Ад пачатку бягучага тыдня ў грэка-каталіцкіх парафіях і супольнасцях Беларусі праходзіць эстафета малітвы за Украіну. У Мінску эстафету малітвы пачалі ў аўторак,18 лютага, валанцёры Руху св. Мікалая ў парафіяльнай капліцы св. Язэпа. Эстафету пераняла парафія Маці Божай Нястомнай Дапамогі (серада), далей – парафія св. Мікалая (чацвер), парафія Праведнага Язэпа (пятніца). 22 лютага, у Мясапусную бацькоўскую суботу, у грэка-каталіцкіх парафіях Беларусі будуць служыцца памінальныя Службы за ўсіх ахвяраў гвалту на Кіеўскім Майдане. У пятніцу ўвечары, 21 лютага, – напярэдадні Бацькоўскай суботы – памінальныя Службы былі адслужаныя ў парафіях Праведнага Язэпа і Святога Духа.

У суботу, 22 лютага, а 10-ай гадз. заупакойная служба за ахвяраў Кіеўскага Майдана будзе адслужана ў парафіі Маці Божай Нястомнай Дапамогі па зав. Снежным, д. 7.

Канферэнцыя Каталіцкіх Біскупаў Беларусі абвясціла нядзелю 23 лютага 2014 г. Днём малітвы за Украіну.

Умілаваныя ў Хрысце Пану браты і сёстры!

З вялікім непакоем мы сочым за тым, што адбываецца ў апошні час ва Украіне. Дадзеная сітуацыя з’яўляецца для нас заклікам да малітоўнай салідарнасці ў інтэнцыі мірнага вырашэння гэтага драматычнага канфлікту.

Папа Францішак заахвоціў да мірнага заканчэння канфлікту ва Украіне, запэўніўшы ў сваёй блізкасці да ўкраінскага народа і малітве за ахвяр насілля, членаў іх сем’яў і параненых.

Па прыкладзе Святога Айца звяртаемся з вялікай просьбай да ўсіх вернікаў Каталіцкага Касцёла ў Беларусі, каб нядзеля 23 лютага гг. стала Днём малітвы і посту ў інтэнцыі Украіны.

Заахвочваем, каб у гэты дзень ва ўсіх касцёлах і капліцах нашай краіны падчас святых Імшаў і эўхарыстычных набажэнстваў узносілася малітва за Украіну, каб усе бакі спынілі любыя акты насілля і шукалі згоды і міру.

Міласэрнаму Богу давяраем усіх ахвяраў гэтага канфлікту, а сем’і загінуўшых запэўніваем у малітоўнай памяці, выказваючы ім словы сардэчнага спачування.

19 лютага 2014 Святы Айцец Францішак прыняў наступныя кадравыя рашэнні ў Кангрэгацыі Усходніх Цэркваў:

- пацвердзіў Прэфекта Кангрэгацыі Яго Эмінэнцыю Кардынала Леанарда Сандры і Сакратара Кангрэгацыі Высокадастойнага Архібіскупа Кірыла Васіля, S.I.;

- прызначыў новых членаў Кангрэгацыі, сярод якіх і Уладыку Йосіфа Верта, Біскупа Епархіі Перамянення Гасподняга ў Навасібірску і Ардынарыя для грэка-католікаў у Расійскай Федэрацыі.

- пацвердзіў кансультараў Кангрэгацыі, сярод якіх Архімандрыта Сяргея Гаека, Апостальскага Візітатара для грэка-католікаў Беларусі, і мітрафорнага протаіерэя Васіля Гаверу, Апостальскага Дэлегата для грэка-католікаў у Казахстане і Сярэдняй Азіі.

З вялікай прыкрасцю сцвярджаю, што заклікі Цэркваў пра недапушчэнне кровапраліцця і мірнае ўрэгуляванне канфлікту не было пачута. У імя Божае асуджаю гвалт, неабачнасць і грэбаванне правамі чалавека і воляй народа. Падкрэсліваю, што той, хто мае ўладу, нясе ўсю паўнату адказнасці за тое, што адбываецца ў краіне.

Звяртаюся да ўсіх: неадкладна спыніце кровапраліцце!
Заклікаю ўсіх дзяцей Царквы да посту, малітвы і салідарнасці з пацярпелымі.
У гэты момант, калі над Украінай навісла бяда братазабойства, хай ва ўсіх храмах УГКЦ звоняць званы.

