Папа прызначыў ксяндза Флавіа Пачэ, які дагэтуль быў падсакратаром Дыкастэрыі па справах Усходніх Цэркваў, сакратаром Дыкастэрыі спрыяння хрысціянскаму адзінству, надаўшы яму тытул арцыбіскупа.

Флавіа Пачэ нарадзіўся ў 1977 годзе ў горадзе Монца на поўначы Італіі. У 2002 годзе атрымаў прэзбітэрскае пасвячэнне. Займаўся моладзевым душпастырствам у Аб’ятэграса, выкладаў рэлігію ў дзяржаўнай школе, быў капеланам мясцовага хоспіса.

У 2010 годзе атрымаў дыплом па ісламістыцы ў Папскім інстытуце арабскіх і ісламскіх даследаванняў у Рыме, прымаў удзел у ініцыятывах, звязаных з адносінам з ісламам, якія праводзіла Міланская архідыяцэзія.

У 2011 годзе стаў асабістым сакратаром тагачаснага прэфекта Кангрэгацыі па справах Усходніх Цэркваў, кардынала Леанарда Сандры, а ў 2020 годзе – падсакратаром гэтай ватыканскай дыкастэрыі.

Аляксандр Панчанка - Vatican News