Акцыя валанцёраў св. Мікалая для дзяцей з прытулку.

У суботу, 21 траўня 2016 г. у Мінску адбылася незвычайная акцыя. Дзеці з прытулку Ленінскага раёна разам з валанцёрамі руху св. Мікалая адправіліся ў лес, каб ператварыцца ў індзейскае племя, прайсці шмат выпрабаванняў і здабыць скарбы Майя.

Нават халоднае надвор’е і дождж напярэдадні не змаглі выстаяць перад дзіцячай малітвай і гарачым жаданнем адправіцца ў падарожжа. Таму суботні дзень выдаўся цёплым і сонечным.

У лесе на паляне Апачаў дзяцей сустрэлі Лена - Мора па Калена і Каця - Асліная Галава, якія і паведамілі дзецям вялікую тайну аб легендарных скарбах Майя. Так дзеці вырушылі ў нялёгкі шлях да каштоўнасцяў. Праз конкурсы і спаборніцтвы з канкуруючым племем дзеці ўсё ж такі дасягнулі запаветнай мэты.

У сераду, 18 траўня 2016 г., напрыканцы агульнай аўдыенцыі на плошчы св. Пятра архімандрыт Сяргей (Гаек), апостальскі візітатар для грэка-католікаў Беларусі, падарыў Святому Айцу Францішку дыск "Спевы Боскай Літургіі святога Яна Залатавуснага" на беларускай мове.

“Гэта дар вернікаў Беларускай Грэка-Каталіцкай Царквы, асабліва моладзі, якія на роднай мове моляцца за Папу, за Каталіцкую Царквы ды за сваю Бацькаўшчыну Беларусь, асабліва ў гэтыя дні” – сказаў архімандрыт Святому Айцу.

Папа Францішак перадаў сваё блаславенне беларускім грэка-католікам.

Прэзідэнт Беларусі Аляксандр Лукашэнка і Папа Рымскі Францішак падчас сустрэчы ў Апостальскім палацы ў Ватыкане 21 мая абмеркавалі развіццё адносін Беларусі з Рыма-Каталіцкім Касцёлам. 

Сустрэча працягвалася каля 40 хвілін, з іх 25 хвілін гутарка адбывалася ў фармаце «адзін на адзін».  

Папу Францішка суправаджаў арцыбіскуп Пол Рычард Галахер, сакратар Святога Пасаду па адносінах з дзяржавамі.

18 мая Мітрапаліт Мінска-Магілёўскі арцыбіскуп Тадэвуш Кандрусевіч прыняў удзел у адкрыцці ў музеі Ватыкана выстаўкі «Іканапіс Беларусі XVII-XXI стст. з калекцыі Нацыянальнага мастацкага музея Рэспублікі Беларусь».

Выстаўка абразоў з Беларусі прысвечана Юбілейнаму Году Міласэрнасці ў Каталіцкім Касцёле.

Беларускія абразы выстаўляюцца ў Апостальскай Сталіцы ўпершыню. У Італіі экспазіцыя беларускіх твораў мастацтва з Нацыянальнага музея Беларусі апошні раз праходзіла ў 2004-2005 гг. у галерэях Мілана і Трыеста.

Сярод шматлікіх прысутных на цырымоніі адкрыцця былі Надзвычайны і Паўнамоцны Пасол Рэспублікі Беларусь пры Святым Пасадзе Сяргей Алейнік, Апостальскі візітатар для грэка-католікаў Беларусі архімандрыт Сяргей Гаек, настаяцель праваслаўнага прыхода Усіх Святых протаіерэй Фёдар Поўны. Цырымонію ўпрыгожваў спевам хор мінскага храма Усіх Святых.

Новы Апостальскі Нунцый у Беларусі мансеньёр Габар Пінтэр праз пасрэдніцтва Ватыканскага радыё скіраваў прывітальнае слова да біскупаў, святароў, членаў манаскіх супольнасцяў і ўсіх вернікаў Беларусі.

