ГРЭКА-КАТАЛІЦКАЯ МОЛАДЗЬ НА СУСТРЭЧЫ “МСМ ІВЯНЕЦ-СІДНЭЙ 2008”.

Калі ў ноч 20 ліпеня 2008 г. (паводле менскага часу) сотні тысяч каталіцкай моладзі з усяго сьвету сабраныя ў Сіднэй (там быў тады дзень) маліліся разам з Сьвятым Айцом Бенядыктам XVI ў рамках Сусьветнага Дня моладзі (СДМ 2008), дзьве тысячы маладых людзей з розных куткоў Беларусі, сабраныя ў івянецкім касьцёле Айцоў Францішканаў сьпявалі Акафіст да Духа Сьвятога. Акафіст быў адслужаны перад Іконай Хрыста Чалавекалюбца (Іконай Божай Міласэрнасьці) і ўзначаліў яго Апостальскі Візітатар для грэка-католікаў Беларусі Дастойны Архімандрыт Сяргей (Гаек) у саслужэньні душпастыра лідскай грэка-каталіцкай парафіі а. Аляксандра Шаўцова. Паводле закліку Архімандрыта Сяргея, словамі Акафісту да Духа Сьвятога моладзь малілася за Прадстаўніка Сьвятога Айца ў Беларусі – Апостальскага Нунцыя Архібіскупа Марціна Відавіча.
Сьпяваў Акафіст менскі грэка-каталіцкі міжпарафіяльны хор “Прасфара” (да якога далучыліся некаторыя семінарысты БГКЦ), але ў хуткім часе ўся моладзь сабраная ў храме сьпявала прыпеў О Нябесны Ўладару, пасяліся ў нас! Такім чынам беларуская моладзь пачынала трэці дзень агульнабеларускага спатканьня “МСМ Івянец-Сіднэй 2008”. Варта дадаць, што акрамя рыма-католікаў і грэка-католікаў у сустрэчы ў Івянцы ўдзельнічала моладзь праваслаўная ды моладзь з пратэстанцкіх супольнасьцяў, а таксама тыя, якія толькі шукаюць шляху да Бога.
Пасьля Акафісту, нягледзячы на позьні час - а гэта была ўжо другая гадзіна ночы (у Аўстраліі 12-я дня) - сотні вачэй узіраліся ў экран тэлебіма, дзе паказвалі, што адбывалася ў далёкай Аўстраліі, у рамках СДМ 2008.

20 ліпеня 2008 г. урачыстай Імшой, якую ўзначаліў Мітрапаліт Мінска-Магілёўскі Тадэвуш Кандрусевіч, і якую саслужылі таксама Кардынал Казімір Сьвёнтэк, Біскуп Казімір Вялікаселец і Апостальскі Візітатар для грэка-католікаў Беларусі Архімандрыт Сяргей Гаек, завяршылася міждыяцэзіяльная сустрэча моладзі “МСМ Івянец-Сіднэй 2008”. Найдастойны Ўладыка Мітрапаліт скіраваў да ўдзельнікаў “моцнае і яскравае” казаньне аб ролі сьведчаньня хрысьціянскай моладзі ў сёньняшнім сьвеце. Сустрэча “МСМ Івянец – Сіднэй 2008” праходзіла з пятніцы 18 ліпеня па нядзелю 20 ліпеня 2008 г. і была арганізаваная Канферэнцыяй Каталіцкіх Біскупаў Беларусі, каб даць беларускай моладзі магчымасьць духова далучыцца да Сусьветнага дня моладзі ў Сіднэі. (У Сіднэй паехала толькі 10 асобаў з Беларусі, сярод якіх і семінарыст БГКЦ Сяргей Раюнец; гэтую групу суправаджаў дапаможны біскуп мінска-магілёўскай архідыяцэзіі Уладыка Антон Дзям’янка).

