Х Міжнародны Кангрэс Юзафалогіі – Беларускі ўдзел

27 верасьня – 5 кастрычніка 2009 г. у польскім горадзе Каліш праходзіў Х Міжнародны Кангрэс Юзафалогіі (гэта значыць прысьвячаны культу сьв. Язэпа).
Дэвіз кангрэсу гучаў: “Сьвяты Язэп – Апякун на наш час”.

У Кангрэсе ўдзельнічалі багасловы, культураведы, гісторыкі, музыкаведы – амаль 100 асобаў з 15-ці краінаў Еўропы, дзьвюх Амерыкаў ды Афрыкі.
З Беларусі ў Кангрэсе ўдзельнічалі архімандрыт Сяргей (Гаек) ды іпадыякан Вячаслаў Гарчакоў.

Высілак падрыхтоўкі і правядзеньня Кангрэсу ўзяло на сябе Польскае Студыюм Юзафалогіі пад кіраўніцтвам дырэктара кс. д-ра Андрэя Латоня (гл. фота).

д-р Андрэй ЛатоняКангрэс меў таксама і малітоўна-літургічнае вымярэньне. Кожны дзень у храме Санктуарыюма сьвятога Язэпа біскупы і сьвятары (з замежжа ды з Польшчы) служылі сьв. Імшу пры шматлікай прысутнасьці пілігрымаў.

30 верасьня архімандрыт д-р Сяргей (Гаек) зачытаў даклад (падрыхтаваны разам з протапразьбітарам Андрэем Абламейкам) на тэму: “Праведны Язэп у душпастырскім вопыце Беларускай Грэка-Каталіцкай Царквы сёньня.”

У праграме Кангрэсу быў яшчэ падрыхтаваны камунікат а. Алеся Аўдзеюка “Некаторыя іконы Праведнага Язэпа ў Цэрквах (каталіцкіх) візантыйскай традыцыі”, але а. Алесь ня змог удзельнічаць у Кангрэсе.

Удзельнікаў Кангрэсу, асабліва з Мексыкі ды Анголы, вельмі цікавіла шматбаковая дзейнасьць Грэка-каталіцкага цэнтра сьв. Язэпа ў Менску.

* * *

“Няхай сьвяты Язэп стане для ўсіх асаблівым настаўнікам удзелу ў месіянскай місіі Хрыста, у якой у Царкве ўдзельнічаюць усе: сужонкі, бацькі, людзі, што жывуць з працы сваіх рук ці з кожнай іншай працы, асобы пакліканыя як да сузіральнага жыцьця так і да актыўнага апостальства” (пар. Ян Павел ІІ, Апостальскае настаўленьне “Redemptoris Custos”, 32) - а. праф.Тарчызіо Страмарэ (Рым).

Фотаграфіі з сайта: www.jozefologia.pl