Леў XIV скіраваў відэапасланне да ўдзельнікаў сустрэчы каталіцкай моладзі, якая праходзіць у Іраку, і заклікаў іх стаць сведкамі надзеі і міру сярод цяжкасцей.

Папа прывітаў удзельнікаў Моладзевай сустрэчы ў Анкаве – "Ankawa Youth Meeting", якая праходзіць у Эрбільскай архідыяцэзіі з 8 па 11 ліпеня 2026 года. Маладыя людзі прыбылі з розных частак Ірака, каб сабрацца ў атмасферы веры і еднасці. Галоўнай тэмай сёлетняга форуму стала місія. Пантыфік нагадаў, што моладзь – гэта не толькі будучыня, але і сучаснасць Касцёла. Нават у цяжкіх абставінах яна паклікана несці ў свеце святло Хрыста.

Быць святлом у свеце, які пакутуе ад вайны і нестабільнасці, заўсёды застаецца складанай задачай. Сярод цемры, якая часам падаецца непераадольнай, Папа заклікаў моладзь не баяцца. "Я з вамі; Касцёл з вамі", – запэўніў у відэапасланні Леў XIV. Ён заклікаў цалкам даверыцца Езусу і слухаць Яго голас у малітве. Пантыфік выказаў глыбокую ўпэўненасць у сілах маладых людзей, якім даручана гэта важнае служэнне.

Святы Айцец прапанаваў тры аспекты святла, здольныя дапамагчы моладзі ў яе місіі. Па-першае, святло неабходна для бачання, што нагадвае пра дар веры і заклікае глядзець на рэчаіснасць вачыма Бога. Па-другое, яно прыносіць цяпло, якое сімвалізуе любоў і патрабуе жывых адносін з Панам праз Эўхарыстыю і споведзь. Нарэшце, святло патрэбна для росту, з'яўляючыся яскравым вобразам надзеі. Гэтая хрысціянская цнота заахвочвае маладых людзей станавіцца сапраўднымі будаўнікамі міру і грамадскага яднання.

На заканчэнне Пантыфік заклікаў ніколі не сумнявацца ў Божай дабрыні і не баяцца Яго планаў. Ён нагадаў словы прарока Ераміі, што планы Бога прызначаны "для вашага дабрабыту, а не для шкоды, каб даць вам будучыню з надзеяй".

Леў XIV даверыў кожнага мацярынскай апецы Марыі, Маці Касцёла. Ён пажадаў моладзі знайсці ў Ёй прыклад жыцця, цалкам даверанага Божай ласцы.

Аляксандр Амяльчэня - Vatican News