Мансіньёр Кшыштаф Сэрока, які на працягу апошніх трох гадоў служыў сакратаром Апостальскай Нунцыятуры ў Мінску, прызначаны на новую пасаду ў дыпламатычнай службе Апостальскай Сталіцы. Цяпер ён накіраваны ў аддзел па сувязях з дзяржавамі і міжнароднымі арганізацыямі Дзяржаўнага сакратарыята ў Ватыкане.

Кшыштаф Сэрока з’яўляецца ўраджэнцам Элкскай дыяцэзіі ў Польшчы, святарскае пасвячэнне атрымаў у 2010 годзе. З 2010 па 2013 год служыў у парафіі святога Казіміра Каралевіча ў Гіжыцку (Варміньска-Мазурскае ваяводства ў Польшчы).

Затым ён працягнуў навучанне ў Рыме, атрымліваючы адукацыю ў галіне сацыяльнай і інстытуцыйнай камунікацыі ў Папскім універсітэце Святога Крыжа і ў галіне кананічнага права ў Папскім Латэранскім універсітэце. Ён таксама скончыў Папскую касцёльную акадэмію, якая рыхтуе да дыпламатычнай службы пры Апостальскай Сталіцы. Пасля служыў у Апостальскай Нунцыятуры ва Угандзе, а апошнія тры гады ― у нунцыятуры ў Мінску.

Паводле Catholic.by