Частка I 

ДЗЕНЬ ІІІ (16 снежня) - Ікас 3

Маючы ва ўлоньні сваім Бога, Дзева сьпешна пасьпяшыла да Альжбеты, сын якое ва ўлоньні яе, пачуўшы прывітаньне, усьцешыўся і ўзварухнуўся, быццам хацеў уславіць Багародзіцу песьняю: 

Радуйся, Галінка неўвядальнага куста! 

Радуйся, Набытак несьмяротнага плоду! 

Радуйся, бо Ты ўзрасьціла чалавекалюбнага Земляроба! 

Радуйся, бо Ты нарадзіла Садоўніка жыцьця нашага! 

Радуйся, Ніва, што прыносіць багаты плод ласкаў! 

Радуйся, Стол, поўны багацьця спагады! 

Радуйся, бо праз Цябе рай зноў зацьвітае! 

Радуйся, бо Ты рыхтуеш супакаеньне душам! 

Радуйся, духмяны Пах малітвы! 

Радуйся, Ачышчэньне ўсяго сьвету! 

Радуйся, Божая Спагадлівасьць да людзей! 

Радуйся, Адвага нас, сьмяротных, зьвяртацца да Бога! 

*Радуйся, Дзева Маці! 

Кандак 4

Праведны Язэп сумеўся, гледзячы на Цябе, Бязьвінная, і, спакусіўшыся, усумніўся ў Тваім дзявоцтве. Калі ж ён даведаўся, што гэта сталася праз Духа Сьвятога, усклікнуў: Алілуя!

З нагоды таго, што 800 гадоў таму ў Грэча ў Італіі св. Францішак пажадаў згадаць Нараджэнне Госпада, заснаваўшы традыцыю ўстанаўлення ясляў, Папа Францішак пастанавіў:

Пачынаючы з 8 снежня 2023 г. – урачыстасці Беззаганнага Зачацця Найсвяцейшай Дзевы Марыі (паводле рыма-каталіцкага календара), да 2 лютага 2024 г. – свята Стрэчання Гасподняга, вернікі Каталіцкай Царквы могуць атрымаць поўны АДПУСТ на агульных умовах, наведваючы храмы, якія належаць айцам францішканцам па ўсім свеце, і молячыся перад усталяванымі там ЯСЛЯМІ.

Таксама тыя, хто хварэе або фізічна не можа ўдзельнічаць у богаслужэннях, могуць скарыстацца дарам поўнай індульгенцыі, ахвяруючы свае пакуты Госпаду або здзяйсняючы практыкі набожнасці.

Частка I 

ДЗЕНЬ ІІ (15 снежня) - Ікас 2

Хочучы спазнаць непазнавальнае, Дзева сказала анёлу: «Скажы мне, як можа сын нарадзіцца ад дзевы?» А той у адказ са страхам усклікнуў: 

Радуйся, Удзельніца тайніцы провіду Божага! 

Радуйся, Вера ў тое, што застаецца таемным! 

Радуйся, Пачатак цудаў Хрыстовых! 

Радуйся, Спаўненьне навучаньняў Ягоных! 

Радуйся, Лесьвіца нябесная, па якой Бог зышоў! 

Радуйся, Мост, які вядзе людзей да неба! 

Радуйся, Подзіў шматгалосны анёлаў! 

Радуйся, Плач пераможаных бесаў! 

Радуйся, бо Ты ў невыказны спосаб народзіш Сьвятло! 

Радуйся, бо Ты не аб’явіла тайніцы нікому! 

Радуйся, вышэйшая за мудрасьць усіх вучоных! 

Радуйся, Заранка, што асьвятляе розумы верных! 

* Радуйся, Дзева Маці! 

Кандак 3

Сіла Ўсявышняга ацяніла тады Бязьвінную, і Яна зачала. Ён явіў дабраплоднае ўлоньне Яе, быццам ніву ўрадлівую для ўсіх, што жадаюць жаць збаўленьне і клічуць: Алілуя!

14 снежня ў катэдральным касцёле Найсвяцейшага Імя Марыі ў Мінску прайшла перадкалядная сустрэча духавенства і кансэкраваных асоб Мінска-Магілёўскай архідыяцэзіі, якая завяршылася традыцыйным дзяленнем аплаткай.

У пастырскай сустрэчы ў галоўным касцёле сталіцы ўзялі ўдзел Мітрапаліт Мінска-Магілёўскі арцыбіскуп Юзаф Станеўскі, Генеральныя вікарыі архідыяцэзіі біскупы Юрый Касабуцкі і Аляксандр Яшэўскі SDB, дзясяткі святароў і кансэкраваных асоб, якія нясуць служэнне ў парафіях на тэрыторыі Мінскай і Магілёўскай вобласцяў. Сустрэча распачалася з супольнай малітвы Літургіі гадзінаў, пасля чаго духоўны айцец святароў архідыяцэзіі ксёндз канонік Аляксандр Барыла з Вілейкі прамовіў аскетычную канферэнцыю, якую ў перыяд Адвэнту прысвяціў аднаму з сямі галоўных грахоў — зайздрасці.

Старажытны гімн добра ўводзіць вернікаў у Тайну Уцелаўлення Сына Божага.

