У першы дзень сьнежня нашу Царкву напаткала сумная навіна: 1 сьнежня, на 89-м годзе жыцьця, спачыла ў Госпадзе сп. Гэлена Гаек, мама Айца архімандрыта Сяргея Гаека, Апостальскага Візітатара БГКЦ.

Выказваем свае спачуваньні Архімандрыту Сяргею і молімся, каб Госпад прыняў сваю слугу Гэлену ў сваё Валадарства і каб “душа яе знайшла прытулак у сьвеце жывых, у месцы сьветлым, дзе ўсе сьвятыя спачываюць”.

Пахаваньне адбудзецца 6 сьнежня ў касьцёле парафіі сьв. Казіміра ў Лышковічах, каля Ловіча.

Заупакойную Літургію ў Менску 4 сьнежня а 10-ай гадзіне адслужыць а. протапразьбітар Яўген Усошын у капліцы Маці Божай Нястомнай Дапамогі па зав. Сьнежным, 7.

Супакой, Госпадзе, душу слугі Тваёй Гэлены і ўчыні ёй вечную памяць.

Валанцёрскі рух св. Мікалая распачаў у Віцебску дабрачынную акцыю “Святы Мікалай ідзе да дзяцей”, якая будзе трываць ажно да свята Божага Нараджэння.

Згодна з ідэяй акцыі, кожны чалавек можа на нейкі час стацца Святым Мікалаем і падрыхтаваць падарунак для пэўнага дзіцяці з дзіцячага дома альбо з небагатай сям’і. Падарункі могуць змяшчаць у сабе канцэлярскія тавары (напрыклад, альбомы, блакноты, алоўкі, фарбы, размалёўкі, сшыткі, наборы ручак…), сродкі гігіены, цацкі, цёплыя дзіцячыя шкарпэткі, калготы, рукавічкі, заколкі і г.д. ці нешта салодкае. Мы прапануем удзельнікам ,таксама, напісаць ліст ад імя Святога Мікалая, які можа быць адрасаваны як да хлопчыка, так і да дзяўчынкі. Ліст можа быць любой даўжыні і мець свабодны змест, тут могуць быць павіншаванні са святам Божага Нараджэння, заахвочванне да добрых паводзінаў і г.д. Пазней, у акрэсе Божага Нараджэння, сабраныя падарункі будуць урачыста падараваныя дзецям з дзіцячых дамоў альбо бедных парафіяльных сем’яў.

Экуменічны рух мае на ўвазе пошук еднасці ў праўдзе, але найперш малітву і пакуту ў гэтым духоўным экуменізме, — адзначыў Святы Айцец Бэнэдыкт XVI падчас сустрэчы з удзельнікамі пленарнага пасяджэння Папскай рады спрыяння хрысціянскаму адзінству. У гэтыя дні ведамства святкуе 50-годдзе свайго існавання, а яго стварэнне бл. папам Янам ХХІІІ было «вуглавым каменем экуменічнага шляху Касцёла».

Пантыфік выказаў удзячнасць чатыром папярэднікам сённяшняга старшыні рады — кардыналам Аўгустыну Беі, Ёханэсу Віллебрандсу, Эдварду Кассідзі і Вальтэру Касперу, а таксама ўсім супрацоўнікам ведамства. Па словах Святога Айца, за гэтыя 50 год было здзейснена больш глыбокае пазнанне іншых Цэркваў і супольнасцяў, развіццё тэалагічнага дыялога і дыялога любові, былі заснаваны розныя формы супрацоўніцтва.

Маскоўскі Патрыярхат абвяргае крытыку з боку арцыбіскупа Паоло Пеццы ў сувязі з перадачай храма Святой Сям’і ў Калінінградзе ў прыватную маёмасць Рускай Праваслаўнай Царквы. Ардынарый архідыяцэзіі Маці Божай у Маскве 4 лістапада 2010 г. адзначыў, што католікі на працягу 20 гадоў беспаспяхова дамагаліся звароту свайго храма, у якім ўлады зрабілі філармонію. Аб гэтым паведамляе беларуская секцыя Ватыканскага радыё.

Арцыбіскуп адзначыў таксама, што праект закона аб перадачы Маскоўскаму Патрыярхату 15 будынкаў, прыняты Калінінградскай Думай, быў падрыхтаваны «ў адпаведнасці з методыкай лабіравання, у таямніцы, без спасылкі на больш шырокае абмеркаванне і нават без кансультацый з зацікаўленымі бакамі, а менавіта рэлігійнымі супольнасцямі Расіі, якія „не належаць да Рускай Праваслаўнай Царквы“».

Традыцыя адзначаць на Беларусі свята святамучаніка Язафата (Кунцэвіча) 16 верасня была пачалася ад Кіеўскага ўніяцкага мітрапаліта, архібіскупа Полацкага, біскупа Віцебскага, Аршанскага, Мсціслаўскага і Магілёўскага Кіпрыяна Жахоўскага (1674-1693). Ён увайшоў на пасад мітрапаліта ў цяжкі час для усходняй Царквы злучанай з Рымскім Апостальскім Пасадам. Вайна паміж Расіяй і Рэччу Паспалітай 1654-1667 нанесла моцны ўдар па ўніяцкай Царкве. Былі знішчаныя шматлікія храмы, іконы, царкоўнае начынне і святыя месцы. Моцны пераслед закрануў таксама і саміх вернікаў-уніятаў. Мітрапаліт Кіпрыян рабіў шмат захадаў, каб аднавіць духоўнае жыццё ўніяцкай Царквы, яе структуры, матэр’яльны стан.

