3 лютага Папа Францішак завяршыў свой візіт у Дэмакратычную Рэспубліку Конга, дзе ён знаходзіўся з 31 студзеня ў межах Апостальскага візіту ў дзве афрыканскія краіны.

Як паведаміла Беларуская рэдакцыя парталу Vatican News, раніцай самалёт з Пантыфікам на борце вылецеў з аэрапорта Нджылі ў Кіншасе ў сталіцу Паўднёвага Судана Джубу. Святога Айца праводзіў прэзідэнт ДРК Фэлікс Чысекедзі, афіцыйныя асобы і мясцовыя біскупы. Перад вылетам Папа развітаўся з прадстаўнікамі ўлад і духавенствам.

Па прыбыцці самалёта ў аэрапорт Джубы ў Паўднёвым Судане, разам з Апостальскім нунцыем у гэтай краіне на борт падняліся англіканскі арцыбіскуп Кэнтэрбэрыйскі Джасцін Уэлбі і мадэратар Генеральнай асамблеі Прэсбітэрыянскага Касцёла Шатландыі пастар Ен Грыншылдс, з якімі Папа Францішак правядзе гэтую частку свайго афрыканскага падарожжа.

На лётным полі Святога Айца вітаў паўднёвасуданскі прэзідэнт Сальва Кіір Маярдзіт. Прагучалі гімны Ватыкана і Паўднёвага Судана, пасля чаго адбылася першая размова Папы Францішка і прэзідэнта Кііра ў VIP-пакоі будынка аэрапорта. Потым яны скіраваліся ў State House, які з’яўляецца рэзідэнцыяй улад Паўднёвага Судана.

Папа прабудзе ў Джубе да нядзелі 5 лютага, пасля чаго вернецца ў Рым.

Паводле Catholic.by