25 сакавіка 2009 года, з нагоды 65-й гадавіны сьмерці Блаславёнага Сьвятамучаніка Амільяна (Коўча), на месцы былога канцэнтрацыйнага лагеру Майданэк у Польшчы, быў асьвячаны абеліск (камень) з пасланьнем Блаславёнага:
"…Тут я бачу Бога – Бога, які ёсьць адзін для нас усіх, без зважаньняў на рэлігійную розьніцу".

Урачыстасьць узначалілі грэка-каталіцкі мітрапаліт перамышльска-варшаўскі Высокадастойны Кір Ян (Мартыняк) ды рыма-каталіцкі архібіскуп-мітрапаліт люблінскі Юзаф Жыцінскі. Удзельнічалі грэка-каталіцкія біскупы з Украіны ды Польшчы, разам са шматлікімі грэка-каталіцкімі сьвятарамі – пілігрымамі з Украіны.

Беларускую Грэка-Каталіцкую Царкву прадстаўлялі Апостальскі Візітатар архімандрыт Сяргей (Гаек) ды душпастыр грэка-каталіцкай парафіі ў Берасьці а. Ігар Кандрацьеў.

У мерапрыемстве ўзялі ўдзел таксама Віцэ-прэм'ер Украіны Іван Васюнік, Віцэ-міністр культуры і нацыянальнай спадчыны Польшчы Пётр Жухоўскі, прадстаўнік Сакратарыяту Прэзідэнта Польшчы Леха Качыньскага Малгожата Залуска, прадстаўнікі мясцовых органаў улады, дыпляматычнага корпусу, габрэйскай грамады.

Урачыстасьці распачаліся з малітвы за загіблых у канцлагеры Майданэк. Потым быў зачытаны Дэкрэт Першаярарха УГКЦ Яго Блаславенства Кір Любаміра (Гузара). «Усіх сьвятароў ды душпастыраў нашай Царквы заклікаю у сваім жыцьці ды служэньні ўспадкоўваць прыклад гэтага нашага субрата ў сьвятарстве» - напісаў у дакуменце Кір Любамір.

Пасьля гэтага прадстаўнікам 15-ці епархій і экзархатаў з Украіны, Польшчы ды Апостальскай Візітатуры БГКЦ была перададзена зямля з Майданэка. Яна будзе зьберагацца ў Кіеве, Львове, Тэрнопалі, Івана-Франкоўску, Драгобычы, Каламіі, Стрыі, Сокалі, Жоўкве, Чарткове, Луцку, Адэсе, Данецку, а таксама ў Перамышлі , Уроцлаве і Берасьці.

Храм у Берасьці быў выбраны Апостальскім Візітатарам архімандрытам Сяргеям, як найбліжэйшы да Майданэка храм БГКЦ. Акрамя таго, у час ІІ сусьветнай вайны з Берасьця ў канцлагер Майданэк было адпраўлена шмат жыхароў Беларусі – ахвяраў нацызма, у тым ліку беларускіх дзяцей.

Жыцьцёвы шлях Бл. Сьвмуч. Амільян закончыў у канцлагеры 25 сакавіка 1944 года, а ў 2001 годзе яго беатыфікаваў Папа Рымскі Ян Павал ІІ. Увосень 2008 года Сінод Біскупаў УГКЦ пастанавіў абвясьціць Блаславенага Сьвятамучаніка Амільяна Коўча Заступнікам душпастыраў УГКЦ.