Пошук

Каляндар

 

Папа Францішак і Патрыярх Барталамей І разам заклікалі абараніць стварэнне  


Папа Францішак і Патрыярх Барталамей І разам заклікалі абараніць стварэнне“Наша чалавечая годнасць і дабрабыт глыбока злучаны з нашым клопатам аб стварэнні”, - падкрэслілі Папа Францішак і Патрыярх Барталамей І у апублікаваным 1 верасня 2017 г. сумесным пасланні на Сусветны дзень малітвы аб ахове стварэння. 

 

“Апавяданне пра стварэнне сусвету дае нам панарамнае бачанне свету. Святое Пісанне адкрывае, што “на пачатку” Бог задумаў, каб чалавецтва супрацоўнічала з Ім у абароне і ахове прыроднага асяроддзя. На пачатку, як чытаем у Кнізе Быцця, “яшчэ не было на зямлі ніякага палявога куста і не расла яшчэ ніякая палявая трава. Бо Пан Бог не пасылаў дажджу на зямлю, і не было чалавека, каб апрацоўваць зямлю” (2,5). Зямля была нам даверана, як найвышэйшы дар і спадчына, за якую мы ўсе адказныя, пакуль, “напрыканцы”, усё на небе і на зямлі не будзе абноўлена ў Хрысце (пар. Эф 1,10). Наша чалавечая годнасць і дабрабыт глыбока злучаны з нашым клопатам аб стварэнні”, - гаворыцца ў дакуменце.

 

Адзначаецца, што зараз гісторыя свету паказвае цалкам іншую сітуацыю. “Яна дэманструе нам сцэнарый маральнага заняпаду, дзе наша стаўленне і паводзіны ў адносінах да стварэння засланяюць наша пакліканне як супрацоўнікаў Бога. Наша схільнасць да разбурэння кволых і збалансаваных экасістэм свету, няўтольнае жаданне маніпуляваць і кантраляваць абмежаваныя рэсурсы планеты, прагнасць здабыцця бязмежнай выгады на рынках – усё гэта адлучыла нас ад першапачатковай задумы стварэння. Мы больш не паважаем прыроду, як супольны дар; замест гэтага лічым яе прыватнай уласнасцю. Мы больш не сябруем з прыродай, каб падтрымліваць яе; замест гэтага мы пануем над ёй, каб умацоўваць нашы структуры”, - падкрэслілі прадстаяцелі.

 

Паводле Папы і Патрыярха, наступствы гэтага альтэрнатыўнага бачання трагічныя і доўгатрывалыя. “Чалавечая і прыроднае асяроддзе падлягаюць адначасоваму знішчэнню, а гэта знішчэнне планеты становіцца цяжарам для найбольш безабаронных яе жыхароў. Наступствы кліматычных зменаў у першую чаргу ўплываюць на людзей, якія жывуць у беднасці ва ўсіх часткай свету. Наш абавязак адказнага карыстання дарамі зямлі азначае прызнанне і павагу да ўсіх людзей і ўсіх жывых стварэнняў. Тэрміновы выклік і пакліканне да клопату аб стварэнні з’яўляюцца заклікам да ўсяго чалавецтва, каб прыкласці намаганні на карысць устойлівага і інтэгральнага развіцця”, - напісалі яны.

 

Кіраўнікі Цэркваў скіравалі заклік да ўсіх людзей добрай волі, каб прысвяцілі 1 верасня час малітве ў інтэнцыі навакольнага асяроддзя. “З гэтай нагоды мы жадаем скласці падзяку любячаму Стварыцелю за цудоўны дар стварэння і абавязацца бараніць і ахоўваць яго дзеля дабра будучых пакаленняў. Мы ведаем, што наша праца дарэмная, калі Пан не на нашым баку (пар. Пс 126-127), калі малітва не знаходзіцца ў цэнтры нашых разважанняў і цэлебрацыі. Канешне, мэтай нашых малітваў з’яўляецца змена разумення свету, каб змяніліся нашы адносіны да яго. Мэтай нашых прапановаў з’яўляецца заахвочванне да адвагі ў прыняцці большай прастаты і салідарнасці ў нашы стылі жыцця”, - гаворыцца ў пасланні.

 

Францішак і Барталамей І заклікалі ўсіх, хто мае адказнасць у грамадскай, эканамічнай, палітычнай і культурнай сферах, каб пачулі вокліч зямлі і заняліся патрэбамі маргіналізаваных асобаў, а перш за ўсё, каб адказалі на мальбу мільёнаў людзей і падтрымалі глабальны кансэнсус на карысць аздараўлення параненага стварэння. “Мы перакананыя, што не можа быць шчырага і трывалага вырашэння экалагічнага крызісу і кліматычных змен без узгодненага і супольнага адказу на яго, без сумеснай і супольнай адказнасці, без надання прыярытэту салідарнасці і служэнню”, - адзначылі прадстаяцелі Цэркваў.

 

Сусветны дзень малітвы аб ахове стварэння адзначаецца ў Каталіцкім Касцёле з 2015 г.. Францішак устанавіў яго падтрымаўшы ініцыятыву праваслаўных хрысціян, якія адзначаюць гэты Дзень з 1989 г.. Ён патлумачыў сваю ініцыятыву жаданнем вызнаўцаў Хрыста “зрабіць свой унёсак у перамогу над экалагічным крызісам, які перажывае чалавецтва” і заклікаў да сапраўднага “экалагічнага навяртання”.

 

Паводле Беларускай рэдакцыі Ватыканскага радыё


1.09.2017

Copyright 2008 Язэп.org
Пры выкарыстаньні матэрыялаў пажадана спасылка.
Design by Zmicier