Вучыць моладзь быць не толькі выдатнымі студэнтамі, але і сапраўднымі сведкамі веры, - заклікаў Святы Айцец філіпінскіх каталіцкіх педагогаў.

21-25 верасня 2020 г. каля 1500 каталіцкіх выхавальнікаў, настаўнікаў, універсітэцкіх выкладчыкаў гэтай азіяцкай краіны прымае ўдзел у штогадовым адукацыйным кангрэсе, які сёлета па прычыне пандэміі праходзіць у анлайн-фармаце.

У пасланні за подпісам кардынала Дзяржсакратара П’етра Параліна Пантыфік заклікаў вучыць моладзь не толькі крытычнаму мысленню, але і хрысціянскаму вучэнню і этыцы. Гэта, на яго думку, дапаможа сфармаваць людзей, гатовых браць на сябе вялікую адказнасць у грамадстве і сведчыць у свеце аб сапраўднай веры.

Святы Пасад у чарговы раз заклікаў да мірнага і справядлівага вырашэння грамадска-палітычнай сітуацыі, якая ўзнікла ў Беларусі пасля выбараў.

Арцыбіскуп Іван Юркавіч, Пастаянны назіральнік Апостальскай Сталіцы ў ААН, прыняў удзел у спецыяльных дэбатах па сітуацыі ў Беларусі, якія адбыліся ў Жэневе ў рамках 45-й сесіі Рады па правах чалавека. Ён зазначыў, што для зняцця напружанасці ў краіне неабходны “шчыры дыялог, адмаўленне ад насілля, павага да справядлівасці і правоў”.

Ватыканскі дыпламат нагадаў, што Святы Айцец выказаў свой клопат адносна Беларусі і мясцовага Касцёла падчас “Анёл Панскі” 16 жніўня 2020 г. Візіт у Беларусь арцыбіскупа Пола Рычарда Галахера, Сакратара па адносінах Апостальскай Сталіцы з дзяржавамі, прайшоў 11-14 верасня таксама ў гэтым ключы.

19 верасня адзначаем 290 гадоў каранацыі Жыровіцкай іконы Багародзіцы папскімі каронамі.

Улічваючы вялікую колькасць ацаленняў, якія адбываліся перад іконай Багародзіцы ў Жыровічах і яе копіяй у Рыме, падчас пантыфікату Папы Рымскага Бенядыкта XIII (29 мая 1724 г. - 21 лютага 1730 г.) у 1726 г. было вырашана “ўскласці на галаву Боганемаўляці Ісуса і Багародзіцы Дзевы ў Жыровічах у царкве айцоў Чыну святога Васіля Вялікага Кіеўскай мітраполіі залатыя кароны”.

Намаганнямі тагачаснага пракуратара кіеўскіх мітрапалітаў у Рыме іераманаха Венядыкта Трулевіча ў Рыме былі зробленыя залатыя кароны, якія блаславіў Папа Клімент XII (12 ліпеня 1730 - 6 лютага 1740) і якія княгіня Ганна з роду Сангушкаў, удава Караля Радзівіла, аздобіла каштоўнымі камянямі. Каранацыя адбылася 19 верасня 1730 г. у Жыровічах.

Простая трансляцыя з грэка-каталіцкай парафіі св.Язафата ў г.Ліда. 20.09.20 10:00 паводле беларускага часу.



****
Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

Тэкст трэцяй энцыклікі Папы Францішка будзе апублікаваны 4 кастрычніка, ва ўспамін святога Францішка Асізскага.

Пра гэта са спасылкай на прэс-службу Святога Пасаду паведаміла Каталіцкае інфармацыйнае агенцтва КАІ.

Назва энцыклікі гучыць Fratelli tutti («Усе браты»), і хоць у некаторых краінах вяліся дыскусіі наконт яе гучання, а таксама адносна таго, як пры перакладзе перадаць яе інтэгральны сэнс, аднак варта памятаць, што энцыкліка сама па сабе нясе ўніверсальнае пасланне і скіравана да сэрца кожнага чалавека, як падкрэсліў праграмны дырэктар ватыканскіх СМІ Андрэа Тарньелі.

Простая трансляцыя з грэка-каталіцкай парафіі св.Язафата ў г.Ліда. 13.09.20 10:00 паводле беларускага часу.



****
Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

16 верасня Антэ Ёзіч, тытулярны арцыбіскуп Цысы, прызначаны Апостальскім нунцыем у Беларусь, прыме біскупскае пасвячэнне ў нядаўна пабудаваным касцёле Святой Сям’і санктуарыя Маці Божай Астраўной у Соліне (Харватыя).

Як паведаміла харвацкая рэдакцыя парталу Vatican News, сакрамэнт пасвячэння ў ступені епіскапату Антэ Ёзічу ўдзеліць Дзяржаўны Сакратар Яго Святасці Папы Францішка кардынал П’етро Паралін падчас урачыстай святой Імшы, якая распачнецца ў 10.00.

Антэ Ёзіч нарадзіўся 16 студзеня 1967 г. у горадзе Трыль (Харватыя). Прэзбітэрскае пасвячэнне прыняў 28 чэрвеня 1992 г. як святар Спліт-Макарскай архідыяцэзіі. У 1995 г. пачаў рыхтавацца да дыпламатычнай службы ў Папскай дыпламатычнай акадэміі. З 1999 г. працаваў у Апостальскай нунцыятуры ў Індыі. З 2003 г. па 2009 г. быў сакратаром нунцыятуры ў Расіі. У 2009 г. стаў дарадцам нунцыятуры на Філіпінах.

З 11 па 14 верасня пройдзе рабочы візіт у Рэспубліку Беларусь Сакратара па адносінах з дзяржавамі Дзяржаўнага Сакратарыяту Святога Пасаду арцыбіскупа Пола Рычарда Галахера.

Пра гэта са спасылкай на Міністэрства замежных спраў Беларусі паведамляе БЕЛТА.

Увечары 11 верасня запланавана сустрэча міністра замежных спраў Беларусі У. Макея з арцыбіскупам Галахерам.

У Мінску маліліся за пацярпелых на мірных акцыях пратэсту ў Беларусі.

Увечары 5 верасня ў мінскім касцёле святога Сымона і святой Алены вялікая колькасць людзей узяла ўдзел у святой Імшы за пацярпелых, забітых і зняволеных на мірных акцыях пратэсту ў Беларусі. Цэлебрацыю ўзначаліў Генеральны вікарый Мінска-Магілёўскай архідыяцэзіі біскуп Юрый Касабуцкі.

Да іх духоўна далучыліся яшчэ каля трох тысяч, якія глядзелі анлайн-трансляцыю набажэнства на партале Catholic.by.

У суботу 5 верасня ў касцёле святога Сымона і святой Алены ў Мінску (Чырвоны касцёл) будзе цэлебравацца святая Імша ў інтэнцыі ўсіх пацярпелых, забітых і зняволеных падчас мірных акцый у Беларусі, а таксама іх родных і блізкіх.

Пачатак у 19.00.

Дзверы святыні на плошчы Незалежнасці адчынены для ўсіх. Не толькі католікі, але кожны вернік можа ўзяць удзел у святой Імшы або духоўна далучыцца да супольнай малітвы.