Частка I 

ДЗЕНЬ І (14 снежня) - Ікас 1

Князь анёлаў быў пасланы з неба сказаць Багародзіцы «Радуйся». Убачыўшы, як Ты, Госпадзе, прыняў цела ад Яе, калі яшчэ ня сьціх бесьцялесны гук ягоных словаў, ён сумеўся і ўсклікнуў: 

Радуйся, бо дзякуючы Табе радасьць зазьзяе! 

Радуйся, бо праз Цябе згіне праклён! 

Радуйся, Узьняцьце з падзеньня Адама! 

Радуйся, Вызваленьне Эвы ад сьлёзаў! 

Радуйся, недасяжная Вышыня думак людзкіх! 

Радуйся, Глыбіня непранікальная нават для анёлаў! 

Радуйся, Пасад Уладара! 

Радуйся, Носьбітка Таго, Хто носіць усё! 

Радуйся, Зорка, праз якую сонца зазьзяла! 

Радуйся, Улоньне Божага ўцелаўленьня! 

Радуйся, бо праз Цябе абнаўляецца ўсё стварэньне! 

Радуйся, бо праз Цябе пакланяемся Творцы! 

* Радуйся, Дзева Маці! 

Кандак 2

Ведаючы сваё чыстае дзявоцтва, сьвятая сьмела адказвае Габрыэлю: «Дзіўнымі і цяжкімі да ўспрыняцьця для душы маёй здаюцца словы твае: што гэта ты кажаш мне пра нараджэньне бяз семя зачатага і клічаш: Алілуя!»

9 снежня 2023 года Папа прыняў на аўдыенцыі дэлегацыі з італьянскіх Рыеці і Макры, адкуль сёлета былі дастаўлены на плошчу святога Пятра бэтлеемскія яслі і святочная ёлка.

Пантыфік адзначыў, што стаенка, якая будзе ўпрыгожваць галоўную ватыканскую плошчу, нагадвае пра атмасферу Божага Нараджэння 1223 года ў Рэацінскай даліне, дзе спыняўся святы Францішак Асізскі. “У яго думках яшчэ быў жывы ўспамін пра падарожжа ў Святую Зямлю, а пячора ў Грэча нагадала бэтлеемскі краявід”, - сказаў Папа, заўважаючы, што менавіта тут святы з дапамогай сваіх паплечнікаў і мясцовага люду стварыў жывыя калядныя яслі, даўшы пачатак традыцыі батлейкі, як мы разумеем яе сёння.

Мы горача молімся, каб спынілася бразганне зброяй, якое прыносіць толькі смерць і разбурэнне, і каб дзяржаўныя і рэлігійныя лідары шукалі шлях дыялогу і прымірэння, - напісаў Папа ў пасланні да Патрыярха Канстанцінопальскага.

Нагодай стала ўрачыстасць святога апостала Андрэя, нябеснага заступніка і абаронцы Канстанцінопальскай Царквы. “Рухомы сардэчнымі пачуццямі братэрскай любові і памятаючы аб глыбокіх сувязях веры, надзеі і любові, якія аб’ядноўваюць Цэрквы-сёстры Рыма і Канстанцінопаля, шлю табе, дарагі Брат у Хрысце, сардэчныя пажаданні”, - гаворыцца ў пасланні Францішка.

Дэлегацыя Святога Пасада знаходзіцца ў гэтыя дні з візітам на Фанары, у рэзідэнцыі Патрыярха Канстанцінопальскага Барталамея І.

У рамках абмену дэлегацыямі на святы святых апекуноў, 29 чэрвеня ў Рыме на ўрачыстасць святых Пятра і Паўла і 30 лістапада ў Стамбуле на ўрачыстасць святога Андрэя, кардынал Курт Кох зноў узначальвае дэлегацыю Святога Пасада на сёлетняе свята Канстанцінопальскага Патрыярхату.

У царкоўным каляндары: 30 лістапада свята св. Апостала Андрэя Першапакліканага - Апякуна Ўсходняй Царквы.

У супольнасцях беларускіх грэка-католікаў гэта традыцыйны Дзень малітвы за ўсе Цэрквы візантыйскай традыцыі.

У дні 29-30 лістапада 2023 г. молімся асабліва за праваслаўных Братоў і Сясцёр, якія 28 лістапада пачалі Перадкалядны пост (“Рождественский пост”).

У Мінску, у грэка-каталіцкім храме Прав. Язэпа, вул. Арджанікідзе, 6 - Боская Літургія ў 18:30, у чацвер, 30.11.23

18 лістапада 2023 года споўнілася 80 гадоў аднаму з самых вядомых членаў Калегіі кардыналаў і яе віцэ-дэкану, аргенцінскаму кардыналу Леанарда Сандры. Ён страціў права ўдзельнічаць у магчымым канклаве.

Рымскае служэнне Сандры пачалося ў 1970 годзе – ён быў накіраваны на вучобу на факультэце кананічнага права Грыгарыянскага ўніверсітэта. У 1971 годзе пачаў навучанне ў Папскай касцёльнай акадэміі, якая выхоўвае дыпламатаў Святога Пасада. Праз тры гады яго прызначылі аташэ апостальскай нунцыятуры на Мадагаскары і Маўрыкіі, а ў 1977 годзе перавялі ў канцылярыю Дзяржаўнага сакратарыята. Пасля дванаццацігадовага служэння ў Ватыкане, у 1989 годзе святар стаў дарадцам нунцыятуры ў Злучаных Штатах Амерыкі.