29 верасня ў мінскім катэдральным касцёле Найсвяцейшага Імя Марыі завершыцца перэгрынацыя фігуры святога Арханёла Міхала ў інтэнцыі мірнага вырашэння крызісу ў нашай краіне.

У верасні фігура нябеснага апекуна Касцёла на Беларусі з італьянскага санктуарыя ў Гаргана наведала катэдры ўсіх чатырох беларускіх дыяцэзій і 21 верасня прыбыла ў Мінск.

Тут у архікатэдральным касцёле Найсвяцейшай Панны Марыі (пл. Свабоды, 9) у свята святога Арханёла Міхала адбудзецца ўрачыстая святая Імша, цэлебрацыю якой узначаліць Генеральны вікарый Мінска-Магілёўскай архідыяцэзіі біскуп Юрый Касабуцкі.

Пачатак у 18.30.

Абвяшчэннем Божага Валадарства Езус супрацьстаіць «паказной» рэлігійнасці, якая не ўплывае на жыццё і паводзіны людзей, адзначыў Пантыфік падчас сустрэчы з вернікамі на малітве «Анёл Панскі» 27 верасня ў Ватыкане.

Як паведамляе беларуская рэдакцыя парталу Vatican News, Папа пракаментаваў евангельскую прыпавесць пра двух братоў, якім бацька загадаў ісці працаваць у вінаграднік. Адзін з іх імпульсіўна адказаў «не», а потым пакаяўся і пайшоў; другі адразу адказаў «так», але на самой справе не зрабіў гэтага.

«Паслухмянасць заключаецца не ў тым, каб казаць “так” ці “не”, але ў дзеяннях, у апрацаванні вінаградніку, у рэалізацыі Божага Валадарства, у добрых учынках. Гэтым простым прыкладам Езус хоча пераўзыйсці рэлігію, якая разумеецца як знешнія і прывычныя дзеянні, якая не ўплывае на жыццё і паводзіны людзей», — сказаў Святы Айцец.

«Віртуальнае» набажэнства не можа параўнацца з асабістым удзелам у літургіі і замяніць яго.

У пасланні Кангрэгацыі Божага Культу і Дысцыпліны Сакрамэнтаў да старшыняў Канферэнцый каталіцкіх біскупаў адзначаецца неабходнасць вяртання да нармальнага літургічнага жыцця вернікаў, дзе гэта дазваляе крызісная сітуацыя ў сферы аховы здароўя.

У праваслаўным манастыры Абуна Гарыма на поўначы Эфіопіі знаходзяцца найстарэйшыя ілюстраваныя пераклады Евангелля. Лічылася, што яны датаваліся XI стагоддзем, аднак нядаўнія даследаванні адсунулі час іх стварэння яшчэ на шэсць стагоддзяў.

Як паведамляе польская рэдакцыя парталу Vatican News, манастыр быў заснаваны, верагодна, каля VI стагоддзя, шмат разоў спальваўся і адбудоваўся. Рукапісы складаюцца з двух ілюстраваных кодэксаў, якія змяшчаюць чатыры Евангеллі і напісаны на класічнай эфіопскай мове.

Спецыяліст у галіне старажытнай Эфіопіі а. Рафал Зарэчны SI распавёў Ватыканскаму радыё, што ў апошнія гады былі праведзены радыевугляродныя даследаванні гэтых рукапісаў. Даследаванні, па яго словах, паказалі, што матэрыял, верагодна, адносіцца да канца IV або пачатку V стагоддзя.

Простая трансляцыя з грэка-каталіцкай парафіі св.Язафата ў г.Ліда. 27.09.20 10:00 паводле беларускага часу.



****
Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

Вучыць моладзь быць не толькі выдатнымі студэнтамі, але і сапраўднымі сведкамі веры, - заклікаў Святы Айцец філіпінскіх каталіцкіх педагогаў.

