Учора, 6 жніўня, мы адзначалі сьвята Перамяненьня Госпада нашага Ісуса Хрыста – адно з найбольшых сьвятаў Гасподніх у царкоўным календары. У перамяненьні Хрыстос адкрыў вучням вечную і непамінальную сваю славу. Гэтым Ён умацаваў іхнюю веру, каб яны не пахіснуліся ў час выпрабаваньняў.

Боскую Літургію ў нашай парафіі ўзначаліў Архімандрыт Сяргей (Гаек) у спаўслужэньні з а. Андрэем Абламейкам, а. Яўгенам Усошыным, душпастырам Парафіі сьв. Міколы Цудатворцы, і новапрызначаным а. дыяканам Аляксандрам Аўдзеюком.

Напрыканцы Сьвятой Літургіі Ўладыка прывітаў са сьвятам усіх прысутных, асабліва а. Аляксандра, які ад гэта дня прызначаны на дыяканскае служэньне ў нашай парафіі, і блаславіў садавіну, якая паводле старажытнай традыцыі асьвячаецца ў гэты дзень як “пачаткі пладоў”.