Каталіцкі вікарый Паўночнай Аравіі біскуп Альда Берардзі і грэка-праваслаўны Мітрапаліт Гатас Хазім здзейснілі супольную пілігрымку на Святую Гару Афон.

Падарожжа супольнай дэлегацыі з Кувейта праходзіла з 6 па 9 верасня 2026 года. У склад групы ўвайшлі каталіцкія і праваслаўныя святары, семінарыст і свецкія вернікі. Паломнікі наведалі 12 з 20 манастыроў на паўвостраве Халкідыкі. Іх цёпла прымалі ў Сіманапетрскім і Ватапедскім манастырах.

Біскуп Альда Берардзі падкрэсліў высокую значнасць гэтай падзеі для міжканфесійных адносін. "Гэта быў у пэўным сэнсе гістарычны візіт, які адлюстроўвае добрыя адносіны паміж Каталіцкім Касцёлам і праваслаўнай супольнасцю ў Кувейце", - адзначыў ён.

Супольную пілігрымку благаславіў Патрыярх Канстантынопальскі Барталамей І. Ён падтрымаў прапанову Мітрапаліта Хазіма, скіраваную на адкрыццё новых шляхоў да хрысціянскага адзінства.

Падчас паломніцтва ўдзельнікі змаглі зблізку пазнаёміцца з манаскай духоўнасцю Афона. Горныя манастыры падпарадкоўваюцца Канстантынопальскаму Патрыярхату, але валодаюць шырокай аўтаноміяй пад кіраўніцтвам сваіх ігуменаў.

Святая Гара здаўна вядомая сваімі святымі, сярод якіх святы Грыгорый Палама, які жыў у XIV стагоддзі, і святы Арэта, які жыў у VI стагоддзі. Постаць святога Арэты мае асаблівае значэнне, бо ён лічыцца адным з заступнікаў Аравійскага паўвострава для католікаў і праваслаўных.

Супольнае паломніцтва стала яшчэ адным крокам у развіцці братэрскага дыялогу паміж хрысціянамі на Блізкім Усходзе.

Аляксандр Амяльчэня - Vatican News