Міжнародная марыялагічная канферэнцыя "Блаславёная Дзева Марыя у догмаце і ў кульце" завяршылася ў Рыме. Мела яна характар тэалагічна-гістарычны. Духоўнымі ўводзінамі ў канферэнцыю была ўрачыстая святочная Вячэрня, адслужаная на лацінскай мове 6 кастрычніка ў рымскай базыліцы Маці Божай Ружанцовай з Пампеі. 

Пасяджэнні канферэнцыі праходзілі 7 і 8 кастрычніка 2026 года ў зале Інстытута Патралогіі «Augustianum». Самая канферэнцыя сабрала больш за 400 даследчыкаў, багасловаў, святароў і свецкіх вернікаў з усяго свету. Яны прадстаўлялі розныя тэалагічныя школы, з асаблівым акцэнтам на традыцыйнай марыялогіі. У працах канферэнцыі актыўна ўдзельнічалі прадстаўнікі Усходніх Цэркваў розных традыцый: мараніцкай, малабарскай, візантыйскай.

Першы дзень канферэнцыі быў прысвечаны дактрынальным пытанням, а другі — ролі Блаславёнай Дзевы Марыі ў каталіцкім кульце, літургіі, гісторыі і народнай набожнасці.

Канферэнцыя адкрылася выступам амерыканскага кардынала Рэйманда Берка. Важным выкладам першага дня было выступленне Папскага тэолага а. Вайцеха Гертыха, дамініканіна. У фінальны дзень з дакладам выступіў былы прэфект Кангрэгацыі дактрыны веры кардынал Герхард Людвіг Мюлер.

Акрамя афіцыйнай праграмы, канферэнцыя дала ўдзельнікам магчымасць для размовы і рэфлексіі ў невялікіх, братэрскіх групах. У тых жа братэрскіх размовах удзельнічаў архімандрыт Сяргей (Гаек) — доктар усходніх царкоўных навук (SEOD) і член-карэспандэнт Папскай міжнароднай марыйнай акадэміі (PAMI) на працягу трыццаці гадоў. 

Тэмай братэрскіх абмеркаванняў стала ўшанаванне Багародзіцы сярод хрысціян візантыйскай традыцыі ў Беларусі, а таксама Пілігрымка іконаў Маці Божай па парафіях і супольнасцях па ўсёй Беларусі.