16 кастрычніка 2023 г. у грэка-каталіцкай парафіі свв. Братоў-Апосталаў Пятра і Андрэя ў Берасці ў малітве адзначана 45-ю гадавіну абрання (16.10.1978) Біскупам Рыму кракаўскага архібіскупа Кароля Вайтылы, які 22.10.1978  уступіў на катэдру св. Пятра з імем Ян Павел ІІ. 

У падзячнай малітве ўдзельнічалі святары Беларускай Грэка-Каталіцкай Царквы, якія ў гэты дзень сабраліся на душпастырскай Сінаксе. Святары абмяркоўвалі праблемы душпастырскай апекі над сем'ямі - выкарыстоўваючы матэрыялы штогадовай сустрэчы біскупаў Усходніх Каталіцкіх Цэркваў Еўропы (якая прайшла ў Афінах з 18 па 21 верасня 2023 г.).

45 гадоў таму, 16 кастрычніка 1978 года, польскі кардынал Караль Вайтыла, тагачасны Мітрапаліт Кракаўскі, быў выбраны Папам, прыняўшы імя Ян Павел ІІ.

Як адзначае з нагоды гадавіны абрання Каталіцкае інфармацыйнае агенцтва КАІ, некаторыя блізкія знаёмыя кардынала Вайтылы лічылі, што яго не зусім звычайныя паводзіны ў дні перад канклавам, у тым ліку асаблівая засяроджанасць і маўклівасць, маглі сведчыць пра тое, што ён, магчыма, прадчуваў тое, што павінна было адбыцца неўзабаве.

Біскуп Аляксандр Яшэўскі, які прымае ўдзел у Генеральнай Асамблеі Сіноду Біскупаў у Ватыкане і прадстаўляе там Беларусь, папрасіў пантыфіка сказаць некалькі словаў для сваіх суайчыннікаў. 

“Вітаю ўсіх вас. Няхай Пан шчодра вас благаславіць. Малюся за вас, за ўсю Беларусь і вы маліцеся за мяне”, - сказаў папа. 

Магілёўскі біскуп апублікаваў відэа ў сваім інстаграме.

45 год таму - 16.10.1978 кардынал Кароль Вайтыла, архібіскуп Кракава быў абраны Біскупам Рыму;

у нядзелю  - 22.10.1978  ён ўрачыста ўступіў на катэдру св. Пятра.

У Мінску малітоўная Дэкада пачынаецца ў Пятніцу 13.10.2023: Боская Літургія ў 18:30 у храме Прав. Язэпа (вул. Арджанікідзе, д. 6); Дэкада зявяршаецца ў Нядзелю 22.10.2023: Боская Літургія ў 11:00 у храме Маці Божай Нястомнай Дапамогі (зав. Снежны, д. 7).

14 кастрычніка ў санктуарыі Гродзенскай дыяцэзіі ў Барунах (Ашмянскі дэканат) адбудзецца ўрачыстасць Маці Божай Барунскай, якая ўшаноўваецца пад тытулам Суцяшальніцы Засмучаных.

Прэс-служба Гродзенскай дыяцэзіі нагадвае, што сёлета адзначаецца 330-годдзе з таго часу, як абраз Маці Божай Барунскай быў прызнаны цудадзейным. 

З нагоды гэтай падзеі пробашч парафіі ў Барунах ксёндз Павел Паўлюкевіч і мясцовыя вернікі шчыра запрашаюць усіх ахвотных узяць удзел ва ўрачыстасці.

Пачатак а 12-й гадзіне.

7 кастрычніка, ва ўспамін Маці Божай Ружанцовай, у Магілёве адбыўся VII Ружанцовы кангрэс, прысвечаны 240-годдзю Магілёўскай архідыяцэзіі, у якую ўвайшлі ўсе католікі лацінскага абраду на тэрыторыі тагачаснай Расійскай імперыі.

З гэтай нагоды ўдзел у сёлетнім кангрэсе ўзялі высокія госці: Апостальскі нунцый у Беларусі арцыбіскуп Антэ Ёзіч, Мітрапаліт Мінска-Магілёўскі арцыбіскуп Юзаф Станеўскі, арцыбіскуп эмэрыт Тадэвуш Кандрусевіч, Генеральны вікарый Мінска-Магілёўскай архідыяцэзіі Юрый Касабуцкі, Апостальскі адміністратар для католікаў візантыйскага абраду ў Беларусі архімандрыт Сяргей Гаек, святары і вернікі з розных мясцін Беларусі. Сімвалічна было і тое, што святкаванне 240-годдзя з часу заснавання Магілёўскай архідыяцэзіі сабрала акурат каля 240 ўдзельнікаў.

4 кастрычніка, ва ўспамін святога Францішка, святой Імшой на плошчы Святога Пятра ў Ватыкане распачалася XVI звычайная Генеральная асамблея Сіноду Біскупаў на тэму сінадальнасці.

Касцёл у Беларусі на Генеральнай асамблеі ў Рыме прадстаўляе біскуп Аляксандр Яшэўскі SDB.

Laudate Deum — пад такой назвай 4 кастрычніка ў Ватыкане была абнародавана апостальская адгартацыя Папы Францішка, у якой Святы Айцец папярэджвае аб тым, што чалавек, прэтэндуючы на месца Бога, уяўляе найбольшую небяспеку для самога сябе.

Кароткі агляд дакумента падае Беларуская рэдакцыя парталу Vatican News.

Вечарам 30 верасня 2023 года на плошчы святога Пятра адбылося перадсінадальнае чуванне Разам (Together), падрыхтаванае экуменічнай Супольнасцю Тэзэ.

Чуванне напярэдадні Сінода Біскупаў па сінадальнасці ўзначаліў Францішак. Удзел у ім прынялі кіраўнікі хрысціянскіх канфесій: праваслаўныя Патрыярхі, прадстаўнікі старажытных Усходніх Цэркваў, Англіканскай Царквы, Сусветнай лютэранскай федэрацыі, Старакаталіцкіх Цэркваў і евангельскіх пяцідзясятніцкіх супольнасцей.

30 верасня Папа Францішак узначаліў на плошчы Святога Пятра Звычайны публічны кансісторый па прызначэнні новых кардыналаў. Кардынальскую годнасць на ім атрымаў 21 іерарх, двое з якіх маюць сувязь з Беларуссю.

Гаворка ідзе перадусім пра арцыбіскупа Клаўдыё Гуджэроцці, які на працягу чатырох гадоў быў Апостальскім нунцыем у Беларусі, з адмысловай місіяй наведаў нашу краіну ў 2020 годзе, а падчас сёлетняга Будслаўскага фэсту прадстаўляў на ім Папу Францішка ў якасці яго спецыяльнага пасланніка. Акрамя таго, кардыналам стаў яшчэ адзін былы нунцый у Беларусі: арцыбіскуп Агасціно Маркэта, адзін з першых пастаянных прадстаўнікоў Папы ў нашай краіне.