Апостальскі Нунцый маліўся з грэка-католікамі г. Мінска

У нядзелю, 28 лістапада 2021 г. грэка-католікам г. Мінска (прадстаўнікам мінскіх парафій) Госпад даў ласку глыбокай духовай Сулучнасці (Сопричастие; Communio, KOINONIA) - у супольным святкаванні Памяці св. Апостала Андрэя, у рамках Успаміну 425-годдзя Берасцейскай уніі. 

Боскую Літургію ў храме душпастырскага цэнтра парафіі Праведнага Язэпа ўзначаліў Апостальскі Нунцый у Беларусі Высокадастойны Архібіскуп Антэ Ёзіч - у саслужэнні з Апостальскім візітатарам для грэка-католікаў Беларусі Архім. Сяргеем (Гаекам) і душпастырамі мінскіх грэка-каталіцкіх парафій; дыяканскае служэнне неслі протадыякан Вячаслаў Гарчакоў і дыякан Аляксандр Хахлоў.

Прадстаўнікі мінскіх парафій (колькасць вернікаў была абмяжаваная дзела захавання анты-кавідных нормаў) дзякавалі Госпаду за "Адіную, святую, паўсюдную і апостальскую Царкву". Гэта быў вельмі ўпэўнены крок на "шляху сінадальнасці" - у супольнасці Паўсюднай Царквы. 

"Вашыя супольнасці павінны таксама прыняць удзел у гэтым касцёльным падарожжы, каб адказаць на новыя выклікі часу, ісці разам з адвагай і пакорай. У гэтым Сінодзе ўдзельнічаюць усе, а не толькі біскупы і святары" - сказаў Апостальскі Нунцый, заклікаючы вернікаў да актыўнага ўдзелу ў перадсінадальных кансультацыях.

Прыгожым момантам малітоўнай сустрэчы было віншаванне, якое Апостальскаму Нунцыю склалі дзеці з нядзельнай катэхітычнай школкі.