21 лютага 2009 года, на 39-м годзе жыцьця, пасьля цяжкай хваробы памёр у Рыме айцец Адрыян Цкуй, канцлер Апостальскага Візітатара для ўкраінцаў грэка-католікаў у Італіі.

Нарадзіўся ён 11 лютага 1970 года ў Мэльбурне. У 1992-1997 гг. быў семінарыстам у папскай Калегіі сьв. Язафата ў Рыме.

13 сьнежня 1997 года атрымаў сьвятарскія пасьвячаньні і быў прызначаны на парафію Сьвв. Ап. Пятра і Паўла ў Мэльбурнскай Епархіі УГКЦ.

Традыцыю сьвяткаваньня дня сьвятога Валянціна – апекуна ўсіх закаханых – мы прынялі ад Захаду зусім нядаўна. Аднак мала хто ведае, што мошчы сьвятога, у гонар якога названае сьвята, захоўваюцца ў грэка-каталіцкай царкве Нараджэньня Найсьвяцейшай Багародзіцы ў горадзе Самборы Львоўскай вобласці (Украіна).
Мошчы сьвятога Валянціна – частка чэрапа, некалькі костак, маленькая шкляная капсула, у якой як мяркуецца, знаходзіцца міра, – захоўваюцца ў невялікай шкляной труне.

14 лютага 2009 г. а 14-й гадзіне ў Нацыянальным выставачным цэнтры «Белэкспа» (вул. Я. Купалы, 27) у межах XVІ Мінскай міжнароднай кніжнай выставы-кірмаша «Кнігі Беларусі — 2009» адбудзецца прэзентацыя першага перакладу на беларускую мову Дакументаў Другога Ватыканскага Сабору, зьдзейсьненага Секцыяй па перакладзе літургічных тэкстаў і афіцыйных дакументаў Царквы пры Канферэнцыі Каталіцкіх Біскупаў у Беларусі па ініцыятыве Мітрапаліта Мінска-Магілёўскага арцыбіскупа Тадэвуша Кандрусевіча.

Дакументы Другога Ватыканскага Сабору (1962–1965 гг.) — гэта канстытуцыі, дэкрэты, дэкларацыі, прысьвечаныя розным сфэрам жыцьця і дзейнасьці Каталіцкай Царквы, яе місіі ў сьвеце, ролі ў грамадзтве, адносінам Царквы да іншых рэлігій і веравызнаньняў.

Паводле catholic.by

23 студзеня 2009 г. Сьвяты Айцец Бенядыкт XVI зацьвердзіў рашэньне Сіноду Сірыйскай Каталіцкай Царквы абраць Ігнацыя Іосіфа ІІІ Юнана Патрыярхам Сірыйскай Каталіцкай Царквы.
64-гадовы Іосіф Юнан дагэтуль узначальваў епархію Нью-Джэрсі (ЗША) і быў таксама Апостальскім Візітатарам для сіра-католікаў Цэнтральнай Амерыкі.
Сёньня Сіра-Каталіцкая Царква налічвае, па розных дадзеных, ад 130 да 162 тысячаў вернікаў у Іраку, Сірыі, Ліване, Іярданіі, Турцыі, ЗША і іншых краінах. Царква мае 81 парафію, 118 сьвятароў і 14 біскупаў.

Паводле Благовест-Инфо.

Біскупская хіратонія а. д-ра Сьвятаслава Шаўчука, рэктара Львоўскай духоўнай семінарыі Сьвятога Духа, адбудзецца ў дзень сьвята Дабравешчаньня Найсьвяцейшай Багародзіцы, 7 красавіка 2009 г. у Архікатэдральным саборы cьвятога Юрыя. Боская Літургія распачнецца аб 11-й гадзіне. Высьвячаць дапаможнага біскупа епархіі Пакрова Найсьвяцейшай Багародзіцы ў Буэнас-Айрэсе будуць Першаярарх УГКЦ Яго Блаславенства Уладыка Любамір, Уладыка Ігар Возьняк, Архібіскуп Львоўскі, Уладыка Міхаіл Мікіцей, епарх епархіі Пакрова Найсьвяцейшай Багародзіцы ў Буэнас-Айрэсе.

