Папа Леў XIV прыняў Канстанцінопальскага Патрыярха Барталамея І. Аўдыенцыя адбылася 19 мая 2025 года. Днём раней ганаровы лідар сусветнага праваслаўя прысутнічаў на Імшы з нагоды пачатку Пятровага служэння Біскупа Рыма.

Падчас сардэчнай сустрэчы Экуменічны Патрыярх павіншаваў Папу з выбраннем. У час размовы, між іншым, ён “падкрэсліў важнасць далейшага развіцця і паглыблення тэалагічнага дыялогу паміж дзвюма Цэрквамі”, а таксама “іх супрацоўніцтва па пытаннях, што маюць грамадскую значнасць, такіх як вяртанне і захаванне міру ва ўсім свеце, падтрымка пакутуючых братоў і ахова навакольнага асяроддзя”, - гаворыцца ў афіцыйным паведамленні Канстанцінопальскага Патрыярхата. Барталамей І таксама згадаў пра братэрскія адносіны і супрацоўніцтва з Папам Францішкам, з якім сустракаўся больш за дзесяць разоў.

Нікея, Малая Азія (сучасны Ізнік, Турцыя) – 20 мая 325 года ўвайшло ў гісторыю як дата адкрыцця Першага Усяленскага Сабору, таксама вядомага як Першы Нікейскі Сабор. Сёння, праз 17 стагоддзяў, хрысціянскі свет узгадвае гэтую падзею, якая мела вырашальнае значэнне для фарміравання дактрыны і структуры Царквы.

Сабор быў скліканы рымскім імператарам Канстанцінам Вялікім у перыяд вострых багаслоўскіх спрэчак, якія пагражалі адзінству хрысціянства, што нядаўна атрымала свабоду пасля ганенняў. Галоўнай прычынай склікання стала так званая "арыянская спрэчка", выкліканая вучэннем александрыйскага прэсвітара Арыя. Ён сцвярджаў, што Сын Божы, Ісус Хрыстос, не адзінасутны Богу Айцу, а з'яўляецца Яго найвышэйшым тварэннем. Гэтае вучэнне падрывала асновы хрысціянскай веры ў Боскую Тройцу.

Ва ўрачыстай святой Імшы на распачацце пантыфікату Папы Льва XIV удзельнічалі дзве дэлегацыі з Беларусі.

Першую, дзяржаўную дэлегацыю, узначаліў Старшыня Палаты прадстаўнікоў Нацыянальнага сходу Рэспублікі Беларусь Ігар Сергеенка. Другая складалася з духоўных асоб. У яе ўвайшлі: арцыбіскуп Юзаф Станеўскі, Мітрапаліт Мінска-Магілёўскі, Старшыня Канферэнцыі Каталіцкіх Біскупаў у Беларусі; біскуп Аляксандр Яшэўскі SDB, Генеральны вікарый Мінска-Магілёўскай архідыяцэзіі, адказны за Магілёўскі рэгіён; ксёндз канонік Юрый Ясевіч, сакратар Мітрапаліта Мінска-Магілёўскага; ксёндз доктар Раман Суша, выкладчык Папскага Грыгарыянскага ўніверсітэта ў Рыме.

Прэзідэнт Беларусі Аляксандр Лукашэнка ад імя беларускага народа і сябе асабіста павіншаваў Папу Льва XIV з днём урачыстай інаўгурацыі пантыфікату.

«Выбранне на пасаду ў гэты няпросты перыяд глабальных супярэчнасцей сёння набывае асаблівае значэнне, — гаворыцца ў віншаванні. — Ваш заклік да міжнароднай супольнасці поўнасцю адпавядае пазіцыі Беларусі, якая заўсёды выступае за мір і згоду паміж народамі. Толькі сумеснымі намаганнямі можна дасягнуць агульных мэт».

