Беларускае тэлебачанне прысвяціла Году Міласэрнасці выпуск праграмы «Існасць» з удзелам Мітрапаліта Мінска-Магілёўскага арцыбіскупа Тадэвуша Кандрусевіча.

У праграме распавядаецца пра сэнс і сімволіку юбілейных гадоў у Касцёле, а таксама пра тое, чым адметны і важны Год Міласэрнасці.

Catholic.by прапануе вашай увазе поўны запіс праграмы.

У Беларусі пройдзе чарговы Тыдзень малітваў аб еднасці хрысціян. Па традыцыі ў Каталіцкім Касцёле ён праводзіцца з 18 па 25 студзеня і сёлета будзе арганізаваны ў 49-ы раз.

Беларусь ужо доўгія гады далучаецца да гэтай ініцыятывы, і з цягам часу заклік да адзінства не губляе сваёй актуальнасці, а наадварот, толькі вастрэй адчуваецца неабходнасць такой малітвы.

Сёлета Тыдзень малітваў адбудзецца пад дэвізам «Пакліканыя, каб абвяшчаць вялікія справы Пана» (пар. 1 П 2, 9).

Кульмінацыяй Тыдня малітваў заўсёды з’яўляецца экуменічнае набажэнства. 

З нагоды Дня мігрантаў - «людзей у дарозе», увазе і малітве чытачоў прапануем тэкст падрыхтаваны рэдакцыяй Catholic.by

17 студзеня ў Паўсюдным Касцёле адзначаецца Сусветны дзень мігранта і бежанца пад дэвізам «Мігранты і бежанцы — выклік для нас. Адказ — у Евангеллі міласэрнасці».

Сёння, калі бачна, што адбываецца ў свеце і як шмат людзей знаходзіцца ў дарозе, Касцёл звяртае ўвагу на праблему людзей, якія перамяшчаюцца з аднаго месца ў іншае ў пошуках працы, лепшых умоў жыцця, сховішча або адукацыі.

Праз устаноўлены каля 100 гадоў таму Дзень мігранта і бежанца супольнасць Касцёла ўключаецца ў клопат і дапамогу ўсім мігрантам. Мэта гэтага дня — звярнуць увагу на актуальныя праблемы мігрантаў і абудзіць пачуццё адказнасці за духоўную і матэрыяльную дапамогу «людзям у дарозе».

У нядзелю, 17 студзеня 2016 г., на св. Імшы а 17:00 гадз., у касцёле святых Сымона і Алены ў Мінску будзе спяваць грэка-каталіцкі міжпарафіяльны хор "Прасфара". Будуць маліцца разам рыма-католікі і грэка-католікі - гэта будзе набажэнства падзякі за свята Богаз'яўлення а таксама малітва за служэнне Папы Францішка.

У царкоўным каляндары візантыйскай традыцыі 16 студзеня святкуецца Пакланенне пачэсным кайданам святога Апостала Пятра (царкоўнаслав.:Поклонение честным веригам святого Апостола Петра). Пачэсныя кайданы Апостала Пятра захоўваюцца і ўшаноўваюцца у храме ў san Pietro in vincoli у Рыме.

У беларускім МЗС паведамілі, што 10-13 студзеня амбасадар Беларусі ў Вялікабрытаніі, а таксама пры Святым Пасадзе па сумяшчальніцтве Сяргей Алейнік зрабіў рабочую паездку ў Ватыкан.

Ён удзельнічаў у навагодняй аўдыенцыі Папы Рымскага Францыска для дыпкорпуса, акрэдытаванага пры Святым Пасадзе. У ходзе аўдыенцыі адбылася кароткая размова пасла з Пантыфікам, паведамілі ў МЗС.

Ватыканскае радыё пра айца Уладзіслава Чарняўскага

14 студзеня 2016 г. у Беларусі ўспамінаюць айца Уладзіслава Чарняўскага, якому ў гэты дзень магло б споўніцца 100 гадоў. Святара называюць вялікай і гістарычнай асобай не толькі для духоўнага, але і культурна-асветніцкага жыцця Беларусі, краіны, якая 2016 год абвясціла Годам культуры. 