Нагадаем, што 14 студзеня 2009 г. Сьвяты Айцец Бенядыкт XVI блаславіў рашэньне Сіноду Біскупаў Украінскай Грэка-Каталіцкай Царквы аб прызначэньні айца Сьвятаслава Шаўчука дапаможным біскупам епархіі Пакрова Найсьвяцейшай Багародзіцы ў Буэнас-Айрэсе (Аргентына).

Паводле Дэпартамэнту інфармацыі УГКЦ

7 студзеня 2009 г. Сьвяты Айцец Бенядыкт ХVІ блаславіў рашэньне Патрыяршага Сіноду Біскупаў, які адбыўся 2-9 верасьня 2008 г., і прызначыў Уладыку Дыянісія Ляховіча Апостальскім Візітатарам для ўкраінцаў грэка-католікаў у Італіі і Іспаніі. Пра гэта паведамляе вэб-старонка УГКЦ у Італіі: www.chiesaucraina.it. Акрамя таго, згодна з дэкрэтам Сьвятога Айца Бенядыкта ХVІ ад 15 сьнежня 2008 г. ад выкананьня гэтых абавязкаў вызвалены Ўладыка Глеб Ланчына.

Паводле Дэпартамэнту інфармацыі УГКЦ

У гэтым годзе успамін Пратулінскіх мучанікаў прыпадае на пятніцу, таму гэты тыдзень стаў падрыхтоўчым да гэтага так важнага для нас сьвята. Кожны дзень у 18:30, з панядзелка па чацьвер, пасьля Боскай літургіі мы сьпяваем адну частку Акафіста да Пратулінскіх мучанікаў, а ў пятніцу а 18:30 айцец Андрэй Абламейка з удзелам усіх менскіх панамароў адслужыць Боскую Літургію ў гонар Мучанікаў.

У суботу 24.01 заплянаваны Дзень духоўнай адновы для панамароў Алтарнага брацтва Пратулінскіх мучанікаў, Боскую літургію ў 11:00 ўзначаліць наш Апостальскі візітатар архімандрыт Сяргей Гаек.

Пасьля падзелу Рэчы Паспалітай і далучэньня беларускіх земляў Расейская дзяржава пасьлядоўна рэалізоўвала ў жыцьцё старую ідэю: чыя ўлада, таго і рэлігія. Расея слушна пабойвалася, што ўніяцтва будзе перашкаджаць русіфікацыі і заняволеньню краю і чалавека. У 1839 годзе цар Мікалай І з дапамогай біскупа-здрадніка Сямашкі і ягоных спадручных ажыцьцявіў ліквідацыю Ўніяцкай Царквы ў Беларусі. Царскі ўрад пазбавіў уніятаў сваіх біскупаў і сьвятароў, якія не згадзіліся праводзіць рэформы, накіраваныя на разрыў еднасьці з Каталіцкай Царквой. Аднак вернікі, пазбаўленыя пастыраў, самі ахвярна баранілі сваю Царкву, сваю Літургію, нярэдка нават коштам уласнага жыцьця.

Трэці дзень Тэалагічна-Пастаральнага Кангрэса (16 студзеня) распачаўся традыцыйна Літургіяй Слова. Урывак Евангелья паводле сьв. Лукі пра добрага самарытаніна разважаў кардынал Шон Патрык Валлей, арцыбіскуп Бостана.

Пасьля Lectio Divina маленькая мексіканская дзяўчынка Одра разам са сваімі бацькамі выканала гімн сёлетняй сустрэчы сем’яў з такім запалам, што ўся зала падхапіла гімн і сьпявала разам на біс.

Другі дзень VI Сусьветнай сустрэчы семяў распачаўся літургіяй слова ў зале выставачнага цэнтра «Экспа Банкомер» у Мехіка, дзе адбываюцца ўсе пасяджэньні тэалагічнага-душпастырскага кангрэса. Затым адбылася ўрачыстая працэсія з абразом Маці Божай Гвадэлупскай. Багародзіцу ўдзельнікі сустрэчы прывіталі сьпевам «La Gaudalupa», добра вядомым у Лацінскай Амерыцы.

Прапаведнік Папскага дома а. Раньеро Канталамессо выступіў з дакладам на тэму «Сям’я і сэксуальнасьць», у якім падкрэсьліў пільную неабходнасьць вучыць маладое пакаленьне, як жыць у чыстасьці і захоўваць маральныя каштоўнасьці.