Рэлігійнае аб’яднанне «Рэспубліканскае рэлігійнае аб’яднанне “Канферэнцыя Каталіцкіх Біскупаў Беларусі”» прайшло перарэгістрацыю.

30 мая Упаўнаважаны па справах рэлігій і нацыянальнасцяў Аляксандр Румак ва ўрачыстай абстаноўцы перадаў арцыбіскупу Юзафу Станеўскаму, Старшыні Канферэнцыі, адпаведныя рэгістрацыйныя дакументы.

Фота: Прэс-служба Канферэнцыі Каталіцкіх Біскупаў у Беларусі / Catholic.by

30 мая 2025 г. Надзвычайны і Паўнамоцны Пасол Рэспублікі Беларусь пры Апостальскім Пасадзе Юрый Амбразевіч уручыў копіі даверчых грамат намесніку дзяржаўнага сакратара Ватыкана па агульных справах Эдгару Пена Парэ.

Аб гэтым парталу catholic.by паведаміла агенцтва БЕЛТА са спасылкай на прэс-службу МЗС Беларусі.

У ходзе размовы абмеркаваны актуальныя пытанні двухбаковых адносін, міжнародная абстаноўка, намечаны перспектывы далейшага развіцця ўзаемадзеяння Беларусі і Ватыкана.

Паводле Catholic.by

У 2025 г. хрысціяне адзначаюць свята Узнясення Гасподняга ў адзін дзень — 29 мая. Гэта адно з дванаццаці найважнейшых (двунадзясятых) святаў у царкоўным календары, якое мае глыбокі сімвалічны і дагматычны сэнс.

Узнясенне Гасподняе заўсёды святкуецца на саракавы дзень пасля Вялікадня. Паводле кнігі Дзеянняў святых Апосталаў, пасля Свайго Уваскрасення Ісус Хрыстос на працягу сарака дзён з'яўляўся сваім вучням, навучаючы іх і ўмацоўваючы іх веру. На саракавы дзень Ён сабраў апосталаў на гары Елеонскай каля Ерусаліма, блаславіў іх і на іх вачах узнёсся на неба.

Першаіерархі Цэркваў Блізкага Усходу ўзялі ўдзел у святкаванні 1700-годдзя Першага Усяленскага сабору ў Нікеі.

Мерапрыемства прайшло пры саборы св. Марка ў каірскім раёне Абасія па запрашэнні прадстаяцеля Копцкай Царквы Патрыярха Тавадраса II. Дэвізам святкавання сталі словы апостала Паўла: «Будзьце аднадушнымі і аднадумцамі» (Флп 2:2), паведамляе «Благовест-инфо» са спасылкай на сайт Копцкай Царквы.

25 мая 2025 года Леў XIV распачаў сваё служэнне як Біскуп Рыма. У Базіліцы Святога Яна на Латэране прайшла яго ўрачыстая інтранізацыя на Рымскую Кафедру. Пасля гэтага Пантыфік наведаў Базіліку Санта-Марыя-Маджорэ, дзе ўшанаваў ікону Найсвяцейшай Панны Марыі “Salus Populi Romani".

Ва ўрачыстым абрадзе ўступлення Пантыфіка на Рымскую Кафедру прынялі ўдзел кардыналы, у тым ліку вікарый Рымскай дыяцэзіі Бальдасарэ Рэйна, біскупы, святары і сотні вернікаў. Папа ўзышоў на кафедру пад працяглыя апладысменты, афіцыйна распачаўшы сваё біскупскае служэнне як пастыр рымлян. У гаміліі ён заявіў, што прыступае да гэтай дзейнасці з жаданнем і гатоўнасцю, “імкнучыся, настолькі, наколькі магчыма, слухаць усіх, каб вучыцца, разумець і прымаць рашэнні разам”.

У суботу, 24 траўня 2025 г. іпадыяканы Арцём Калугін з грэка-каталіцкай парафіі Уваскрасення Хрыстова ў Віцебску і Валеры Гаўрута з грэка-каталіцкай парафіі святых братоў-апосталаў Пятра і Андрэя ў Брэсце атрымалі пасвячэнне ў сан дыякана з рук біскупа Віцебскага Уладыкі Алега Буткевіча. Падзея адбылася ў Глыбокім у касцёле Найсвяцейшай Тройцы.

Больш падрабязна чытайце тут.

22 мая 2025 года мансеньёр Іньяцыа Чэфаліа, Апостальскі нунцый у Беларусі, атрымаў біскупскае пасвячэнне. Сакрамэнт яму ўдзяліў у Базіліцы Святога Пятра ў Ватыкане кардынал-дзяржсакратар П’етра Паралін.

Ва ўрачыстай літургіі, якая прайшла пры Алтары Катэдры на фоне манументальных бронзавых скульптур лацінскіх і усходніх Айцоў Касцёла, бралі ўдзел касцельныя іерархі і папскія дыпламаты на чале з арцыбіскупам Полам Рычардам Галахерам, Сакратаром па адносінах з дзяржавамі і міжнароднымі арганізацыямі.

У сераду 21 мая адбылася першая агульная аўдыенцыя Папы Льва XIV, у якой прынялі ўдзел прадстаўнікі Канферэнцыі Каталіцкіх Біскупаў у Беларусі.

Святы Айцец працягнуў цыкл катэхез на тэму «Езус Хрыстус — наша надзея», распачаты Папам Францішкам, які адышоў у вечнасць роўна месяц таму. Ён заўважыў, што гаворка пойдзе пра евангельскія прыпавесці, якія дапамагаюць нам нанова знайсці надзею, бо паказваюць, як Бог дзейнічае ў гісторыі.

У імя Айца і Сына, і Святога Духа. Мір вам!

Хрыстос уваскрос! Сапраўды ўваскрос!

Я вітаю вас словамі, якія ў многіх рэгіёнах хрысціянскага Усходу нястомна гучаць у гэты пасхальны час, вызнаючы тым самым сутнасць веры і надзеі. І як цудоўна бачыць вас тут непасрэдна з нагоды Юбілейнага года надзеі, для якой уваскрасенне Ісуса з’яўляецца непарушнай асновай. Сардэчна вітаю ў Рыме! Я рады сустрэцца з вамі і прысвяціць вернікам Усходніх Цэркваў адну з першых аўдыенцый майго пантыфікату.

Папа Леў XIV прыняў Канстанцінопальскага Патрыярха Барталамея І. Аўдыенцыя адбылася 19 мая 2025 года. Днём раней ганаровы лідар сусветнага праваслаўя прысутнічаў на Імшы з нагоды пачатку Пятровага служэння Біскупа Рыма.

Падчас сардэчнай сустрэчы Экуменічны Патрыярх павіншаваў Папу з выбраннем. У час размовы, між іншым, ён “падкрэсліў важнасць далейшага развіцця і паглыблення тэалагічнага дыялогу паміж дзвюма Цэрквамі”, а таксама “іх супрацоўніцтва па пытаннях, што маюць грамадскую значнасць, такіх як вяртанне і захаванне міру ва ўсім свеце, падтрымка пакутуючых братоў і ахова навакольнага асяроддзя”, - гаворыцца ў афіцыйным паведамленні Канстанцінопальскага Патрыярхата. Барталамей І таксама згадаў пра братэрскія адносіны і супрацоўніцтва з Папам Францішкам, з якім сустракаўся больш за дзесяць разоў.