Следам за Папам Францішкам, які падчас агульнай аўдыенцыі 28 снежня ў Ватыкане папрасіў аб малітве за свайго цяжка хворага папярэдніка Бэнэдыкта XVI, з такою ж просьбаю маліцца за Папу эмэрыта звяртаюцца да духавенства і вернікаў каталіцкія біскупы Беларусі.

Паважаныя святары, браты і сёстры манаскіх супольнасцяў, дарагія браты і сёстры ў Хрысце!

Сёння, пасля агульнай аўдыенцыі, якая адбылася ў Ватыкане, дырэктар прэс-службы Святога Пасаду Матэо Бруні заявіў наступнае:

«Што датычыцца стану здароўя Папы эмэрыта, за якога Папа Францішак папрасіў аб малітве напрыканцы ранішняй агульнай аўдыенцыі, магу пацвердзіць, што ў апошнія некалькі гадзін адбылося пагаршэнне стану здароўя з прычыны пажылога ўзросту. Сітуацыя на дадзены момант застаецца пад кантролем, Папа на пенсіі знаходзіцца пад пастаянным медыцынскім наглядам. Пасля заканчэння агульнай аўдыенцыі Папа Францішак скіраваўся ў кляштар Mater Ecclesiæ да Бeнeдыкта XVI. З’яднаемся ў малітве за Папу на пенсіі», — сказаў кіраўнік ватыканскай прэс-службы.

Заахвочваем вас, шаноўныя святары, духавенства, усіх вернікаў Каталіцкага Касцёла ў Беларусі, а таксама ўсіх людзей добрай волі, па просьбе Святога Айца Францішка далучыцца да малітваў за Папу на пенсіі Бэнэдыкта XVI.

Падтрымаем нашай малітвай адданага слугу і іерарха Хрыстовага Касцёла, вялікага абаронцу веры нашага часу. Няхай гэтая малітва будзе выразам нашай удзячнасці Папу Бэнэдыкту XVI за мужнае сведчанне веры, пакоры і адданасці Каталіцкаму Касцёлу, якое ён даў падчас свайго пантыфікату, а таксама за яго малітвы, якімі ён у цішыні на працягу апошніх васьмі гадоў падтрымлівае Паўсюдны Касцёл.

Каталіцкія біскупы Беларусі

Паводле Catholic.by