У Івянец у дні МСМ прыязджалі да нас і другія беларускія біскупы: Уладыка Аляксандр Кашкевіч і Уладыслаў Блін. Увесь час былі з намі Мітрапаліт Тадэвуш і Архімандрыт Сяргей. На пачатак МСМ прыехалі а. Яўген Усошын з Менску, а. Андрэй Крот з Горадні (які правёў для удзельнікаў МСМ прэзентацыю БГКЦ) і а. Ігар Кандрацьеў з Берасьця (які суправаджаў хор “Мараната”, што сьпяваў на канцэрце вечарам у пятніцу).
У суботу 19 ліпеня ў праграме МСМ удзельнічалі а. Андрэй Буйніч (які рупліва спавядаў моладзь) і с. Вікторыя з Менску. У той жа дзень пасьля абеду сьведчаньне свайго пакліканьня ў БГКЦ прадставіў удзельнікам сем. Андрэй Гайдукевіч. (Тэкст ягонага сьведчаньня памяшчаем ніжэй).
Ва ўсёй праграме МСМ (і музычнай майстэрні) ўдзельнічаў а. Аляксандар Шаўцоў і трое семінарыстаў (Андрэй Гайдукевіч, Аляксандар Хахлоў і Даніла Мысленцаў) ды група дзяўчатаў з хору “Прасфара” .

А як усё пачыналася? 14-га ліпеня 2008 г. распачалася штогадовая “Музычная майстэрня” у мястэчку Івянец Валожынскага раёну Менскай вобласьці. Хлопцы і дзяўчаты, католікі двух абрадаў з розных куткоў Беларусі, Польшчы і Расеі, прыбылі каб навучыцца праслаўляць Госпада сваімі сьпевамі, граньнем ды нават груканьнем у барабаны. Для асабліва здольных і жадаючых быў зарганізаваны курс рэгентаў хору. Харавы сьпеў займаў большую частку усёй праграмы. На начлег нас прымалі ў свае хаты мясцовыя пабожныя жыхары - вернікі мясцовай рыма-каталіцкай парафіі.
Пачынаўся дзень з Ютрані (паводле рыма-каталіцкай традыцыі), далей былі заняткі ў харавой групе, Сьвятая Імша, пад час якой розныя сьвятары вяшчалі Слова Божае да ўдзельнікаў майстэрні. Пасьля абеду і паабедзеннага перапынку пачыналіся заняткі ў абраным кірунку: праца над паставай голасу, рэгентскі курс, курс ігры на гітары і барабанах. Вечар быў, калі можна так сказаць, напоўнены праслаўленьнем Госпада. Выяўлялася гэта гучнымі сьпевамі і танцамі (канешне не ў храме, а на эстрадзе), якія былі падрыхтаваныя арганізатарамі і ўдзельнікамі музычнай майстэрні.
У пятніцу 18 ліпеня “Майстэрня” ўлілася ў праграму міждыяцэзіальнай сустрэчы каталіцкай моладзі “МСМ 2008 Івянец-Сіднэй”. Як адзначыў у звароце да моладзі Мітрапаліт Тадевуш: “Францішкане першыя адгукнуліся на прапанову зрабіць “штосьці такое” і ЗРАБІЛІ!...”, таму гэтая сустрэча адбылася менавіта ў Івянцы. Калі спачатку нас было пару соцен, то ў пятніцу на час першай трансмісіі з Аўстраліі, дзе ў гэты самы час разам са Сьвятым Айцом сабралася моладзь з усяго сьвету, нас ужо стала амаль 2000.

У суботу 19 ліпеня даехала група грэка-каталіцкай моладзі з розных парафіяў БГКЦ і актыўна далучылася да праграмы МСМ. Але субота і пачатак нядзелі адзначыліся дажджом, часамі нават праліўным. Тады вялікай дапамогай у тым, каб добра падрыхтавацца да атрыманьня дароў Духа Сьвятога стаў вялікі намёт (шалаш), які арганізатарам МСМ прадаставілі браты пратэстанты з Менску. Гэта быў каштоўны знак экуменічнага супрацоўніцтва ў справе евангелізацыі. У гэтым намёце праходзіла ў суботу сэсія сьведчаньняў, канферэнцыя Мітрапаліта Тадэвуша Кандрусевіча і Сьвятая Імша, якую ўзначаліў Кардынал Казімір Сьвёнтэк.)

Дождж працягваўся і выдавалася што спатканьне магло “праваліцца”, таму што частка праграмы мела месца на вуліцы. Але жаданьне лучнасьці і сулучнасьці з Сьвятым Айцом і моладдзю ўсяго сьвету, сабранымі ў Сіднэі, прагненьне пачуць словы Папы сагравалі юнакоў і дзяўчат, а Божая Ласка, якая здавалася, сплывала разам з дажджом, давала сілы, каб сьведчыць аб сваёй прыналежнасьці да адзінай каталіцкай Царквы, каб сьведчыць аб сваім жаданьні прыняць моц Сьвятога Духа і быць жывым Евангельлем у сёньняшнім сьвеце.