Брат! Пачынаем малітоўны марш мужчынаў = мужчыны моляцца аб мужнасці = M3.

Хочам маліцца аб мужнасці веры, надзеі, любові для сябе, для нашых сем'яў, для нашых хрысціянскіх супольнасцяў.

Група маладых (і не толькі маладых) мужчынаў, якая напярэдадні Раства Хрыстовага сустрэлася на братэрскую малітву 21 снежня 2019 г. у мінскай грэка-каталіцкай парафіі Маці Божай Нястомнай Дапамогі (гл. фота), хацела і ў Вялікім посце сустрэцца на малітоўны вечар.

Але сітуацыя эпідэміі на гэта не дазваляе. Таму 19 сакавіка 2020 яны пачалі братэрскі, малітоўны марш (шлях) – у інтэрнэт прасторы.

Ісус запрашае: “Вазьмі крыж свой і ідзі за Мною следам”

Тыдзень пасля Нядзелі Крыжапаклоннай - чацвёрты тыдзень Вялікага посту - гэта добры час, каб глыбей асэнсаваць шлях паклікання быць хрысціянінам. Для гэтага трэба пачаць наследаваць у сваім жыцці Збавіцеля, нават болей - з’яднацца з Хрыстом так, каб ужо “жыў не я, а жыў ува мне Хрыстос” (Гал. 2, 20).

У суботу 21 сакавіка ў касцёле святога Сымона і святой Алены (Чырвоны касцёл) у Мінску пройдзе Міжрэлігійная малітва аб выбаўленні ад каранавірусу.

У гэтай інтэнцыі ў святыні а 19-й гадзіне будзе цэлебравацца святая Імша.

У нядзелю 15 сакавіка ў другой палове дня Папа Францішак нечакана выйшаў з Ватыкана, каб памаліцца аб выбаўленні ад пандэміі перад цудадзейным абразом Маці Божай Збаўлення рымскага народа і перад Укрыжаваннем, якое калісьці выратавала Рым ад чумы.

Як паведаміла італьянская рэдакцыя парталу Vatican News, Святы Айцец на пачтаку пятай гадзіны скіраваўся ў базыліку Святой Марыі Вялікай (Santa Maria Maggiore), дзе памаліўся аб выбаўленні ад пандэміі каранавірусу перад цудадзейнай іконай Багародзіцы Salus populi Romani — «Збаўленне рымскага народа».

13 сакавіка, у сёмую гадавіну абрання Папы Францішка на пасад святога Пятра, яго прадстаўнік у нашай краіне Часовы павераны ў справах Святога Пасаду ў Рэспубліцы Беларусь ксёндз Махэр Шаммас узначаліў цэлебрацыю Эўхарыстыі ў мінскім касцёле святога Сымона і святой Алены.

Вітаючы высокага госця на пачатку святой Імшы, пробашч парафіі ксёндз канонік Уладзіслаў Завальнюк адзначыў, што ўдзел прадстаўніка Папы Францішка ў Эўхарыстыі з’яўляецца выразным знакам еднасці Касцёла на Беларусі з бачным галавою паўсюднага Касцёла, Папам. Разам з ксяндзом Махэрам Шаммасам Эўхарыстыю ў інтэнцыі Святога Айца цэлебравалі Апостальскі візітатар для беларускіх грэка-католікаў архімандрыт Сяргей Гаек і святары рыма- і грэка-каталіцкага абрадаў.

Пачэсныя Святаслужыцелі, Дарагія вернікі!

У сувязі з пандэміяй каронавірусу сёння ў свеце і ў Беларусі склалася надзвычай сур’ёзная і складаная эпідэміялагічная сітуацыя.

Да вашай увагі даваджу поўныя пастырскага клопату словы Высокадастойнага Мітрапаліта Тадэвуша (Кандрусевіча):

“Беручы пад увагу няспыннае распаўсюджванне смяротна небяспечнай хваробы, з вераю ў Божы Провід і з клопатам пра здароў’е нашых грамадзянаў у Каталіцкай Царкве ў Беларусі, якая клапоціцца пра духоўнае і фізічнае дабро сваіх вернікаў і ўсяго нашага народа, уводзяцца прэвентыўныя санітарныя захады”.

30-годдзе першай грэка-каталіцкай Літургіі ў Мінску

11 сакавіка 2020 г. споўнілася 30 год ад дня, калі ў 1990 г. - у касцёле Узвышэння Святога Крыжа на мінскай Кальварыі - айцец Аляксандар Надсан, апостальскі візітатар для беларускіх грэка-католікаў Замежжа адслужыў прылюдна першую Боскую Літургію па беларуску.

У гэты дзень – увечары, прадстаўнікі грэка-каталіцкіх парафій Мінска сабраліся разам на падзячную малітву.

Вечар успамінаў першай грэка-каталіцкай Літургіі ў Мінску, якую адслужыў айцец Аляксандар Надсан. 

Дваццаць першага лютага 2020 г., у пятніцу ўвечары, на заканчэнні сырапуснага тыдня перад Вялікім Постам, у капліцы грэка-каталіцкай парафіі Праведнага Язэпа ў Мінску быў адслужаны падзячны Акафіст Імю Ісусаваму з удзелам архімандрыта Сяргея (Гаека) і мінскіх душпастыраў а. Андрэя Абламейкі і а. Аляксандра Шыбекі.

Вернікі з усіх грэка-каталіцкіх парафій Мінска сабраліся разам каб малітоўна падзякаваць Богу за той цуд, які адбыўся 30 год таму – 11 сакавіка 1990 г. ў касцёле Узвышэння Святога Крыжа на мінскай Кальварыі.

Сярод тых, хто прысутнічаў у Вечары падзякі і ўспамінаў былі і самі ўзельнікі той падзеі 30 год таму, і тыя, хто далучыўся да Царквы пазней.

Каляднае відэа-віншаванне Апостальскага візітатара для грэка-католікаў Беларусі

 
Хрыстос нарадзіўся - славім Яго! 

 
Свята Раства Хрыстовага - свята Нараджэння Госпада нашага Ісуса Хрыста. У гэты час асабліва актуальнымі ёсць словы з Евангелля паводле св. Яна: "Слова сталася целам і пасялілася між намі" (Ян 1:14).

Расклад грэка-каталіцкіх багаслужбаў на свята Раства Хрыстовага 2019 г. ў г. Мінску

АЎТОРАК, 24 снежня: Святы Вечар перад Раством Хрыстовым

Парафія Праведнага Язэпа і Парафія св. Мікалая Цудатворцы
Капліца Душпастырскага цэнтра св. Язэпа, вул. Арджанікідзе д. 6

гадз. 18:30 – Вячэрня з Літургіяй св. Васіля Вялікага

Дзяленне каляднай прасфорай, куцця

***

Парафія Маці Божай Нястомнай Дапамогі
Капліца Душпастырскага цэнтра, зав. Снежны д. 7

гадз. 18:30 – Вячэрня з Літургіяй св. Васіля Вялікага

Дзяленне каляднай прасфорай, куцця

***
Парафія Святога Духа
Чырвоны касцёл – ніжні храм

гадз. 18:30 – Вячэрня з Літургіяй св. Васіля Вялікага

Дзяленне каляднай прасфорай, куцця