16 красавіка 2021 г. Бэнэдыкту XVI, 265-му Пантыфіку ў гісторыі Касцёла, споўнілася 94 гады. Як пераемнік св. Яна Паўла II, ён кіраваў Касцёлам з 19 красавіка 2005 г. да адстаўкі ў 2013 г.

Бэнэдыкт XVI быў першым немцам на Пасадзе св. Пятра з часоў Віктара II (1055-1057) Сваё папскае імя ён выбраў са спасылкай на “Папу міру” Бэнэдыкта XV і апекуна Еўропы св. Бэнэдыкта Нурсійскага. Да абрання Наступнікам св. Пятра, у 1983-2005 гг., быў прэфектам Кангрэгацыі Веравучэння і адным з самых блізкіх паплечнікаў Яна Паўла ІІ.

5 красавіка 2015 г.- у Лондане адышоў да Госпада мітрафорны протаіерэй Аляксандар Надсан, беларускі грэка-каталіцкі святар, апостальскі візытатар для беларусаў грэка-католікаў у Замежжы.

 
Памінальная Літургія за супакой ягонай душы будзе служыцца ў Мінску ў храме Душпастырскага цэнтра Праведнага Язэпа (вул. Арджанікідзе, 6) у пятніцу, 16 красавіка 2021 г., у 18:30. 

+++ 

"Са святымі супакой, Хрысце, душу заснулага слугі Твайго, 

 дзе няма ні болю, ні суму, ні плачу, але жыццё бясконцае".

З прычыны росту напружання на ўкраінска-расійскай мяжы і пагрозы аднаўлення ваенных дзеянняў у гэтым рэгіёне Агульнаўкраінская рада Цэркваў і рэлігійных арганізацый апублікавала 12 красавіка спецыяльную заяву, у якой заклікае «да пошуку шляхоў мірнага вырашэння» канфлікту.

Як паведамляе Каталіцкае інфармацыйнае агенцтва КАІ, ва ўступе аўтары ўказваюць на абвастрэнне сітуацыі ў Данецкай і Луганскай вобласцях на ўсходзе Украіны і «парушэнне рэжыму спынення агню, што зноў прывяло да непапраўных людскіх страт, а таксама выклікала глыбокі боль і чалавечыя цярпенні».

14 красавіка ў Мінску прайшло 80-е пленарнае пасяджэнне Канферэнцыі Каталіцкіх Біскупаў у Беларусі, прымеркаванае да 30-годдзя адраджэння структур Каталіцкага Касцёла ў нашай краіне.

У пасяджэнні ўзялі ўдзел усе беларусія іерархі і Апостальскі Нунцый у Рэспубліцы Беларусь арцыбіскуп Антэ Ёзіч. Прысутнічаў таксама арцыбіскуп Тадэвуш Кандрусевіч, які пасля выхаду на пенсію і адыходу ад пастырскага кіраўніцтва Мінска-Магілёўскай архідыяцэзіяй працягвае выконваць шэраг функцый у структуры ККББ.

На пачатку пасяджэння яго ўдзельнікі памаліліся за здароўе Апостальскага візітатара для беларускіх грэка-католікаў архімандрыта Сяргея Гаека, які нядаўна быў шпіталізаваны з пнеўманіяй ў адну з мінскіх бальніц, а таксама за ўсіх хворых на каранавірус і медыцынскіх работнікаў.

Благаслаўлёны Юрый Матулевіч, біскуп Віленскі, генеральны настаяцель кангрэгацыі ксяндзоў марыянаў, заснавальнік легендарнага кляштару ў Друі — пастыр, які асаблівым чынам клапаціўся пра духоўнае дабро вернікаў розных нацыянальнасцяў, у тым ліку беларусаў. 13 красавіка споўнілася 150 гадоў з дня яго нараджэння.

Нарадзіўся Юрый Матулевіч (Юргіс Матцляйціс) 13 красавіка 1871 года ў Лугіне непадалёк ад Марыямпаля. Рана застаўся сіратою, і будучага біскупа гадаваў старэйшы брат Ян.

У 1891–1893 гадах вучыўся ў каталіцкай духоўнай семінарыі ў Кельцах. Як адзін з найбольш здольных вучняў быў скіраваны ў мітрапалітальную духоўную акадэмію ў Пецярбургу. У 1898 годзе прыняў прэзбітэрскае пасвячэнне. Багаслоўскую адукацыю працягваў у швейцарскім Фрыбургу, дзе абараніў доктарскую дысертацыю.

12 красавіка 2021 г., пасля цяжкай хваробы, памерла ў Стрыі, ва ўзросце 74 гадоў, святой памяці +Вера Шаўчук, маці Яго Блажэнства Святаслава, Першаіерарха УГКЦ. 

Патрыярху Святаславу і Сям'і Спачылай выказваем словы спачування ды Уваскросламу Хрысту Чалавекалюбцу даручаем душу Спачылай. 

Вечная Ей памяць!

13 красавіка адзначаецца 30-годдзе адраджэння структур Каталіцкага Касцёла ў Беларусі і ўстанаўлення Мінска-Магілёўскай архідыяцэзіі.

13 красавіка булай Ex quadam святы Ян Павел ІІ устанавіў Мінска-Магілёўскую архідыяцэзію і Мітраполію, адрадзіўшы такім чынам касцёльныя структуры на тэрыторыі незалежнай Беларусі пасля дзесяцігоддзяў панавання на нашых землях бязбожнага савецкага рэжыму і пераследу веры і Касцёла.

З гэтай нагоды ў нядзелю 18 красавіка ў мінскім катэдральным касцёле Найсвяцейшага Імя Марыі а 13-й гадзіне адбудзецца ўрачыстая святая Імша.

Пра стан здароўя архімандрыта Сяргея Гаека.

9 красавіка Апостальскі Візітатар для грэка-католікаў архімандрыт Сяргей Гаек быў шпіталізаваны з дыягназам пнеўманія лёгкай ступені ў адну з бальніц горада Мінска. На дадзены момант ён забаяспечаны медыцынскай апекай. Пачуваецца добра. 

Просім пра малітву за скарэйшае вяртанне да здароўя архімандрыта Сяргея.

Простая трансляцыя з грэка-каталіцкай парафіі св.Язафата ў г.Ліда. 11.04.21, 11:00.

****

Падпішыцеся на ютуб-канал Andrei Buinich - будзьце з намі ў кантакце, каб ведаць пра ўсе нашы трансляцыі і цікавыя відэаматэрыялы!

Святы Айцец скіраваў заклік у сувязі з набліжэннем свята Божай Міласэрнасці, якое будзе адзначацца ў Касцёле 11 красавіка 2021 г. Ён заклікаў маліцца аб ласцы прабачэння і дзейснай любові да бліжняга.

Францішак нагадаў, што ўстанаўліваючы свята Божай Міласэрнасці, св. Ян Павел ІІ, заявіў: “Літургія гэтай нядзелі нібыта акрэслівае шлях міласэрнасці, які аднаўляе сувязь чалавека з Богам і стварае новыя адносіны братэрскай салідарнасці паміж людзьмі”.