Генеральны вікарый Мінска-Магілёўскай архідыяцэзіі біскуп Юрый Касабуцкі заяўляе рашучы пратэст на дзеянні супрацоўнікаў сілавых структур, якія ўвечары 26 жніўня заблакавалі ўваход і выхад у касцёле святога Сымона і святой Алены ў Мінску (Чырвоны касцёл).

Іерарх папярэджвае дзяржаўныя ўлады Рэспублікі Беларусь і кіраўніцтва сілавых структур, што падобныя дзеянні з’яўляюцца недапушчальнымі і незаконнымі. Касцёл з’яўляецца святыняй Бога, якую могуць свабодна наведваць усе жадаючыя.

Блакаванне ўваходу і выхаду людзей супярэчыць гарантаванаму Канстытуцыяй Рэспублікі Беларусь праву грамадзянаў на свабоду сумлення і веравызнання, абражае пачуцці вернікаў і выходзіць за межы законаў чалавечых і Божых.

Асаблівая малітва ў Берасці.

Паводле традыцыі ў жніўні кожнага года грэка-католікі Берасцейшчыны ўзгадваюць у малітве жахлівыя падзеі 1942 г. – арышт Экзарха беларускіх грэка-католікаў Антона Неманцэвіча (першыя дні жніўня 1942 г.) і карніцкія акцыі нямецкіх нацыстаў, што спалілі нэа-унійныя (уніяцкія) вёскі на Палессі.

Працягваючы шматгадовую традыцыю, у нядзелю 23 жніўня 2020 г. апостальскі візітатар беларускіх грэка-католікаў архімандрыт Сяргей (Гаек) наведаў грэка-каталіцкую парафію ў Берасці і ў парафіяльнай капліцы адслужыў Боскую Літургію за Беларусь – у саслужэнні масцовага душпастыра а. Ігара Кандрацьева.

Простая трансляцыя з грэка-каталіцкай парафіі св.Язафата ў г.Ліда. 23.08.20 10:00 паводле беларускага часу.



****
Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

21 жніўня 2020 па просьбе арцыбіскупа Тадэвуша Кандрусевіча яго прыняў міністр унутраных спраў Рэспублікі Беларусь Юрый Караеў.

Сустрэча пачалася з таго, што кіраўнік беларускага каталіцкага епіскапату і міністр акрэслілі сваё бачанне сённяшняй сітуацыі ў краіне з мэтай пошуку мірнага вырашэння крызісу ў грамадстве.

Арцыбіскуп Тадэвуш Кандрусевіч выказаў занепакоенасць складанай грамадска-палітычнай сітуацыяй, якая склалася ў краіне пасля прэзідэнцкіх выбараў і жорсткіх дзеянняў сілавых структур.

Малітоўная ініцыятыва, распачатая маладымі католікамі з Гродна і беларускімім студэнтамі ў Польшчы, знаходзіць усё большую падтрымку ў суседняй краіне.

«Мы можам малітваю падтрымаць мірныя змены ў Беларусі, а таксама аказаць матэрыяльную дапамогу Касцёлу ў гэтай краіне, які дапамагае пераследаваным і іх сем’ям», — паведамляе ксёндз Лешэк Крыжа, кіраўнік групы Дапамогі Касцёлу на Усходзе пры Канферэнцыі Епіскапату Польшчы.

Словы святара перадае Каталіцкае інфармацыйнае агенцтва КАІ.

19 жніўня прыёр экуменічнай манаскай супольнасці Тэзэ брат Алоіс звярнуўся да беларусаў і запэўніў у малітве за беларускі народ.

Зварот брата Алоіса да беларусаў быў апублікаваны на партале супольнасці Тaize.fr.

«Дарагія беларускія сябры, з вялікаю ўвагаю мы ў Тэзэ сочым за навінамі з вашай ўзлюбленай краіны. Памятайце, што ў гэтую хвіліну мы вельмі блізкія з вамі. Мы ўзгадвалі пра вашу краіну падчас супольнай малітвы, і разам з маімі братамі я малюся за вас наступнымі словамі:

Уваскрослы Хрыстэ, Ты ведаеш нашы клопаты і выпрабаванні. І нястомна Ты кажаш нам: нічога не бойцеся, Я тут.

Прымас Польшчы арцыбіскуп Войцех Поляк у спецыяльным паведамленні, разасланым па парафіях Гнезненскай архідыяцэзіі, просіць у нядзелю 23 жніўня асаблівым чынам маліцца за Беларусь і беларусаў — «нашых сясцёр і братоў».

«Многія з нас у апошнія дні з увагаю сочаць за падзеямі ў Беларусі», — піша арцыбіскуп Поляк у паведамленні, змешчаным на партале Прымаса Prymaspolski.pl. Іерарх цытуе словы Папы Францішка з заклікам да спынення гвалту і павагі да справядівасці і права, сказаныя Святым Айцом падчас малітвы Анёл Панскі ў мінулую нядзелю.

Касцёл у Англіі і Уэльсе далучыўся да малітоўнай ініцыятывы ў падтрымку справядлівасці і міру ў Беларусі. 18 жніўня ў касцёлах Вялікабрытаніі людзі разам маліліся «Ойча наш» за беларускі народ.

Як паведаміла беларуская рэдакцыя парталу Vatican News, старшыня Камісіі па міжнародных справах Канферэнцыі Біскупаў Англіі і Уэльса біскуп Дэклан Ланг ад імя епіскапату заклікаў брытанскі ўрад да супрацоўніцтва з іншымі краінамі з мэтай вырашэння праблемы парушэння правоў чалавека ў Беларусі.

Увечары 18 жніўня па запрашэнні арцыбіскупа Тадэвуша Кандрусевіча ў Чырвоным касцёле на супольную малітву за Беларусь разам сабраліся прадстаўнікі розных хрысціянскіх канфесій, юдаізму і ісламу.

Малітва была прымеркавана да агульнаеўрапейскай акцыі малітоўнай салідарнасці з беларускім народам, якая праходзіла па ініцыятыве Еўрапейскай канферэнцыі каталіцкіх камісій па пытаннях справядлівасці і міру Iustitia et Pax.

Па дарозе ў касцёл святога Сымона і святой Алены арцыбіскуп Тадэвуш Кандрусевіч затрымаўся каля следчага ізалятара на вуліцы Валадарскага. Каля сцен старадаўняга астрога іерарх разам з сабранымі людзьмі, якія пратэстуюць супраць незаконных затрыманняў, памаліўся адну таямніцу святога Ружанца.

А 19-й гадзіне па мінскім часе, калі хрысціяне ўсёй Еўропы маліліся за Беларусь, сабраныя ў Чырвоным касцёле разам памаліліся «Ойча наш».

16 жніўня Канферэнцыя Рыма-каталіцкіх Біскупаў Украіны выказала словы падтрымкі і малітоўнай еднасці з беларускім народам.

У лісце на імя Старшыні Канферэнцыі Каталіцкіх Біскупаў у Беларусі арцыбіскупа Тадэвуша Кандрусевіча каталіцкія іерархі братняй краіны пішуць:

«Рыма-Каталіцкі Касцёл ва Украіне яднаецца з беларускім народам і з усімі, хто шукае праўду, а таксама моліцца аб салідарнасці, або аб зразуменні чаканняў, за якія змагаюцца людзі. Да гэтага нас запрашае святы апостал Павел, які ў Пасланні да Галатаў заахвочвае вернікаў: „Насіце цяжары адзін аднаго“ (Гал 6, 2). Мы не можам застацца абыякавымі да лёсу пацярпелых толькі за тое, што яны жадаюць лепшага жыцця.