У нядзелю, 29 снежня 2024 года, у храме  Душпастырскага цэнтра Праведнага Язэпа ў Мінску - у прысутнасці Паверанага ў справах Апостальскай Сталіцы, Прэлата Кшыштафа Сэрокі - архімандрыт Сяргей (Гаек) узначаліў абрад Адкрыццё Юбілейнага года 2025.

Прэлат Кшыштаф Сэрока прамовіў казанне на Боскай Літургіі, якую саслужылі так сама Айцы Кармеліты Босыя: Рэгіянальны вікарый а. Пётр Фроштэга і пробаш кармеліцкай парафіі Божага Цела а. Юрый Кулай ды настаяцель грэка-каталіцкай парафіі св. Міколы Цудатворцы а. Аляксандр Шыбека.

Ватыканскае радыё — першая ў свеце замежная радыёстанцыя, якая пачала вяшчаць па-беларуску ўжо 75 гадоў таму.

Як адзначае Беларуская рэдакцыя парталу Vatican News, які сёння працягвае распачатую тады місію, упершыню мова Купалы і Коласа прагучала ў эфіры Ватыканскага радыё ў вігілію Божага Нараджэння 1949 года. Праз некалькі тыдняў, 6 студзеня 1950 года, беларускія праграмы ўвайшлі ў рэгулярны эфір і застаюцца часткай вяшчання папскай радыёстанцыі да цяперашняга часу.

У Апостальскай Адміністратуры для грэка-католікаў Беларусі Адкрыццё Юбілейнага года 2025 адбудзецца ў нядзелю 29 снежня 2024. 

У прысутнасці Паверанага ў справах Апостальскай Сталіцы, Дастойнага Прэлата Кшыштафа Сэрокі, будзе служыцця Боская  Літургіі  ў  10:00 гадз., у храме  Душпастырскага цэнтра Праведнага Язэпа ў Мінску (вул. Арджанікідзе, д. 6).

Літургічная ўрачыстасць пройдзе ў рамках Успаміну Праведнага Язэпа - тытулярнага свята Парафіі.

Паводле пастановы Савета Міністраў ад 20 снежня 2024 года, да 1 верасня 2025 года Беларусь адкрые сваё пасольства пры Святым Пасадзе.

Пастанова Савета Міністраў № 988 прадугледжвае стварэнне першага ў гісторыі пасольства Рэспублікі Беларусь пры Святым Пасадзе. Мінфін будзе фінансаваць выдаткі на адкрыццё і ўтрыманне пасольства са сродкаў рэспубліканскага бюджэту, прадугледжаных для МЗС на ўтрыманне дыпламатычных прадстаўніцтваў за мяжой.

Расклад грэка-каталіцкіх багаслужбаў

на свята Раства Хрыстовага 2024 г.

Парафія Праведнага Язэпа і Пар. Св. Мікалая Цудатворцы
Капліца Душпастырскага цэнтра св. Язэпа, вул. Арджанікідзе, 6

АЎТОРАК, 24 снежня 2024

*** Святы Вечар Раства Хрыстовага

гадз. 18:00 –Вячэрня з Боскай Літургіяй

Блаславенне каляднай прасфоры

СЕРАДА, 25 снежня 2024 

*** Раство Госпада нашага Ісуса Хрыста
гадз. 12:00 – Боская Літургія Раства Хрыстовага

Каляднае святкаванне

ЧАЦВЕР, 26 снежня – Сабор Найсв. Багародзіцы 

гадз. 18:30 – Боская Літургія Свята 

17 снежня Папа Францішак адзначае сваё 88-годдзе, застаючыся актыўным лідарам Касцёла.

Віншаванне з днём нараджэння ад імя Канферэнцыі Каталіцкіх Біскупаў у Беларусі скіраваў Святому Айцу Старшыня епіскапату арцыбіскуп Мінска-Магілёўскі Юзаф Станеўскі. Прэзідэнт Беларусі Аляксандр Лукашэнка таксама павіншаваў Пантыфіка.

Людзей пераканае не столькі моц аргументаў, колькі любоў, якую мы зможам у іх укласці. Гэта першая і самая эфектыўная форма евангелізацыі, - сказаў Папа падчас агульнай аўдыенцыі, што прайшла 11 снежня 2024 года ў ватыканскай Зале Паўла VI.

Завяршаючы цыкл катэхез, прысвечаны дзейнасці Святога Духа ў місіі Касцёла, Францішак нагадаў, што першыя хрысціяне падчас сваіх літургічных сустрэч усклікалі: “Мараната!”, што ў перакладзе з арамейскай мовы азначае: “Пане, прыйдзі!”.

8 снежня, пасля малітвы да Беззаганнай на плошчы Іспаніі ў Рыме, Папа Францішак наведаў Палац Чыпола, каб убачыць карціну «Белае Укрыжаванне» — шэдэўр Марка Шагала, які ён называў сваім любімым мастацкім творам.

Як паведаміла Беларуская рэдакцыя парталу Vatican News, карціна была дастаўлена ў Рым з Чыкагскага інстытута мастацтваў дзякуючы супрацоўніцтву з Дыкастэрыяй па евангелізацыі і фонду Fondazione Roma з нагоды набліжэння Юбілейнага года. Адкрытая напрыканцы лістапада выстава стала першай у новай рымскай музейнай прасторы Museo del Corso і працягнецца да 27 студзеня 2025 года.

Патрыярхі Усходніх Цэркваў заклікаюць да мірнай перадачы ўлады ў Сірыі і просяць усе бакі пазбягаць насілля. Яны падкрэсліваюць важнасць захавання роўнасці ўсіх грамадзян.

У сувязі з працяглым крызісам у Сірыі, Патрыярх Сірыйскай Каталіцкай Царквы Ігнацый Юсэф III Юнан звярнуўся да вернікаў з заклікам да малітвы за бяспечны і спакойны пераходны перыяд.