14 верасня, у свята Узвышэння Пачэснага і Жыватворчага Крыжа адышоў да Госпада ўладыка Антоній Дыдыч. У 1994-2014 гадах ён быў біскупам Драгічынскай рыма-каталіцкай дыяцэзіі, якая ахоплівае частку Падляшша – рэгіёна, што ўваходзіць у склад Польшчы, але ў якім жыве шмат этнічных беларусаў.

 

Уладыка Антоній нарадзіўся 24 жніўня 1938 года. У 1954 годзе ён уступіў у Ордэн Меншых Братоў Капуцынаў, а ў 1963 годзе атрымаў святарскія свячанні. У 1994 годзе Святы Айцец Ян Павел ІІ прызначыў яго біскупам Драгічынскай дыяцэзіі, што была створаная за некалькі год да гэтага. Яе цэнтрам сталі рэшткі Пінскай дыяцэзіі, якія пасля ІІ Сусветнай вайны апынуліся ў складзе Польшчы. У 2014 годзе ўладыка адышоў на эмерытуру, але ў меру сваіх сіл працягваў пастырскае служэнне.

Праз некалькі дзён пасля свайго 70-годдзя Папа Леў XIV (які нарадзіўся Робертам Франсісам Прэво) адзначае свае імяніны 17 верасня - у дзень святога Роберта Беларміна.

 

Як і цяперашні Папа, яго святы Заступнік (які памёр у 1621 годзе) быў манахам і натуралістам: знакаміты езуіт вывучаў, сярод іншага, астраномію. Роберт Прэво, які мае ступень доктара кананічнага права, з'яўляецца аўгусціянскім манахам і вывучаў матэматыку. 

 

Ad multos annos prosperos! - На многія і шчасныя леты!

На працягу гісторыі мошчы святамучаніка Язафата, архібіскупа Полацкага, якія ад пачатку захоўваліся ў срэбным саркафагу ў яго катэдры св. Сафіі ў Полацку, даводзілася неаднойчы ратаваць ад вайсковага рабунку і знішчэння ды хаваць у таемных месцах. Іх асабліва хацеў знішчыць расійскі цар Пётр І. Таму святыя мошчы Язафата вывозілі для захавання ў Супрасьль, Жыровічы, Белую, Вену. Нарэшце ў 1949 г. яны былі дастаўленыя ў Рым і 22 лістапада 1963 г. з пашанай змешчаныя ў базіліцы св. Пятра пад алтаром св. Васіля Вялікага. Публічныя ўрачыстасці з гэтай нагоды, якія ўзначальваў Папа Павел VI, адбыліся 25 лістапада. У іх браў удзел вызвалены незадоўга да таго з савецкіх лагераў украінскі грэка-каталіцкі мітрапаліт Ёсіф Сліпы і першы беларускі грэка-каталіцкі біскуп у ХХ ст. Чэслаў Сіповіч, які напрыканцы малітоўных урачыстасцяў з нагоды пераносу мошчаў прачытаў па-беларуску малітву да св. Язафата.

16 верасня 2025 года Пантыфік прыняў на аўдыенцыі ў Кастэль-Гандольфа Яго Святасць Гарэгіна II, Каталікоса ўсіх армян. Аб гэтым паведаміла Зала Друку Святога Пасада.

 

Аўдыенцыя стала першай афіцыйнай сустрэчай Папы Льва XIV з кіраўніком Армянскай Апостальскай Царквы.

Падчас успаміну мучанікаў і сведак веры XXI стагоддзя ў Базіліцы Святога Паўла па-за Мурамі Леў XIV падкрэсліў, што іх надзея застаецца прароцтвам перамогі дабра над злом.

 

"Іх мучаніцтва надалей рассейвае Евангелле ў свеце, пазначаным нянавісцю, насіллем і вайной," - сказаў Святы Айцец падчас набажэнства, якое адбылося 14 верасня 2025 года вечарам з удзелам прадстаўнікоў іншых Цэркваў і хрысціянскіх супольнасцей.

Гістарычная падзея адбылася ў Эстоніі – цяпер гэтая краіна мае свайго першага блаславёнага Каталіцкай Царквы. У суботу, 6 верасня 2025 году ў Таліне быў абвешчаны блаславёным нямецкі езуіт, архібіскуп Эдуард Профітліх (1890–1942), які быў арыштаваны падчас савецкай акупацыі гэтай краіны і памёр у турме ў Расеі ў 1942 годзе.

 

У сваім казанні кардынал Крыстаф Шонбарн аддаў пашану біскупу-мучаніку як пастыру, які застаўся разам з сваёй паствай, усведамляючы, што гэтае рашэнне можа каштаваць яму жыцця.

3 верасня 2025 года ў Ватыкане завяршылася пленарная сесія Сумеснай рабочай групы Каталіцкага Касцёла і Сусветнай рады Цэркваў. Удзельнікаў нарады прыняў Папа Леў XIV.

 

Сустрэча стала магчымасцю для абмену вопытам, паглыблення адносін і абмеркавання новых прыярытэтаў, расказаў ватыканскім СМІ арцыбіскуп Флавіа Пачэ, сакратар Дыкастэрыі па спрыянні хрысціянскаму адзінству.

2 верасня 2025 спаўняецца 27 год ад смерці протапрэзбітара Яна Матусевіча, першага, пасля аднаўлення адкрытай дзейнасці, душпастыра грэка-католікаў у г. Мінску.

 

У МІНСКУ: заўпакойная Служба ў храме на зав. Снежным 7, у сераду - 3 верасня 2025, у 18:30.

Святы Айцец апублікаваў допіс у сацыяльнай сетцы “X”, прысвечаны X Сусветнаму дню малітвы аб захаванні стварэння, які адзначаецца 1 верасня 2025 года.

 

"Разам з усімі хрысціянамі сёння мы святкуем X Сусветны дзень малітвы за захаванне стварэння і працягваем яго ў “Час Стварэння” да 4 кастрычніка, свята святога Францішка Асізскага. У духу “Гімну Брату Сонцу” славім Бога і абнаўляем абавязацельства не разбураць Яго дар, але клапаціцца пра наш агульны дом", - напісаў Леў XIV.