У чацьвер, 19 чэрвеня, а 17:00 гадзіне Яго Эмінэнцыя кардынал Тарчызіо Бэртонэ – дзяржсакратар Яго Сьвятасьці Папы Рымскага Бенядыкта XVI – сустрэўся з вернікамі Беларускай Грэка-каталіцкай Царквы. Сустрэча адбылася ў душпастарскім Цэнтры імя сьвятога Язэпа па вул. Арджанікідзэ.

Першапастыр Паўсюднай (Каталіцкай) Царквы Яго Сьвятасьць Папа Рымскі Бенядыкт XVI пасылае у нашую Богам любімую Бацькаўшчыну Беларусь свайго бліжэйшага Супрацоўніка – Дзяржаўнага Сакратара Сьвятой Сталіцы Кардынала Тарчызіо Бэртонэ. Ягоны афіцыйны візіт па запрашэньні Ураду Беларусі адбудзецца 18 – 22 чэрвеня 2008 г.

Агульная інтэнцыя:

Каб кожны хрысьціянін умацоўваў глыбокае асабістае сяброўства з Хрыстом і дзякуючы гэтаму мог перадаваць кожнаму чалавеку, якога сустрэне, сілу Яго любові.

Місіянерская інтэнцыя:

Каб Міжнародны Эўхарыстычны Кангрэс у Квэбэку (Канада) дапамог глыбей усьвядоміць, што Эўхарыстыя зьяўляецца сэрцам Царквы і крыніцай евангелізацыі.

З блаславеньня Апостальскага візітатара архімандрыта Сяргея Гаека, у нядзелю, 1 чэрвеня, ва ўсіх парафіях Беларускай Грэка-Каталіцкай Царквы адбылася малітва за сьвятасьць сьвятароў.

З 23 па 26 траўня 2008 г. праходзіў візіт Дзяржаўнага сакратара Ватыкана кардынала Тарчызіо Бэртонэ ва Ўкраіну. 23 траўня высокі госьць прыехаў ў Львоў, дзе сустрэўся з біскупамі УГКЦ Уладыкам Ігарам (Возьнякам), Уладыкам Уладзімірам (Війцішыным), Уладыкам Сцяпанам (Мяньком), Уладыкам Яраславам (Прырызам), Уладыкам Міланам (Шашыкам). Асноўнай мэтай візіту кардынала Бэртонэ ў Львоў была беатыфікацыя рыма-каталіцкай манахіні сястры Марты Вэцкай, якая адбылася 24 траўня.

21-23 траўня 2008 г. на плошчы Данілы Галіцкага ў Львове, адбылася малітоўная акцыя “Кніга міру”, удзел у якой прыняла моладзь розных хрысьціянскіх канфесіяў. Мэта акцыі – аб’яднаць у супольнай малітве маладых людзей розных канфесіяў, сьведчыць пра Хрыста і Яго любоў у жыцьці кожнага чалавека.

У нядзелю, 25 траўня, нашыя парафіяне далучыліся да урачыстай працэсіі рыма-каталіцкіх вернікаў, якая была прысьвечана ўшанаваньню Сьвятых Дароў (Сьвята Божага Цела). Пасьля Сьв. Імшы ў касьцёле сьв. Роха на Залатой Горцы, сьвятары і вернікі прайшлі са Сьвятымі Дарамі па праспекту Незалежнасьці да Чырвонага Касьцёла, а потым па вул. Інтэрнацыянальнай да рыма-каталіцкай катэдры. На гэтым шляху працэсія чатыры разы прыпынялася дзеля чытаньня Евангельля і слуханьня казаньняў. Першы раз – на плошчы Перамогі, другі – перад палацам Рэспублікі, трэці – перад Чырвоным Касьцёлам і чацьвёрты – перад катэдрай. Надвор'е было не найлепшым, але яно не перашкодзіла шматлікім вернікам засьведчыць сваю паўсюдную хрысьціянскую веру беларускай сталіцы.

17 траўня адбыўся агульны выезд скаўцкай суполкі нашай парафіі сумесна з бацькамі у лес. Мэтай гэтай вандроўкі было не толькі адпачыць на прыродзе, паесьці смачнай кашы, прыгатаванай на вогнішчы самімі дзецьмі, але і ўрачыстая цэрымонія ўступленьня малодшых дзяцей у зграю ваўчанят, і пераход старэйшых у скаўты.

22 траўня 2008 г. прэс-служба Ватыкана паведаміла пра тое, што Сьвяты Айцец Бенядыкт XVI блаславіў рашэньне Сіноду Біскупаў Украінскай Грэка-Каталіцкай Царквы пра прызначэньне айца Тараса Сэньківа, настаяцеля Чыну братоў меншых сьвятога Францішка з Паўлы “Мінімі”, дапаможным біскупам Стрыйскай епархіі, надаючы яму тытулярны пасад Січэны (Siccenna).