Камітэт па этыцы Камісіі канферэнцый біскупаў Еўрапейскага Саюзу (COMECE) выступіў з заявай пра этычную неапраўданасць уключэння права на аборт у Хартыю фундаментальных правоў ЕС.

Як паведаміла Беларуская рэдакцыя парталу Vatican News, у дакуменце сцвярджаецца, што павага да чалавечай годнасці на кожным этапе жыцця, асабліва ў сітуацыях поўнай уразлівасці, з’яўляецца фундаментальным прынцыпам дэмакратычнага грамадства. З юрыдычнага пункту гледжання, у еўрапейскім ці міжнародным праве не існуе прызнанага права на аборт. Ні Хартыя фундаментальных правоў ЕС, ані Еўрапейская канвенцыя аб абароне правоў чалавека не падтрымліваюць права на аборт, — гаворыцца ў заяве.

«Еўрапейскі суд па правах чалавека ніколі не абвяшчаў аборт правам чалавека, якое абараняецца Еўрапейскай канвенцыяй аб абароне правоў чалавека. Наадварот, ён абвясціў права на жыццё адным з асноўных правоў чалавека і пацвердзіў у сваёй судовай практыцы, што абарона ненароджанага жыцця з’яўляецца законнай мэтай дзяржаў-удзельніц Канвенцыі»,— сцвярджаецца ў заяве COMECE.

Аборт закранае права на недатыкальнасць прыватнага жыцця, але дзяржава таксама мае законны інтарэс у абароне ненароджаных дзяцей і абавязана забяспечыць, каб законы не ўзмацнялі дыскрымінацыю ў дачыненні да людзей з абмежаванымі магчымасцямі ці не абмяжоўвалі права на свабоду сумлення медыцынскіх работнікаў, — адзначаецца ў дакуменце.

У пераважнай большасці дзяржаў-членаў ЕС дзейнічаюць спецыяльныя законы, якія рэгулююць практыку абортаў. Што тычыцца неаднаразовага закліку ўключыць фундаментальнае права на аборт у Хартыю фундаментальных правоў ЕС, то гэта б запатрабавала вельмі складанай працэдуры: ратыфікацыі ўсімі дзяржавамі-членамі, а таксама дамоўленасці з удзелам прадстаўнікоў усіх нацыянальных парламентаў, кіраўнікоў дзяржаў і ўрадаў, Еўрапейскага парламента і Еўрапейскай камісіі, — падкрэсліваецца ў заяве.

У ЕС існуе вялікая разнастайнасць нарматыўных актаў і канстытуцыйных традыцый, якія рэгулююць правы цяжарных жанчын і ненароджаных дзяцей.

Зыходзячы з павагі да гэтай разнастайнасці, «права на аборт не з’яўляецца агульным прынцыпам заканадаўства ЕС», — падкрэслена ў дакуменце Камісіі канферэнцый біскупаў Еўрапейскага Саюзу.

Vatican News нагадвае, што ў пачатку 2022 года COMECE выказала глыбокую занепакоенасць у сувязі з прапановай уключыць права на аборт у Хартыю фундаментальных правоў ЕС. У ліпені 2022 года еўрапейскія біскупы заклікалі палітычных лідараў «працаваць дзеля ўмацавання адзінства еўрапейцаў, а не садзейнічаць росту ідэалагічных бар’ераў і палярызацыі».

Паводле Catholic.by