Папа Францішак заклікаў далучыцца да малітвы аб еднасці хрысціян. 

 Падчас трансляцыі “Анёл Панскі” 17 студзеня 2021 г. ён нагадаў, што асабіста ўзначаліць Нешпары ў канцы адмысловага Тыдня малітваў.

“Пачынаецца Тыдзень малітваў аб еднасці хрысціян. У гэтым годзе тэма спасылаецца на настаўленне Езуса: “Заставайцеся ў Маёй любові: прынесяце багаты плён” (пар. Ев. Яна 15,5-9). У панядзелак, 25 студзеня, мы завершым яго цэлебрацыяй Нешпараў (Вячэрні) у базыліцы св. Паўла за Мурамі разам з прадстаўнікамі іншых хрысціянскіх супольнасцей, якія прысутнічаюць у Рыме. У гэтыя дні будзем маліцца ў адзін голас аб выкананні жадання Езуса: “Каб усе былі адно”, - заклікаў Папа.

Паводле https://www.vaticannews.va/

Простая трансляцыя з грэка-каталіцкай парафіі св.Язафата ў г.Ліда. 17.01.21, 11:00.

****

Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

16 студзеня 1931 г. Яго Святасць Папа Пій ХІ прызначыў манаха-рэдэмптарыста а. Мікалая Чарнецкага біскупам тытулярным Лебеда і Апостальскім візытатарам для вернікаў Каталіцкай Царквы візантыйска-славянскага абраду (па-за межамі Галіцкай мітраполіі). 

Яго архірэйская хіратонія адбылася 2 лютага 1931 г. у Рыме з рук біскупа Рыгора Хамышына (са Станіславава), біскупа Яна Меле (з італа-албанскай епархіі Лунгра ў Італіі) і біскупа Пётра Бучыса (МІС).

Сядзібай Апостальскага візытатара была спачатку Варшава (манастыр рэдэмптарыстаў ), а потым манастыр у Ковелі.

Грэка-католікі Беларусі ўзгадваюць гэтую важную падзею і раз яшчэ асэнсоўваюць жыццёвы подзвіг свайго іерарха – блаславёнага святамучаніка Мікалая.

Дзень малітвы за нявінна зняволеных

У царкоўным каляндары візантыйскай традыцыі 16 студзеня святкуецца "Пакланенне пачэсным кайданам святога Апостала Пятра" (царкоўнаслав.: Поклонение честным веригам святого Апостола Петра). Пачэсныя кайданы Апостала Пятра захоўваюцца і ўшаноўваюцца у храме у san Pietro in vincoli ў Рыме.

Гэтае свята асабліва блізкае грэка-каталіцкім вернікам Беларусі. У мінулым яно напамінала ўніятам, што за Еднасць з Рымскім Пасадам Апостала Пятра часто прыходзіць плоціць кайданамі. Што і мела месца ў час пераследу ўніятаў у царскай Расеі ды ў Савецкім Саюзе.

Склалася багаслужбова традыцыя, што гэтае свята стала днём малітвы і посту за зняволеных, асабліва нявінна зняволеных.

16 студзеня – Дзень нараджэння Апостальскага Нунцыя ў Рэспубліцы Беларусь Высокадастойнага Архібіскупа Антэ Ёзіча. Ён нарадзўся 16.01.1967 г. у мясцовасці Трыль, у Харватыі.

Архімандрыт Сяргей (Гаек) накіраваў Архібіскупу словы віншаванняў.

Увечары 15 студзеня ў мінскай архікатэдры Найсвяцейшага Імя Марыі адбылася святая Імша аб вечным супакоі для спачылага Мітрапаліта Філарэта, Ганаровага Патрыяршага Экзарха ўсяе Беларусі, які ў гэты дзень быў пахаваны ў жыровіцкім Свята-Успенскім манастыры.

Цэлебрацыю ўзначаліў Ганаровы Мітрапаліт Мінска-Магілёўскі на пенсіі арцыбіскуп Тадэвуш Кандрусевіч. Эўхарыстыю ў галоўнай святыні Мінска-Магілёўскай архідыяцэзіі канцэлебравалі Апостальскі візітатар для беларускіх грэка-католікаў архімандрыт Сяргей Гаек і іншыя святары лацінскага і ўсходняга абрадаў.