Айцец Чарняўскі амаль адразу пасля заканчэння ІІ Ватыканскага Сабору пачаў перакладаць літургічныя тэскты і Біблію на беларускую мову, а благаслаўленне на гэту працу ён атрымаў ад самаго папы Паўла VI, нагадаў Апостальскі візітатар для грэка-католікаў Беларусі, архімандрыт Сяргей Гаек. “Ён сапраўды скончыў пераклад асноўных тэкстаў імшалу і потым Бібліі. Я памятаю, што на пачатку 90-х гг. у Мінску служылі першыя імшы на беларускай мове на Залатой Горцы менавіта па перакладзе Чарняўскага. У гэтым сэнсе ён быў вялікім піянерам. Канешне, ён карыстаўся перакладамі, якія рабіліся яшчэ да вайны. Але ўсё роўна высілак айца Уладзіслава – гэта вялікі ўклад у культуру. І цікава, што ён быў прызнаны на дзяржаўным узроўні: святар атрымаў узнагароды ад прэм’ер-міністра Беларусі і мясцовых уладаў”, - адзначыў архімандрыт Сяргей Гаек у інтэрв’ю Беларускай рэдакцыі Ватыканскага радыё.

Беларусь рыхтуецца да чарговага Тыдня малітвы аб еднасці хрысціян. Па традыцыі, у Каталіцкім Касцёле яна праводзіцца з 18 па 25 студзеня, з 1968 года, і сёлета, атрымліваецца, будзе арганізавана ў 49 раз. 

Беларусь ужо доўгія гады далучаецца да гэтай ініцыятывы, і з цягам часу заклік да адзінства не траціць сваёй актуальнасці, а наадварот, толькі вастрэй адчуваецца неабходнасць такой малітвы, адзначыў кс. Дзмітрый Пухальскі, канцлер курыі Мінска-Магілёўскай архідыяцэзіі.  “Езус маліўся, каб усе былі адзінымі. І вось адсутнасць гэтага адзінства хрысціян – вялікі боль і для католікаў, і для іншых хрысціян. Гэты грэх падзелу ўжо цягнецца тысячу гадоў ці нават больш. Можна казаць аб нейкіх сумесных праектах ці планах, але, на жаль, да адзінства – яшчэ вельмі доўгая дарога, але мы не губляем надзеі”, - сказаў святар у інтэрв’ю Беларускай рэдакцыі Ватыканскага радыё.

14 студзеня 2016 г. спаўняецца сто год ад нараджэння а. Уладзіслава Чарняўскага, беларускага рыма-каталіцкага святара, які праз пераклады на беларускую мову Бібліі і рыма-каталіцкіх літургічных тэкстаў зрабіў вялікі ўнёсак у сучасную беларускую культуру.

На пачатку Году культуры ў Рэспубліцы Беларусь прапануем увазе чытачоў некалькі звестак з ягонай біяграфіі (адрэдагаваных на аснове розных крыніцаў а. Андрэем Абламейкам).

У Рыме завяршыўся Міжнародны Семінар, прысвечаны мучаніцкаму подзвігу Слугі Божага.

2 студзеня 2016 г. споўнілася 70 год ад мучаніцкай смерці Слугі Божага архімандрыта Фабіяна Абрантовіча.

З гэтай нагоды ў Рыме быў арганізаваны Міжнародны кансультацыйны семінар, прысвечаны служэнню ды мучаніцкай смерці гэтага вялікага беларускага іерарха, які пасля служэння ў якасці Апостальскага Адміністратара Усходняй місіі ў Харбіне (у Маньчжурыі), у 1939 г., на пачатку ІІ-й сусветнай вайны, быў арыштаваны савецкімі органамі на польска-украінскім памежжы ды пасля доўгага следства ў Львове і Маскве быў пакінуты ў маскоўскоўскай турме Бутыркі, дзе і памер 2 студзеня 1946 г. (Рэабілітаваны ў 1992 г.).

Падчас Святаў Божага Нараджэння 2015 г. Святы і Праведны Язэп аказаў шчодрую гасціну ў грэка-каталіцкім душпастырскім цэнтры (у Мінску, па вул. Арджанікідзе д. 6), які носіць ягонае імя.

Найперш 20 і 21 снежня 2015 г. тут прайшлі перадкалядныя рэкалекцыі, якія для вернікаў двух мінскіх грэка-каталіцкіх парафій (парафіі Праведнага Язэпа і парафіі Святога Мікалая Цудатворцы) праводзіў а. Аляксандр Шаўцоў з Полацка.

24 снежня 2015 г. у 18:30 у капліцы цэнтра Праведнага Язэпа распачалася ўрачыстая Вячэрня з Літургіяй св. Васіля Вялікага, якую служыў а. Аляксандр Шыбека – душпастыр абоіх парафій.