18 мая на плошчы Святога Пятра ў Ватыкане з нагоды ўрачыстай інаўгурацыі пантыфікату Льва XIV сабраліся вернікі з розных кантынентаў у колькасці каля 250 тысяч, прадстаўнікі больш як 150 дзяржаў, дэлегацыі розных хрысціянскіх канфесій і рэлігій.

Перад Імшой Пантыфік праехаў на папамабілі па плошчы Святога Пятра і прылеглай да яе рымскай вуліцы Дэла-Канцыліяцыёнэ, каб прывітаць усіх пілігрымаў.

14 мая ў рамках Юбілею 2025 года адбылася cустрэча Папы Льва XIV з католікамі ўсходніх абрадаў.

Падчас адной з першых сустрэч свайго пантыфікату Леў XIV заклікаў захоўваць традыцыі Усходніх Каталіцкіх Цэркваў, падкрэсліваючы іх унікальную духоўную і літургічную спадчыну.

На аўдыенцыі прысутнічала дэлегацыя беларускіх святароў: грэка-каталіцкую супольнасць Беларусі на Юбілеі прадстаўляе архімандрыт Сяргей Гаек, апостальскі адміністратар для вернікаў візантыйскага абраду ў Беларусі, а таксама тры святары: айцец Андрэй Абламейка з Мінска, айцец Андрэй Крот з Гродна і айцец Яўген Усошын, канцлер курыі Апостальскай адміністратуры.

У сераду, 14 траўня 2025 г., у базіліцы Святога Пятра ў Ватыкане адбылася ўрачыстая Боская Літургія ў візантыйскім абрадзе ў рамках Юбілею Усходніх Каталіцкіх Цэркваў. 

Літургію ўзначаліў Патрыярх Мельхіцкай Грэка-Каталіцкай Царквы Юсеф Абсі, а пропаведзь прамовіў Блажэннейшы Святаслаў, Айцец і Галава УГКЦ. 

Беларуская грэка-каталіцкая дэлегацыя бярэ ўдзел у Юбілеі Усходніх Цэркваў, які праходзіць у Рыме з 12 па 14 мая 2025 года. Праграма сустрэчы прадугледжвае аўдыенцыю ў Папы Льва XIV.

Грэка-каталіцкую супольнасць Беларусі на Юбілеі прадстаўляе архімандрыт Сяргей Гаек, Апостальскі адміністратар для вернікаў візантыйскага абраду ў Беларусі, а таксама тры святары: айцец Андрэй Абламейка з Мінска, айцец Андрэй Крот з Гродна і айцец Яўген Усошын, канцлер курыі Апостальскай адміністратуры.

Старшыня епіскапату Турцыі арцыбіскуп Марцін Кметэц выказаў спадзяванне на візіт Папы Льва XIV з нагоды 1700-годдзя Нікейскага Сабора, які павінен адбыцца ў Ізніку побач са Стамбулам.

Арцыбіскуп-мітрапаліт Ізміра Марцін Кметэц, з радасцю прыняўшы навіну пра выбар кардынала Роберта Прэвоста 267-м Біскупам Рыма, запэўніў, што духавенства і вернікі Касцёла ў Турцыі будуць "крочыць за Папам Львом XIV на шляху абвяшчэння Евангелля і супольна імкнуцца да спрыяння міру, справядлівасці і любові, становячыся бліжнімі для ўсіх людзей".

З 12 па 14 траўня 2025 г. у рамках Юбілейнага года ў Ватыкане праходзяць спецыяльныя дні, прысвечаныя Усходнім Каталіцкім Цэрквам.

Гэты Юбілей — гэта не толькі магчымасць для вернікаў гэтых Цэркваў здзейсніць паломніцтва ў Рым і прайсці праз Святыя Дзверы папскіх базілік. Гэта таксама магчымасць для рымлян і гасцей горада пазнаёміцца ​​з багаццем хрысціянскіх традыцый, паглыбіць сваё разуменне таго, што азначае адзінства ў разнастайнасці, пра што гавораць біскупы Рыма ў сваім вучэнні.