У гаміліі арцыбіскуп успомніў словы праваслаўнага іерарха, з якімі той звярнуўся да яго з нагоды 65-годдзя: «Не нам, Пане, не нам, але Твайму Імені няхай будзе слава». Паводле арцыбіскупа, у гэтых словах Пісання схавана тамніца служэння і веліч Мітрапаліта Філарэта: «Ён імкнуўся не да сваёй славы, а да Божай».

Слова Апостальскага візітатара для грэка-католікаў Беларусі Архімандрыта Сяргея на дзень пахавання Мітрапаліта Філарэта

Госпад Ісус Хрыстос паклікаў да сябе Мітрапаліта Філарэта.

Калі сёння ягонае пачэснае цела складаюць у Беларускую зямлю – у Жыровіцкім манастыры пад сценамі храма Узвышэння святога Крыжа Гасподняга, у якім на працягу гісторыі маліліся хрысціяне розных традыцый і канфесій: грэка-католікі, праваслаўныя і рыма-католікі – Міласэрнаму Хрысту Чалавекалюбцу давераем ягоную душу ў заўпакойнай малітве.

Дзякуем Госпаду за архіпастырскае служэнне Мітрапаліта Філарэта, за ягоную хрысціянскую  адкрытасць на міжканфесійны дыялог, які спрыяў пабудове адносінаў узаемнай павагі паміж грэка-католікамі і праваслаўнымі ў Беларусі.

У пятніцу 15 студзеня ў мінскім катэдральным касцёле Найсвяцейшага Імя Марыі арцыбіскуп Тадэвуш Кандрусевіч узначаліць цэлебрацыю святой Імшы за спачылага Мітрапаліта Філарэта, які адышоў у вечнасць 12 студзеня.

Вернікі Каталіцкага Касцёла ў Беларусі разам са сваімі пастырамі падзяляюць смутак праваслаўных братоў з прычыны смерці Ганаровага Патрыяршага Экзарха ўсяе Беларусі Мітрапаліта Філарэта, які шмат зрабіў для развіцця добрых адносін паміж прадстаўнікамі дзвюх галоўных хрысціянскіх канфесій нашай краіны.

У сваім спачувальным слове Ганаровы Мітрапаліт Мінска-Магілёўскі арцыбіскуп Тадэвуш Кандрусевіч назваў спачылага праваслаўнага Экзарха сваім сябрам і настаўнікам.

14 студзеня спаўняецца 105 гадоў з дня нараджэння ксяндза Уладзіслава Чарняўскага — легендарнага святар-адраджэнца, які шмат зрабіў для таго, каб у нашых касцёлах сёння гучалі малітвы і Божае слова на роднай мове.

Уладзіслаў Чарняўскі нарадзіўся 14 студзеня 1916 г. у засценку Амбружына, што на Смаргоншчыне, у шматдзетнай каталіцкай сям’і. Прэзбітэрскае пасвячэнне прыняў кастрычніку 1944 г., пасля чаго на працягу дзевяці гадоў нёс святарскае служэнне ў розных парафіях на тэрыторыі Літвы, а ў кастрычніку 1953 года стаў пробашчам парафіі Адведзінаў Найсвяцейшай Панны Марыі ў Вішневе, што на Валожыншчыне.

Старшыня Папскай рады спрыяння хрысціянскаму адзінству кардынал Курт Кох скіраваў спачуванні Патрыяршаму Экзарху ўсяе Беларусі Мітрапаліту Мінскаму і Заслаўскаму Веніяміну ў сувязі са смерцю Ганаровага Патрыяршага Экзарха ўсяе Беларусі Мітрапаліта Філарэта.

Як паведаміла 14 студзеня беларуская рэдакцыя парталу Vatican News, на сваёй інтэрнэт-старонцы дыкастэрыя нагадала, што ў 1981–1989 гадах спачылы іерарх кіраваў Аддзелам знешніх царкоўных сувязяў Маскоўскага Патрыярхату, «спрыяючы развіццю адносін паміж Рускай Праваслаўнай Царквой і Каталіцкім Касцёлам».

У 1990–2013 гадах ён узначальваў Беларускую Праваслаўную Царкву, «імкнучыся да духоўнага адраджэння беларускага народа і ўмацавання добрых адносін паміж хрысціянамі краіны».

Паводле Catholic.by