Восенню Францішак плануе адправіцца ў Казахстан, - такую інфармацыю распаўсюдзіла 1 жніўня 2022 года Зала Друку Святога Пасаду.

“Прымаючы запрашэнне грамадзянскіх і касцёльных улад, Папа Францішак здзейсніць абвешчанае Апостальскае падарожжа ў Казахстан з 13 па 15 верасня 2022 года, наведваючы горад Нур-Султан з нагоды VII З'езда Лідараў Сусветных і Традыцыйных Рэлігій”, - гаворыцца ў афіцыйнай заяве.

Раней аб рашэнні Папы прыняць удзел у мерапрыемстве заяўляла казахстанскае кіраўніцтва.

У 1998 годзе Казахстан, як першая краіна Цэнтральнай Азіі, падпісаў Пагадненне аб узаемных адносінах са Святым Пасадам, а ў 2001 годзе краіну наведаў Пантыфік – Ян Павел ІІ.

Аляксандр Амяльчэня - Vatican News

45 гадоў таму, 28 ліпеня 1977 года, у Парыжы адышоў у вечнасць архімандрыт Леў Гарошка – рэлігійны і грамадскі дзеяч, публіцыст, пісьменнік, былы кіраўнік Беларускай рэдакцыі Ватыканскага радыё.

У дзень асаблівага ўспаміну пра айца Льва Гарошку на папскую радыёстанцыю завітаў архімандрыт Сяргей Гаек, Апостальскі візітатар для грэка-католікаў Беларусі. Ён памаліўся аб вечным супакоі для святара ў капліцы Ватыканскага радыё – месцы, дзе і сам айцец Леў давяраў Богу свае радасці, праблемы і спадзяванні.

Еўрапейскі дзень малітвы за мір адбудзецца 14 верасня 2022 г. Пра гэта абвясціў Старшыня Рады Канферэнцый Біскупаў Еўропы (РКБЕ) арцыбіскуп Віленскі Гінтарас Грушас.

Як паведаміла Беларуская рэдакцыя парталу Vatican News, у інтэрв’ю італьянскаму выданню Avvenire арцыбіскуп Грушас адзначыў, што Еўрапейскі дзень малітвы за мір адбудзецца ў свята Узвышэння Святога Крыжа, «асабліва шанаванага хрысціянскімі супольнасцямі ўсходняга абраду».

Папа распачаў “пакаянную пілігрымку” ў Канаду. Гаворка ідзе пра 37-е Апостальскае падарожжа Францішка, якое пройдзе з 24 па 30 ліпеня 2022 года пад знакам блізкасці да карэннага насельніцтва гэтай краіны.

“Дарагія канадскія браты і сёстры, я прыбываю да вас, каб сустрэцца з карэннымі народамі. Спадзяюся, што з Божай ласкай мая пакаянная пілігрымка паспрыяе распачатаму шляху прымірэння. Калі ласка, суправаджайце мяне малітвай”, - напісаў Пантыфік у Twitter.

Самалёт Airbus A330 італьянскай авіякампаніі Ita Airways з Папам на борце вылецеў з рымскага аэрапорта Fiumicino у 9.16 па сярэднееўрапейскім часе. Першым этапам падарожжа стане горад Эдмантан, адміністрацыйны цэнтр правінцыі Альберта, якая знаходзіцца на захадзе краіны.

Раніцай 22 ліпеня 2022 года Францішак адправіўся ў базыліку Санта-Марыя-Маджорэ, каб даверыць Багародзіцы – як ён робіць гэта звычайна – падарожжа ў Канаду.

Папа некаторы час маліўся перад абразом заступніцы Рыма – Марыі, якую ўшаноўваюць у іконе Salus Populi Romani. Потым ён вярнуўся ў ватыканскі Дом святой Марты.

Святы Айцец здзейсніць паездку ў Канаду з 24 па 30 ліпеня 2022 года. Гэта будзе 37-е Апостальскае падарожжа Францішка, у рамках якога ён наведае гарады Эдмантан, Масквэйсік, Квэбэк і Ікалуіт. Галоўным матывам пілігрымкі будзе сустрэча з карэннымі народамі Канады.

Аляксандр Панчанка -Vatican News

Святы Айцец скіраваў прывітанне да ўдзельнікаў Сіноду Біскупаў Украінскай Грэка-Каталіцкай Царквы, якое распачалося 7 ліпеня.

Як паведаміла беларуская рэдакцыя парталу Vatican News, з-за вайны пасяджэнне было перанесена з Кіева ў польскі Пшэмысль.

Познім вечарам 1 ліпеня ў Нацыянальным санктуарыі Маці Божай Будслаўскай адбылася адна з найбольш яскравых падзей фэсту — працэсія з запаленымі свечкамі і копіяй цудадзейнага абраза.

Узначаліў велічнае шэсце вакол Чырвонай плошчы і цэлебрацыю святой Імшы апоўначы Апостальскі нунцый у Беларусі арцыбіскуп Антэ Ёзіч. Разам з прадстаўніком Папы Францішка ў нашай краіне маліліся Мітрапаліт Мінска-Магілёўскі арцыбіскуп Юзаф Станеўскі, які толькі вярнуўся з Рыма, дзе атрымаў з рук Святога Айца палій Мітрапаліта, Старшыня Канферэнцыі Каталіцкіх Біскупаў у Беларусі біскуп Віцебскі Алег Буткевіч, біскупы Юрый Касабуцкі і Казімір Велікаселец, архімандрыт Сяргей Гаек, больш за сто святароў лацінскага і ўсходняга абрадаў і тысячы вернікаў з розных мясцін Беларусі і з-за мяжы.

30 чэрвеня 2022 года Папа прыняў на аўдыенцыі дэлегацыю Канстантынопальскага Патрыярхату, якая прыбыла ў Ватыкан з нагоды ўрачыстасці святых апосталаў Пятра і Паўла, апекуноў Рыма.

“Прымірэнне паміж падзеленымі хрысціянамі, будучы укладам у прымірэнне канфліктуючых народаў, з’яўляецца як ніколі актуальным сёння, калі свет ускалыхнуты жорсткай і бессэнсоўнай ваеннай агрэсіяй, у якой шматлікія хрысціяне ваююць паміж сабой”, - сказаў Святы Айцец, звяртаючыся да сваіх гасцей.

“Сінод, які перажываем, кліча нас стаць Касцёлам, які ўстае, а не замыкаецца ў сабе, які здольны глядзець шырэй, выйсці з уласных вязніц, каб ісці насустрач свету”, - падкрэсліў Папа.

29 чэрвеня 2022 года ў ватыканскай базыліцы адбылася Эўхарыстыя з нагоды ўрачыстасці святых апосталаў Пятра і Паўла. Цэлебрацыю ўзначаліў кардынал Джавані Батыста Рэ, дэкан Калегіі кардыналаў. Падчас літургіі Пантыфік благаславіў паліі для 44-х арцыбіскупаў-мітрапалітаў, прызначаных на працягу апошніх дванаццаці месяцаў, у тым ліку для арцыбіскупа Юзафа Станеўскага, Мітрапаліта Мінска-Магілёўскага, а таксама прамовіў гамілію.