Папа Францішак назваў Марыупаль, які носіць імя Марыі, горадам-мучанікам і сімвалам страшнай вайны, якая спусташае Украіну. Яго вельмі асабісты і эмацыянальны зварот прагучаў 13 сакавіка пасля малітвы Анёл Панскі.

«Перад абліччам варварства забойства дзяцей, нявінных людзей і безабаронных мірных жыхароў не існуе стратэгічна слушных прычын: трэба спыніць недапушчальную ўзброеную агрэсію, перш чым яна ператворыць гарады ў могілкі», — адзначыў Папа, словы якога перадае Беларуская рэдакцыя парталу Vatican News.

Кандак 1
Дай нам, Ісусе, Сыне Божы, розум і адчыні нашыя вусны, 

каб нам абвяшчаць славу Імю Твайму –

як некалі Ты вярнуў слых і мову нямому і глухому, 

кажучы “Эфэта”, што значыць “Адчыніся”. 

І вось адчыніліся вушы яго, і язык яго пачаў гаварыць,

і ён усклікнуў: Алілуя.

Тэкст Акафісту - па спасылцы: http://casasloviec.co.uk/index.php?newsid=110

Міжканфесійная малітва мужчынаў словамі Францішка Скарыны прайшла ў Мінску 12 сакавіка 2022 г.

Дзень 11 сакавіка 1990 года, калі а. Аляксандр Надсан адслужыў у Мінску (у касцёле на Кальварыйскіх могілках) Боскую Літургію па-беларуску, традыцыйна лічыцца днём аднаўлення адкрытага літургічнага жыцця грэка-каталіцкіх парафій у Беларусі. 

Малітоўны ўспамін той знаковай падзеі прайшоў у мінскіх грэка-каталіцкіх парафіях у днях 11-12-13 сакавіка 2022 г. 

Старшыня Камісіі Біскупскіх Канферэнцый Еўрапейскай Супольнасці напісаў ліст да Патрыярха Маскоўскага з просьбай паспрыяць неадкладнаму спыненню ваенных дзеянняў супраць украінскага народа.

Кардынал Жан-Клод Олерыш лічыць, што Кірыл павінен тэрмінова звярнуцца да расійскіх уладаў з мэтай праявіць добрую волю для пошуку дыпламатычнага вырашэння канфлікту.

“У гэты змрочны момант для ўсяго чалавецтва, якому спадарожнічаюць інтэнсіўныя пачуцці роспачы і страху, шмат хто глядзіць на Вас, Ваша Святасць, як на таго, хто мог бы даць знак надзеі на мірнае вырашэнне гэтага канфлікту”, - напісаў арцыбіскуп Люксембургскі.

У чацвер 10 сакавіка ў мітрапалітальнай катэдры Унебаўзяцця Найсвяцейшай Панны Марыі ў Львове адбылася экуменічная малітва за Украіну, у якой узялі ўдзел прадстаўнікі розных канфесій і рэлігій.

Набажэнства ўзначаліў спецыяльны пасланнік Папы Францішка кардынал Конрад Краеўскі, Папскі элемазінарый, які прыехаў у ахопленую вайной Украіну, каб прынесці благаслаўленне і дапамогу ад Святога Айца.

9 сакавіка Усеўкраінская Рада Цэркваў і рэлігійных арганізацый скіравала Зварот да рэлігійных лідараў Рэспублікі Беларусь пра недапушчальнасць уцягвання беларускага войска ў вайну супраць Украіны.

У Звароце, апублікаваным на ўкраінскай, беларускай і рускай мовах, адзначаецца, што «гэтая вайна прынесла Украіне шмат пакут, разбурэнняў, гібелі мірных жыхароў і дзяцей, а таксама вымусіла ратавацца ад абстрэлаў больш за два мільёны грамадзян Украіны, якія сталі бежанцамі».

Дзяржаўны Сакратар Яго Святасці Папы Францішка кардынал П’етро Паралін выказаў абурэнне ў сувязі з бамбардзіроўкай дзіцячай бальніцы ва ўкраінскім Марыупалі, а таксама запэўніў у гатоўнасці Святога Пасаду пасярэднічаць у вырашэнні канфлікту паміж Расіяй і Украінай.

«Бамбардзіроўка дзіцячай бальніцы з’яўляецца непрымальнай і беспрычыннай», — сказаў кардынал Дзяржсакратар падчас сустрэчы з журналістамі, каментуючы паведамленне пра расійскі авіяцыйны ўдар па бальніцы з радзільным і педыятрычным аддзяленнем у Марыупалі.

Як паведаміла 10 сакавіка Беларуская рэдакцыя парталу Vatican News, кардынал Паралін заўважыў, што прастора для перамоў з’яўляецца абмежаванай, аднак выказаў спадзяванне на тое, што ўсё ж атрымаецца прыйсці да перагаворнай пазіцыі.

Падчас нядзельнай малітвы Анёл Панскі, якая 6 сакавіка 2022 года прайшла ў Ватыкане, Францішак скіраваў заклік у сувязі з драматычнай сітуацыяй ва Украіне.

“Дарагія браты і сёстры, ва Украіне цякуць рэкі крыві і слёз. Гэта не проста ваенная аперацыя, а вайна, якая сее смерць, разбурэнне і беднасць. Ахвяр становіцца ўсё больш, як і людзей, якія ўцякаюць, асабліва маці і дзяцей. У гэтай шматпакутнай краіне кожную гадзіну драматычным чынам узрастае патрэба ў гуманітарнай дапамозе.

Зварот Канферэнцыі Каталіцкіх Біскупаў у Беларусі.

Мы, каталіцкія біскупы Беларусі, разам з нашымі вернікамі глыбока заклапочаныя тым, што працяглы палітычны канфлікт паміж Расіяй і Украінай перайшоў у фазу вайны. У выніку гінуць людзі, разбураюцца гарады, населеныя пункты і інфраструктура, сотні тысяч бежанцаў вымушаны шукаць прытулку на чужыне.

Вайна — гэта злачынства супраць Бога і чалавека, якое заслугоўвае рашучага і неадкладнага асуджэння (пар. Другі Ватыканскі Сабор, Канстытуцыя Gaudium et spes, 80).

У парафіях Беларускай Грэка-Каталіцкай Царквы Вялікі Пост – духовая падрыхтоўка да Пасхі Гасподняй пачынаецца ў панядзелак – 28 лютага 2022 г.

Першы тыдзень Вялікага Посту характэрызуецца вячэрняй малітвай, на якой чытаецца Вялікі пакаянны канон Пачэснага Андрэя Крыцкага - з зямнымі паклонамі. У пятніцу служыцца Літургія раней асвячаных Дароў.