+ Святаслаў, Кіеў, 18.02.2014

Яго Святасць Папа Францішак заклікаў да мірнага заканчэння канфлікту ва Украіне.
“З глыбокай занепакоенасцю я сачу за тым, што адбываецца ў гэтыя дні ў Кіеве”, - прызнаўся Святы Айцец 19 лютага 2014 г. на заканчэнне агульнай аўдыенцыі, якая праходзіла на плошчы св. Пятра.

“Я запэўніваю ў маёй блізкасці да ўкраінскага народу і малюся за ахвяр насілля, членаў іх сем’яў і параненых.
Заклікаю ўсе бакі спыніць любыя акты насілля і шукаць згоды і міру ў краіне”, - сказаў Папа.

Рэакцыя Святога Айца паследавала пасля інфармацыі аб шматлікіх смяротных ахвярах супрацьстаяння ў Кіеве.
Гэта не першы за апошнія тыдні заклік Папы Францішка да мірнага вырашэння палітычнага крызісу і канфлікту ва Украіне.

Паводле Беларускай Праграмы Radio Vaticana

85 гадоў гісторыку Леаніду Лычу

8 лютага 2014 г. спаўняецца 85 гадоў Леаніду Лычу, вядомаму патрыёту - гісторыку і выкладчыку.
Шчыра віншуем Юбіляра!

З нагоды Юбілею Грэка-каталіцкі клуб інтэлігэнцыі імя св. Кірылы Тураўскага запрашае на духоўную сустрэчу, якая адбудзецца ў чацвер 13 лютага 2014 г. у 18:30 у Душпастырскім цэнтры Праведнага Язэпа (вул. Арджанікідзе д. 6; с. метро “Аўтазаводская”).

Інтэрнэт-выданне “Народныя навіны Віцебска” падвяло вынікі галасавання, у адпаведнасці з якім Чалавекам года Віцебска-2013 чытачы абралі Уладзіслава Бліна — першага біскупа Віцебскай дыяцэзіі, які быў прызначаны на гэтую пасаду 13 кастрычніка 1999 года дэкрэтам Папы Яна Паўла ІІ.

У час, калі біскуп Уладзіслаў Блін быў ардынарыем, у дыяцэзіі былі ўзведзены новыя касцёлы: толькі ў Віцебску іх было пабудавана тры. Па стане здароўя першы кіраўнік дыяцэзіі быў вымушаны падаць у адстаўку, і 25 лютага 2013 г. Папа Бэнэдыкт XVI задаволіў яго прашэнне.

За біскупа Віцебскага на пенсіі Уладзіслава Бліна прагаласавалі 1194 чалавекі, што склала 53%.

Адбылася сустрэча кансэкраваных асобаў Мінска-Магілёўскай архідыяцэзіі

4 лютага з нагоды Дня кансэкраванага жыцця, які адзначаецца штогод у свята Ахвяравання Пана, у мінскай парафіі Св. Яна Хрысціцеля праходзіла сустрэча кансэкраваных асобаў Мінска-Магілёўскай архідыяцэзіі. На сустрэчу прыбыў дапаможны біскуп архідыяцэзіі Юрый Касабуцкі, які ўзначаліў Імшу.

“Я блізка Украіны і малюся за тых, хто страціў жыццё ў гэтыя дні і за іх сем’і”, - запэўніў Францішак украінскіх вернікаў і пілігрымаў, якія сённня былі прысутнымі на малітве “Анёл Панскі” на плошчы св. Пятра. “Я спадзяюся, што дойдзе да канструктыўнага дыялогу паміж дзяржаўнымі ўстановамі і грамадзянскай супольнасцю”, - сказаў Францішак. Святы Айцец пажадаў, каб у краіне не дайшло больш да гвалтоўных дзеянняў, але каб у сэрцы кожнага перамог дух супакою і пошуку сумеснага дабра.

17 студзеня ў Мінскім епархіяльным упраўленні адбылася сустрэча Патрыяршага Экзарха ўсяе Беларусі Мітрапаліта Мінскага і Слуцкага Паўла з Апостальскім Нунцыем у Беларусі арцыбіскупам Клаўдыё Гуджэроцці.

У сустрэчы ўдзельнічаў таксама вікарый Мінскай епархіі Беларускай Праваслаўнай Царквы епіскап Барысаўскі Веніямін.