Кіраўнік Прадстаўніцтва Апостальскага Пасаду ў Мінску - часовы павераны ў справах Апостальскай Нунцыятуры ў Рэспубліцы Беларусь Манс. Крыспін Дубель накіраваў Апостальскаму Візітатару БГКЦ Архімандрыту Сяргею (Гаеку)
Віншавальнае Слова з нагоды Завяршэння XVII-тай грэка-каталіцкай Пілігрымкі
Віцебск – Полацк 2011.


Дастойнаму Архімандрыту СЯРГЕЮ
Апостальскаму Візітатару „ad nutum Sanctae Sedis”
для грэка-католікаў Беларусі
МІНСК

Дастойны Айцец Архімандрыт,
Пачэсныя Святары, Манахі і Манахіні, Браты Семінарысты,
Узлюбленыя Пілігрымы,
Усе Дарагія Вернікі!

Учора ўвечары вы завяршылі XVII-тую штогадовую грэка-каталіцкую Пілігрымку з Віцебска ў Полацк. Акрамя традыцыйнага ўспаміну Полацкіх пакутнікаў 1705 г., манахаў-базыльянаў, сёлета гэтая вашая Пілігрымка насіла характар падзякі за беатыфікацыю Блаславёнага Папы Яна Паўла ІІ-га.
Падчас яе вы ўспаміналі таксама Блаславёнага святамучаніка Мікалая Чарнецкага - 10 год ад ягонай беатыфікацыі, ды пакутніка Хрыстовага, вашага руплівага пастыра Антона Неманцэвіча.

Вашая Пілігрымка – гэта не толькі шлях, які вы прайшлі фізічна. Гэта шлях духоўнага подзвігу Вашай Царквы праз стагоддзі, ад месца мучаніцкай смерці святамучаніка Язафата да старажытнага горада Полацка.

Каштоўны подзвіг вернасці Хрысту і Паўсюднай-Каталіцкай Царкве вашых праайцоў і айцоў у веры з’яўляецца для вас усіх адказным заданнем быць сёння мужнымі сведкамі Хрыста.
Гэтае заданне з’яўляецца тым больш актуальным у гэтым годзе, калі спаўняецца 415 год ад Берасцейскага Царкоўнага Сабору, які аднавіў Еднасць Усходняй Царквы на Беларускіх Землях з Рымскім Апостальскім Пасадам.

Як Кіраўнік Прадстаўніцтва Апостальскага Пасаду ў Мінску хачу перадаць усім вам найлепшыя пажаданні, каб з Божым Блаславеннем і праз Заступніцтва вашых святых Апекуноў вы стала ўзрасталі ў любові да Хрыста, да Каталіцкай Царквы і да Вашай Бацькаўшчыны.

Няхай усіх вас бласлаўляе Міласэрны Хрыстос Чалавекалюбец.