21-25 верасня 2020 г. каля 1500 каталіцкіх выхавальнікаў, настаўнікаў, універсітэцкіх выкладчыкаў гэтай азіяцкай краіны прымае ўдзел у штогадовым адукацыйным кангрэсе, які сёлета па прычыне пандэміі праходзіць у анлайн-фармаце.

У пасланні за подпісам кардынала Дзяржсакратара П’етра Параліна Пантыфік заклікаў вучыць моладзь не толькі крытычнаму мысленню, але і хрысціянскаму вучэнню і этыцы. Гэта, на яго думку, дапаможа сфармаваць людзей, гатовых браць на сябе вялікую адказнасць у грамадстве і сведчыць у свеце аб сапраўднай веры.

Святы Пасад у чарговы раз заклікаў да мірнага і справядлівага вырашэння грамадска-палітычнай сітуацыі, якая ўзнікла ў Беларусі пасля выбараў.

Арцыбіскуп Іван Юркавіч, Пастаянны назіральнік Апостальскай Сталіцы ў ААН, прыняў удзел у спецыяльных дэбатах па сітуацыі ў Беларусі, якія адбыліся ў Жэневе ў рамках 45-й сесіі Рады па правах чалавека. Ён зазначыў, што для зняцця напружанасці ў краіне неабходны “шчыры дыялог, адмаўленне ад насілля, павага да справядлівасці і правоў”.

Ватыканскі дыпламат нагадаў, што Святы Айцец выказаў свой клопат адносна Беларусі і мясцовага Касцёла падчас “Анёл Панскі” 16 жніўня 2020 г. Візіт у Беларусь арцыбіскупа Пола Рычарда Галахера, Сакратара па адносінах Апостальскай Сталіцы з дзяржавамі, прайшоў 11-14 верасня таксама ў гэтым ключы.

19 верасня адзначаем 290 гадоў каранацыі Жыровіцкай іконы Багародзіцы папскімі каронамі.

Улічваючы вялікую колькасць ацаленняў, якія адбываліся перад іконай Багародзіцы ў Жыровічах і яе копіяй у Рыме, падчас пантыфікату Папы Рымскага Бенядыкта XIII (29 мая 1724 г. - 21 лютага 1730 г.) у 1726 г. было вырашана “ўскласці на галаву Боганемаўляці Ісуса і Багародзіцы Дзевы ў Жыровічах у царкве айцоў Чыну святога Васіля Вялікага Кіеўскай мітраполіі залатыя кароны”.

Намаганнямі тагачаснага пракуратара кіеўскіх мітрапалітаў у Рыме іераманаха Венядыкта Трулевіча ў Рыме былі зробленыя залатыя кароны, якія блаславіў Папа Клімент XII (12 ліпеня 1730 - 6 лютага 1740) і якія княгіня Ганна з роду Сангушкаў, удава Караля Радзівіла, аздобіла каштоўнымі камянямі. Каранацыя адбылася 19 верасня 1730 г. у Жыровічах.

Простая трансляцыя з грэка-каталіцкай парафіі св.Язафата ў г.Ліда. 20.09.20 10:00 паводле беларускага часу.



****
Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

Тэкст трэцяй энцыклікі Папы Францішка будзе апублікаваны 4 кастрычніка, ва ўспамін святога Францішка Асізскага.

Пра гэта са спасылкай на прэс-службу Святога Пасаду паведаміла Каталіцкае інфармацыйнае агенцтва КАІ.

Назва энцыклікі гучыць Fratelli tutti («Усе браты»), і хоць у некаторых краінах вяліся дыскусіі наконт яе гучання, а таксама адносна таго, як пры перакладзе перадаць яе інтэгральны сэнс, аднак варта памятаць, што энцыкліка сама па сабе нясе ўніверсальнае пасланне і скіравана да сэрца кожнага чалавека, як падкрэсліў праграмны дырэктар ватыканскіх СМІ Андрэа Тарньелі.