13 лістапада кожнага году Хрыстовая Царква адзначае памяць сьвяціцеля Яна Залатавуснага, аднаго з самых вялікіх настаўнікаў Царквы.

Сьвяціцель Ян нарадзіўся ў Антыёхіі каля 347 году. Бацька яго, Сэкунд, быў ваеначальнікам і вельмі рана памёр. Маці, Анфуса, другі раз ужо не бралася шлюбам ды ахвяравала ўсе свае сілы на выхаваньне Яна. Сярод настаўнікаў у яго былі выдатныя грэцкія філосафы, але мудрасьць сьвету ўсё адно не перашкодзіла Яну, які вельмі рана пачаў вывучаць Сьвятое Пісаньне і праходзіць катэхэзу ў самога сьвяціцеля Мялета Антыяхійскага, ды пасьля гэтага быў ахрышчаны прыблізна ў 20 год.

Сёньня, 12 лістапада, калі Царква ўшаноўвае сьвятамучаніка Язафата, беларускія вернікі разам з украінцамі і славакамі маліліся на магіле сьвятога Язафата ў базыліцы сьвятога Пятра ў Рыме. Урачыстую Боскую Літургію ўзначаліў Сакратар Кангрэгацыі Ўсходніх Цэркваў архібіскуп Кірыл (Васіль) у саслужэньні сьвятароў абодвух абрадаў з Украіны, Беларусі, Славакіі, Польшчы.

Архібіскуп Кірыл у сваім казаньні, з якім ён зьвярнуўся да прысутных сьвятароў, семінарыстаў, прадстаўнікоў манаскіх супольнасьцяў, вернікаў, зазначыў, што “мучаніцтва – гэта перш за ўсё сьведчаньне веры, глыбокае жаданьне быць заўсёды поруч з Хрыстом, быць верным. Часта імгненны акт мучаніцтва здаецца больш лёгкім, чым вернасьць Хрысту штодзень, чым мець надзею нават тады, калі няма надзеі”.

Уладыка заклікаў усіх верных маліцца і прасіць у Госпада гэты дар надзеі і вернасьці Хрысту на кожны дзень, у любых абставінах жыцьця.

Слова на дзень блаславёнага Язафата, Архібіскупа Полацкага, мучаніка, 16 верасня

Аднаго дня Збавіцель гутарыў з фарысеямі і сказаў ім. што Ён ёсьць добрым Пастырам, і што добры Пастыр душу сваю аддае за сваіх авечак. Кожнаму хрысьціяніну вядома, што за нас, якія ёсьць авечкамі Хрыстовай Аўчарні, Ён аддаў сваё жыцьцё. Сьвятыя, каторыя намагаліся заўсёды насьледваць Хрыста, бо Ён ёсьць нашым праўдзівым Настаўнікам, стараліся таксама ісьці за ягоным прыкладам, і аддаваць жыцьцё для людзей, каторыя былі давераныя іх духоўнай апецы.

12 i 13 лістапада 2010 грэка-каталіцкая парафія святапакутніка Язафата святкуе памяць свайго нябеснага Апякуна.
У тойжа дзень адзначаецца 20 гадоў аднаўлення дзейнасці парафіі.

Урачыстасці будуць праходзіць у храме пачэснай Параскевы Полацкай (вул. Новасёлаў № 70; канчатковы прыпынак аўтобуса № 8, вул. Бабушкіна), дзе звычайна збіраюцца на малітву вернікі полацкай парафіі.

У суботу 13 лістапада у 10:00 гадз. будзе адспяваны Акафіст у гонар святамучаніка Язафата, архібіскупа Полацкага, а ў 11:00 гадз. будзе адслужаная Боская Літургія, якую ўзначаліць Апостальскі Візітатар БГКЦ Архімандрыт (Сяргей).

Cлужбы ў мінскіх грэка-каталіцкіх парафіях

ЧАЦВЕР – 11 лістапада 2010 г.
Парафія Праведнага Язэпа
18:30 гадз. - Вячэрня свята святамучаніка Язафата
(капліца Душпастырскага цэнтра св. Язэпа, вул. Арджанікідзе, д. 6)

ПЯТНІЦА – 12 лістапада 2010 г.

Парафія Праведнага Язэпа і Парафія св. Мікалая Цудатворцы
18:30 гадз. – БОСКАЯ ЛІТУРГІЯ
(капліца Душпастырскага цэнтра св. Язэпа, вул. Арджанікідзе, д. 6)

Парафія Маці Божай Нястомнай Дапамогі і Парафія Святога Духа
18:30 гадз. – БОСКАЯ ЛІТУРГІЯ і Акафіст
(капліца Душпастырскага цэнтра па зав. Снежным, д. 7)

+ + +

Адносна Службаў можна скантактавацца са святарамі:
а. Яўген Усошын 8 (029) 312 28 26 Velcom, 8 (033) 631 55 24
а. Пахом (Кавалёў) 8 (029) 767 70 87 МТС
а. Аляксандр Аўдзеюк 8 (029) 522 70 19 МТС