Святы Айцец заклікаў святароў ісці за прыкладам Добрага Пастыра, рабіць Касцёл закваскай адзінства ў свеце і не зачароўвацца мадэлямі поспеху і прэстыжу, наследуючы святых.

27 чэрвеня 2025 года Леў XIV узначаліў святую Імшу ў Базіліцы Святога Пятра з нагоды ўрачыстасці Найсвяцейшага Сэрца Езуса і Дня малітвы аб святасці святароў. Падчас літургіі ён удзяліў сакрамэнт прэзбітэрскага пасвячэння трыццаці двум дыяканам.

Прэфект Дыкастэрыі па справах Усходніх Цэркваў, кардынал Клаўдыё Гуджэроці, выказвае блізкасць Касцёла вернікам, якія пацярпелі ад замаху ў Дамаску: "Мы ўсе ахвяры".

Замах у Дамаску, які забраў жыцці 25 чалавек і пакінуў 63 параненых, вяртае Сірыю ў кантэкст вайны. Напад на грэка-праваслаўную царкву быў сімвалічным ударам у сэрца хрысціянскай супольнасці ў момант напружанасці паміж Усходам і Захадам.

Гэта першае такое месца малітвы ў Цэнтральнай Азіі. У Астане, сталіцы Казахстана, 20 чэрвеня 2025 г. інаўгураваны марыйны санктуарый, прысвечаны пераследаваным хрысціянам. Ён дзейнічае пры царкве Маці Божай Нястомнай Дапамогі ў казахстанскай сталіцы, дзе дзесяцігоддзямі савецкія ўлады змагаліся з каталіцтвм.

Як паведамляе National Catholic Register, новы санктуарый быў створаны па ініцыятыве амерыканскай арганізацыі Nasarean.org. Гэта ўжо шостае такое месца ў свеце, але першае ў рэгіёне, які асабліва зведаў рэлігійныя пераследы, асабліва ў камуністычныя часы.

24 чэрвеня ў Мінску пройдзе міждыяцэзіяльная канферэнцыя Testis fidei et misericordiae («Сведка веры і міласэрнасці»), прысвечаная святарам, законным сёстрам і свецкім асобам, аб'яўленым Касцёлам святымі ці благаслаўлёнымі, паходжаннем ці служэннем звязаным з беларускімі землямі, якія аддалі сваё жыццё за бліжніх.

Першую канферэнцыю, якая будзе адбывацца штогод, анансаваў 12 чэрвеня арцыбіскуп Юзаф Станеўскі падчас пастырскай сустрэчы ў Валожыне, аб чым пісаў сайт catholicminsk.by. Канферэнцыя мае на мэце наблізіць гераічныя постаці беларускіх мучанікаў Касцёла шырокай грамадскасці.

21 чэрвеня 2025 года Папа Леў XIV прыняў у ватыканскім Апостальскім палацы Надзвычайнага і Паўнамоцнага Пасла Рэспублікі Беларусь пры Святым Пасадзе Юрыя Амбразевіча, які ўручыў яму свае даверчыя граматы.

Як паведамляе інфармацыйнае агенцтва БЕЛТА са спасылкай на прэс-службу МЗС Беларусі, пасля ўрачыстай цырымоніі адбылася асобная сустрэча пасла Беларусі са Святым Айцом, у ходзе якой былі закрануты пытанні міждзяржаўнага парадку дня, уключаючы сітуацыю ў рэгіёне, а таксама абмеркаваны пытанні далейшага развіцця двухбаковага супрацоўніцтва Ватыкана і Беларусі на розных узроўнях, гуманітарныя ініцыятывы, праекты ў сферы адукацыі і культуры.

19 чэрвеня 1982 года – 43 гады таму – у капліцы святой Монікі ў Рыме прэзбітэрскае пасвячэнне атрымаў малады аўгустыніянін з ЗША, Роберт Фрэнсіс Прэвост – цяперашні Папа Леў XIV.

На той момант будучаму Пантыфіку было 27 гадоў. Годам раней ён склаў вечныя манаскія абяцанні ў Ордэне святога Аўгустына, у які ўступіў у 1977 годзе. Ужо маючы ступень магістра тэалогіі, атрыманы ў Чыкага, Прэвост вывучаў кананічнае права ў Папскім універсітэце святога Тамаша Аквінскага ў Рыме, шырока вядомым як “Angelicum”, дзе пазней атрымае ліцэнцыят і доктарскую ступень. У 1985 годзе ён далучыцца да місіі аўгустыніянаў у Перу.

З 20 па 22 чэрвеня ў Гродне адбудуцца Агульнабеларускія дні моладзі.

Рэлігійная падзея пройдзе пад дэвізам «Мы — пілігрымы надзеі» ў парафіi Найсвяцейшага Адкупіцеля ў Гродне (вул. Курчатава, 41). Запрашаюцца маладыя людзі з усіх дыяцэзій Касцёла на Беларусі.

16 чэрвеня 2025 г. пачынаецца Пятроўскі пост, вядомы таксама як Апостальскі або Пятроўка. Гэты летні пост устаноўлены ў памяць пра святых першавярхоўных апосталаў Пятра і Паўла і іх падрыхтоўку да прапаведвання Евангелля ўсяму свету.

Пятроўскі пост лічыцца адным з найстаражытнейшых у хрысціянстве. Першыя згадкі пра яго сустракаюцца ў пісаннях III-IV ст., у прыватнасці ў "Апостальскай традыцыі" св. Іпаліта Рымскага. Першапачаткова гэты пост быў звязаны з кампенсацыяй для тых, хто па нейкіх прычынах не змог вытрымаць Вялікі пост перад Вялікаднем. Аднак з цягам часу ён набыў самастойнае значэнне, стаўшы перыядам падрыхтоўкі да свята святых апосталаў Пятра і Паўла, якое адзначаецца 29 чэрвеня.

“Мудрасць праяўляецца не там, дзе раздзяляюць, а там, дзе яднаюць”, - падкрэсліў Папа, заклікаючы адрозніваць рэальнасць ад ідэалогій і станавіцца будаўнікамі адзінства.

14 чэрвеня 2025 года Леў XIV узначаліў спецыяльную юбілейную аўдыенцыю. З нагоды Святога года такія сустрэчы праводзіў яшчэ Францішак, разглядаючы падчас іх розныя аспекты цноты надзеі праз прызму сведчання вялікіх духоўных постацей. З-за спякотнага надвор’я ў Рыме аўдыенцыя прайшла не на Плошчы Святога Пятра, а ў базіліцы.