У чацвер, 11 снежня 2025 г. у г. Іўе адбылася сесія Кансультатыўнай міжканфесійнай рады пад старшынствам Упаўнаважанага па справах рэлігій і нацыянальнасцей Аляксандра Румака.

Мерапрыемства пачалося са знаёмства ўдзельнікаў з іўеўскай мячэццю, гісторыю якой прадставіў старшыня Мусульманскага рэлігійнага аб’яднання ў Беларусі муфцій Абу-Бекір Шабановіч – ураджэнец Іўя.

Таксама ў межах таго ж пасяджэння ўдзельнікі азнаёміліся з экспазіцыяй Іўеўскага музея нацыянальных культур «Пад адзіным небам праз стагоддзі», дзе знаходзяцца матэрыялы і прадметы культурнай, этнічнай, канфесійнай і лакальнай спадчыны рэгіёну (рыма-католікаў, мусульманаў, яўрэяў, уніятаў).

Важнай старонкай ў гісторыі горада Іўе ды рэгіёна была ўніяцкая супольнасць. На Іўешчыне яна мела ўласныя храмы, аднак у XIX стагоддзі, пад царскім праўленнем, структуры Уніяцкай Царквы былі жорстка ліквідаваныя - у 1839 і наступных гадах.

Далей удзельнікі мерапрыемства ўсклалі кветкі да помніка памяці жыхароў рэгіёна, што загінулі ў гады Вялікай Айчыннай вайны. Затрымаліся так сама на хвіліну духоўнай задумы пры памятным знаку "У гонар дружбы і згоды канфесій Іўеўшчыны".

Грэка-Каталіцкую Царкву на гэтай сесіі прадстаўляў Апостальскі адміністратар для грэка-католікаў Беларусі архімадрыт Сяргей (Гаек).

Адкрываючы пленарную частку сесіі, упаўнаважаны па справах рэлігій і нацыянальнасцей Аляксандр Румак, сказаў:

"Мы з вамі сабраліся, каб даведацца, што яшчэ трэба зрабіць, каб захаваць і прымножыць духоўную спадчыну Беларусі. Беларусь з'яўляецца шматнацыянальнай і шматканфесійнай краінай".

Крыніца інфармацыі і фатаграфіі: ivyenews.by