Падрыхтоўка да візіту Папы Францішка ў Ірак, які адбудзецца 5-8 сакавіка 2021, знаходзіцца ў заключнай фазе. Святы Айцец адправіцца ў краіну, параненую вайной і гвалтам, дзе сустрэнецца з хрысціянамі розных традыцый ды прадстаўнікамі рэлігій.

Прэфект Кангрэгацыі Усходніх Цэркваў, кардынал Леанарда Сандры падкрэсліў, што візіт Папы Францішка – гэта пераход ад слоў братэрства, выказаных у дакуменце з Абу-Дабі і ў энцыкліцы Fratelli tutti, да ўчынкаў і жэстаў згоды.

“Папа хоча суцешыць іракійскі народ, асабліва мясцовую Царкву, але ў яго яшчэ адна мэта – прадэманстраваць усяму свету, што братэрства хрысціян і мусульман магчыма” - сказаў прэфект Кангрэгацыі Усходніх Цэркваў.

“Я думаю, што гэта канкрэтны крок ад слоў да дзеяння. Крок, які быў бы яшчэ больш рэалістычным, калі б Папа адправіўся ў Ліван, які Ян Павел II назваў "краінай паслання", а Бэнэдыкт XVI – "краінай-майстэрняй". Гэтыя тэрміны вынікаюць з таго, што Ліван з'яўляецца жывым доказам магчымасці мірнага суіснавання паміж хрысціянамі і мусульманамі. Вельмі важна, каб тэорыі пра пабудову братэрскага свету не толькі заставаліся на паперы, але і ўкараняліся ў канкрэтнае жыццё людзей і грамадства”, - сказаў кардынал Сандры.