Прывітальнае слова мансеньёра Габара Пінтэра

Я шчыра дзякую Ватыканскаму радыё за прадстаўленую мне магчымасць накіраваць мае самыя цёплыя словы прывітання з дапамогай сродкаў масавай камунікацыі да ўсіх біскупаў, святароў, манахаў, манахінь, да ўсіх вернікаў, да братоў і сясцёр праваслаўных і ўсіх грамадзян добрай волі Беларусі.

Гэта вялікі гонар і задавальненне для мяне мець магчымасць прадстаўляць Святога Айца ў вашай цудоўнай краіне, сярод гэтага высакароднага народа, у Касцёле, так драматычна пацярпелым і ў той жа час настолькі жывым.

Вернікі парафіі Праведнага Язэпа адсвяткавалі Пяцідзесятніцу

У нядзелю, 15 мая 2016 г. у парафіі Праведнага Язэпа ў Мінску ўрачыста святкавалі адно з самых старажытных і самых важных царкоўных святаў — Пяцідзесятніцу. Вядома, што на радаснае свята Зыходу Святога Духа храм упрыгожваецца зелянінай. Але сутнасць свята не ў прыгажосці і атмасферы ўбранства, але ў тым, што Госпад паслаў Духа Святога сваім верным, каб тыя не засталіся самі.

Пяцідзясяты дзень пасля Пасхі святкавалі яшчэ ў Старым Запавеце. Сэнс таго свята — падзяка Богу за атрыманыя дары. Але менавіта тады, калі ў дзень Пяцідзесятніцы вогненыя языкі сышлі на апосталаў і Дзеву Марыю, нарадзілася Царква Хрыстова. Евангелле сканчваецца на ўзыходзе Хрыста на неба, а жыццё Царквы пачынаецца з Зыходу Духа Святога.

Паведамленне Апостальскай Нунцыятуры ў Рэспубліцы Беларусь

Мінск, 13 мая 2016 г. 

Апостальская Нунцыятура ў Рэспубліцы Беларусь паведамляе, што Яго Святасць Папа Францішак прызначыў мансеньёра Габара Пінтэра, які да гэтага часу займаў пасаду дарадцы Апостальскай Нунцыятуры ў Аўстрыі, Апостальскім Нунцыем у Рэспубліцы Беларусь. 

7 траўня 2016 г. ў Слоніме грэка-католікі і рыма-католікі святкавалі свята Маці Божай Жыровіцкай

Ад моманту ўзнаўлення дзейнасці грэка-каталіцкай парафіі ў Івацэвічах, Жыровіцкая Багародзіца стала Апякункай парафіі і гэты дзень святкуецца ў Івацэвічах як парафіяльнае свята. Пілігрымы з Івацэвічаў і іншых грэка-каталіцкіх парафій штогод прыходзяць і прыяжджаюць ушанаваць гэтую Ікону.

У гэтым годзе групу пілігрымаў з Івацэвічаў узначаліў парах Івацэвіцкай парафіі - а. Андрэй Абламейка а групу вернікаў з іншых гарадоў - дыякан  Вячаслаў Гарчакоў.

Выстава беларускіх абразоў «Іканапіс Беларусі XVII-XXI стагоддзяў» будзе прадстаўлена з 18 мая па 25 ліпеня ў Музеі Ватыкана. Пра гэта паведаміў генеральны дырэктар Нацыянальнага мастацкага музея Беларусі Уладзімір Пракапцоў у час анлайн-канферэнцыі на сайце БЕЛТА.

"Усяго ў экспазіцыю ўвойдуць 33 абразы — праваслаўныя і каталіцкія. У асноўным гэта будуць работы з фондаў Нацыянальнага мастацкага музея, тры іконы, напісаныя сучаснымі іканапісцамі, прыбудуць з Дома міласэрнасці" - чытаем на сайце БЕЛТА.

«Для нас будзе вельмі прыемна паказаць гэтыя ўнікальныя работы, якія, на наш погляд, цікавыя не толькі турыстам, але і спецыялістам. Мы падрыхтавалі адпаведныя інфармацыйныя бюлетэні на чатырох мовах — беларускай, рускай, італьянскай, англійскай. Будзем іх раздаваць бясплатна наведвальнікам нашых выстаў», — сказаў Уладзімір Пракапцоў.