіі мела асаблівы характар.

Боскую Літургію ўзначаліў Архімандрыт Сяргей, Апостальскі Візітатар БГКЦ, у саслужэнні душпастыраў мінскіх грэка-каталіцкіх парафіяў: протапрэзбітара Яўгена Усошына, ераманаха Пахомія (Кавалёва) ды а. Аляксандра Шыбекі. Асаблівым госцям Свята быў ераманах ЛявонціЙ (Тумоўскі), актуальна дактарант у Рыме. Ён жа прамовіў святочнае казанне.

Грэка-каталіцкая парафія адзначае 20 год аднаўлення адкрытай душпастырскай дзейнасці.

25 снежня 2011, у першы дзень Свята Раства Хрыстовага, Боскую Літургію ў парафіяльным храме Хрыста Чалавекалюбцы ў Маладзечне адслужыў Апостальскі Візітатар БГКЦ Архімандрыт Сяргей (Гаек). Пасля Літургіі Архімандрыт раздзяліў святочную прасфору з парафіянамі. Гэта была служба падзякі Богу за 20-годдзе аднаўлення душпастырскай дзейнасці Маладзечанскай грэка-каталіцкай парафіі.

У рамках падрыхтоўкі да Юбілею ў нядзелю - 18 снежня 2011 г. адбылася перадкалядная сустрэча-катэхеза дзяцей і бацькоў, да якіх завітаў святы Мікалай. Сустрэчу правёў парафіяльны душпастыр а. Алесь Шыбека.

Свята Раства Хрыстовага – таямнічае і вельмі цёплае свята, нягледзячы на снежаньскія халады і сцюжу. Асабліва любяць гэтае свята дзеці.
25 снежня 2011 г., у першы дзень Раства Хрыстовага, у нашым душпастырскім Цэнтры св. Язэпа ў Мінску адбылася святочная праграма для дзяцей з парафіі Праведнага Язэпа і парафіі св. Мікалая.

Пасля святочнай Боскай Літургіі дзеці і моладзь сабраліся, каб паглядзець інсцэнізаваную батлейку “Стаська выкрадае Дзіцятка Ісуса”, а таксама паспяваць калядкі і атрымаць доўгачаканыя падарункі.

Калядны зварот да вернікаў Апостальскага візытатара для беларусаў грэка-католікаў замежжа протаярэя Аляксандра Надсана.

Cорак гадоў таму я наведаў першы раз Амэрыку. Быў якраз перадкалядны час. Што мяне ўразіла амаль адразу пасьля высадкі з самалёта ў Нью-Ёрку, гэта рэклямы на ўсіх вялікіх крамах і ўстановах з пажаданьнямі Merry Christmas (Вясёлых Калядаў), і тут жа побач Happy Hanuka (Вясёлай Ханукі).

Грэка-каталіцкае набажэнства 25 сьнежня 2011 г.

Рэдакцыя сайта перадае інфармацыю атрыманую ад грэка-каталіцкай Супольнасьці ў г. Прага.

* * *

Хрыстос Нараджаецца! Яго Слаўце!

Дарагія Браты і Сёстры!

Запрашаю адсьвяткаваць разам Божае Нараджэньне.
Боская Літургія адбудзецца ў нядзелю, 25 сьнежня, аб 11-й гадзіне, у царкве сьвятых Кузьмы і Дзям’яна (Vyšehradská 49, Praha 2. Уваход з вуліцы Na Slovanech).
Перад службай будзе магчымасьць для Споведзі.

У 12:30 - 14:00 запрашаем на дзіцячую Калядную ялінку.
( Абяцаў завітаць Сьв. Мікола з падарункамі...)

Ваш у Хрысьце
айцец Андрусь Абламейка.

Расклад службаў у грэка-каталіцкіх парафіях г. Мінска

СУБОТА, 24 снежня – Святы Вечар перад Раством Хрыстовым

Капліца Душпастырскага цэнтра св. Язэпа – вул. Арджанікідзэ д. 6
гадз. 18:00 – Боская Літургія св. Яна Залатавуснага
(для парафіі Праведнага Язэпа і парафіі св. Мікалая Цудатворцы)
Дзяленне каляднай прасфорай

Чырвоны касцёл – ніжні храм
гадз. 21:00 – Боская Літургія св. Яна Залатавуснага
(для парафіі Маці Божай Нястомнай Дапамогі і Парафіі Святога Духа)


НЯДЗЕЛЯ, 25 снежня – Раство Госпада Нашага Ісуса Хрыста

Капліца Душпастырскага цэнтра св. Язэпа – вул. Арджанікідзэ д. 6
гадз. 12:00 – Боская Літургія Раства Хрыстовага
(для парафіі Праведнага Язэпа і парафіі св. Мікалая Цудатворцы)
Батлейка для дзяцей

Чырвоны касцёл – ніжні храм
гадз. 11:00 – Боская Літургія Раства Хрыстовага
(для парафіі Маці Божай Нястомнай Дапамогі)
Каляднае святкаванне дзяцей

гадз. 18:00 – Боская Літургія Раства Хрыстовага
(для парафіі Святога Духа)

ПАНЯДЗЕЛАК, 26 снежня – Сабор Найсв. Багародзіцы,
Свята св. Язэпа

Капліца Душпастырскага цэнтра св. Язэпа – вул. Арджанікідзэ д. 6
Парафіяльнае свята Праведнага Язэпа
гадз. 18:30 – Святочная Боская Літургія
Калядная куцця

Запрашаюцца вернікі ўсіх мінскіх парафіяў

Расклад калядных перадач на беларускіх каналах

У гэтыя выхадныя католікі ўсяго свету адзначаюць свята Божага Нараджэння. Па добрай традыцыі, асноўныя святочныя набажэнствы з Беларусі і Ватыкана будуць трансліравацца і на каналах беларускага тэлебачання.
24 снежня (субота)
° 06.35 — перадача «Існасць» (Беларусь-1)
° 21.50 — прамая трансляцыя ўрачыстага набажэнства ў вігілію Нараджэння Хрыста з мінскай рыма-каталіцкай архікатэдры (Беларусь-1). Віншавальныя словы каталіцкіх ерархаў.
° 23.50 — прамая трансляцыя ўрачыстай святой Імшы з Ватыкана, якую ўзначаліць Святы Айцец Бэнэдыкт XVI (Беларусь-1)
25 снежня (нядзеля)
° 08.50 — каляднае віншаванне Мітрапаліта Тадэвуша Кандрусевіча (Беларусь-1);
° 09.20 — перадача «Размова са святаром» (Беларусь-2)
° 16.55 — трансляцыя каляднага паслання Святога Айца «Urbi et orbi» («Гораду і свету») (Беларусь-2).
Жадаем прыемнага прагляду!

Паводле Catholic.by

“Прымай, Віфлееме, Хрыста, Які прыходзіць да Цябе,
рыхтуйся пячора змясціць у сабе Незмяшчальнага”.
(Канон, песня 1)

* * * * *
Моладзь грэка-каталіцкіх парафіяў г. Мінска запрашае ўсіх жадаючых (ня толькі маладых) на Перадкаляднае малітоўнае чуванне (паводле візантыйскай традыцыі), якое пройдзе ў нашым душпастырскім Цэнтры св. Язэпа (вул. Арджанікідзэ, д. 6, ст. метро “Аўтазаводская”) ў пятніцу 23 снежня 2011 г. у 18:30.

У праграме чування Вялікія кананічныя гадзіны з біблійнымі чытаннямі і разважаннямі ды дзяленне каляднай прасфорай.