28 верасьня 2008 году ў Беластоку да ліку Блаславёных Каталіцкай Царквы будзе залічаны сьвятар Міхал Сапоцька - ураджэнец Беларускай Зямлі. Для Каталіцкай Царквы ў Беларусі гэта будзе асаблівы дар Божы – новы Заступнік перад Міласэрным Хрыстом, руплівым апосталам Якога быў ва ўсім сваім сьвятарскім служэньні а. Міхал. У беатыфікацыі будуць удзельнічаць беларускія каталіцкія ярархі, у тым ліку і Апостальскі Візітатар для грэка-католікаў Беларусі Архімандрыт Сяргей (Гаек).

Аб’яўляецца набор дзетак у беларускамоўную нядзельную школку сьв. Еўфрасіньні Полацкай пры грэка-каталіцкім Душпастырскім цэнтры Сьвятога Язэпа ў г. Менску.

Маці Божая Барунская,
Суцяшальніца ўсіх засмучаных,
маліся за нас!

Сьветлай памяці Айцец Ян Матусевіч пачынаючы з 1979 па 1990 год служыў пробашчам рыма-каталіцкай парафіі ў Барунах. Сёлета, калі споўнілася 10 гадоў, як ён адышоў з гэтага сьвету, мы выправіліся ў пілігрымку да Маці Божай Барунскай, каб падзякаваць Госпаду за дар айца – нашага першага пробашча і дэкана…

2 верасьня споўнілася 10 гадоў, як памёр першы пробашч нашай парафіі с.п. айцец Ян Матусевіч. Айцец Янка быў не толькі першым пробашчам у Менску, але для многіх стаўся першым сьвятаром у жыцьці – кагосьці хрысьціў, кагосьці прыняў да першай споведзі, многіх вянчаў… адным словам быў айцом, духоўным айцом у Хрысьце.

1 верасня – пачатак царкоўнага году, які паводле старазапаветнай традыцыі пачынаўся восеньню. Гэтая практыка прынялася таксама ў Візантыі.

22 жніўня ў Браславе ў дзесяты раз прайшло сьвята іконы Маці Божай Валадаркі азёраў. Гэтай былой грэка-каталіцкай іконай і сьвятыняй на працягу ўжо дзесяці год апякуецца рыма-каталіцкая Царква. У сьвяце прынялі ўдзел прадстаўнікі Беларускага, Рускага і Польскага духавенства рыма-каталіцкай і грэка-каталіцкай Цэркваў. Ад нашай Царквы прыехала дэлегацыя з адзінаццаці чалавек, якую ўзначальваў апостальскі візытатар архім. Сяргей Гаек. Сьвята распачала грэка-каталіцкая моладзь прыгожым усходнім сьпевам Акафісту Маці Божай.

23 жніўня завяршыла сваю працу трэцяя заключная сэсія Сабору манаства Украінскай Грэка-Каталіцкай Царквы на тэму “Служэньне і пасланьніцтва богапасьвячаных асобаў”, якая адбывалася з 19 па 23 жніўня ў памяшканьні Львоўскай духоўнай сэмінарыі Сьвятога Духа. Першая сэсія на тэму “Ідэнтычнасьць манаства УГКЦ” адбылася ў 2004 годзе, другая – “Пакліканьне і выхаваньне богапасьвячаных асобаў” – у 2006 годзе. Кожнай сэсіі Сабору папярэднічалі адпаведныя канферэнцыі.

Сьвята Ўсьпеньня Багародзіцы ўзьнікла ў Vстаг. у Палестыне.
У аснову багаслужэбных тэкстаў сьвята лягла раньняя царкоўная традыцыя, якая знайшла сваё адлюстраваньне ў ІV ст. у апокрыфным творы “Перастаўленьне Марыі”. Ён мае вялікую важнасьць як раньняе сьведчаньне веры ў тое, што Багародзіца пасьля сьмерці была ўзятая цялесна на неба.

Толькі нядаўна дайшла ў Беларусь радасная інфармацыя, што 26 ліпеня 2008 г. Сьвяты Айцец Бенядыкт XVI прызначыў а. Праф. Луіса Акуліка (гл. фота) кансультарам Папскай Рады па справах кананічных Заканадаўчых Тэкстаў (Consiglio per i Testi Legislativi).
Айцец Луіс Акулік, беларус па паходжаньні (продкі ягоныя зьехалі зь Менску), зьяўляецца грамадзянінам Аргентыны і прызнаецца да сваёй ўсходняй царкоўнай традыцыі. Некалькті гадоў таму наведваў Беларусь. Як царкоўны юрыст ён супрацоўнічае з Сакратарыятам Апостальскага Візітатара для грэка-католікаў Беларусі.
Ён зьяўляецца прафесарам у Інстытуце Царкоўнага Права ў Венецыі, дзе выкладае між іншым кананічнае права Усходніх Каталіцкіх Цэркваў.

8 і 9 жніўня 2008 г. у в. Росіца (Верхнядзьвінскі раён, Віцебская дыяцэзія), прайшлі штогадовыя Ўрачыстасьці у гонар Блаславёных мучанікаў Антона (Ляшчэвіча) і Юрыя (Кашыры), ераманахаў Ордэна айцоў-марыянаў. Яны належаць да ліку 11-ці новамучанікаў беларускіх пасярод 108 мучанікаў часу ІІ сусьветнай вайны, бэатыфікаваных Папам Янам Паўлам ІІ у 1999 г. Сярод тых 11-ці беларускіх новамучанікаў ёсьць і Блаславёная Мар’яна Бярнацкая, народжаная ва ўніяцкай сям’і ў 1888 г., некалькі гадоў пасьля ліквідацыі Аўгустоўскага дэканата Ўніяцкай Царквы; сёлета спаўняецца 120 гадоў з дня яе нараджэньня і 65 гадоў з дня ейнай мучаніцкай сьмерці 13 ліпеня 1943 г. ў в. Наўмовічы каля Горадні.