У нядзелю 24 кастрычніка 2010 г. у Рыме прайшлі юбілейныя святкаванні 280-годдзя каранацыі цудатворнай Іконы Жыровіцкай Маці Божай, якая шануецца ў грэка-каталіцкім храме святых мучанікаў Сяргея і Вакха.

Боская Літургія была адслужана ў рыма-каталіцкім храме Мадона дэі Монці (Madonna dei Monti), паколькі царква святых Сяргея і Вакха невялікая.

Літургію ўзначаліў Апостальскі Візітатар для грэка-католікаў ў Італіі і Іспаніі Ўладыка Дыянісій (Ляховіч) у саслужэнні з ерархам Тэрнопальска-Зборыўскім Уладыкам Васілём (Семенюком), Уладыкам Ірынеем (Білыкам) ды Апостальскім Візітатарам БГКЦ Архімандрытам Сяргеем (Гаекам) і шматлікімi духавенствам, сярод якога быў і беларускі ераманах а. Лявонцій (Тумоўскі).

Разам са шматлікімі ўкраінскімі вернікамі маліліся і рымскія Беларусы, у тым ліку с. Вікторыя (Чэкан) і семінарыст Сяргей Раюнец.

У святкаваннях прыняў удзел кардынал Агостыно Валіні, Вікарый Святога Айца Бэнэдыкта XVI для Рымскай дыяцэзіі, які звярнуўся да вернікаў з казаннем.

У рамках святкавання адзначалася таксама 40-годдзе заснавання ўкраінскай грэка-каталіцкай парафіі святых Сяргея і Вакха, якая разам з домам пілігрыма размешчаная ў цэнтры Рыма, на плошчы Мадона дэі Монці, і якую папулярна называюць «Мадонна».

Храм і будынак неаднаразова перабудоўваліся, а ў 1718 годзе, пры аднаўленні сцен, у калідоры паміж сакрыстыяй і кляштарам, пад тынкоўкай знайшлі ікону-фрэску, копію цудатворнага абраза Жыровіцкай Божай Маці. Ніхто не мог растлумачыць, якім чынам яна там апынулася. Неўзабаве абраз пачалі ўшаноўваць як цудатворны, называючы яе на італійскай мове «Мадонна дэль Пасколо» (Багародзіца з пашы). 7 верасня 1719 г. Папа Клімент XI распарадзіўся перанесці абраз-фрэску ў царкву для ўсеагульнага шанавання.

Паводле гэтага рымскага спіска Жыровіцкай Іконы была напісана копія для каранацыі, якая прайшла ў Жыровічах у 1730 годзе. Сёння яна знаходзіцца ў храме св. Андрэя ў Слоніме, дзе 19 верасня гэтага года адбыліся святкаванні 280-годдзя Яе каранацыі.